1 ¡TOTECO! Na nitanahuatijquet,

nipaqui pampa techfuerzajmacatoc.

Nelía nipaqui pampa tijchijtoc ma nitatani.

2 Techmacatoc cati noyolo quinequiyaya.

Quena, techmactili cati nimitztajtaniyaya.

3 Techmacatoc miyac tatiochihualisti, huan techicpahuiltijtoc se corona cati senquisa oro.

4 Nimitztajtani techcahuili ma huejcahuas niitztos,

huan nelía techmacatoc se nemilisti cati huejcahuas para nochipa.

5 Techpalehuijtoc ma nitatani miyac ica mohueyi chicahualis.

Huan yeca por ta, nochi nechhueyitepanitaj,

na nitanahuatijquet, huan nechhueyitalíaj.

6 Techtiochijtoc ica cati huejcahuas para nochipa,

huan nelhueyi nopa paquilisti cati nijpiya pampa tiitztoc nohuaya.

7 Na nitanahuatijquet nimotemachía ipan ta, TOTECO.

Quena, nimotemachía ipan mohueyi teicnelilis ta Cati Más tiHueyi,

yeca amo aqui huelis nechtanis.

8 TOTECO, ica mochicahualis tiquinajsiti nochi mocualancaitacahua.

Ica monejmat tiquinitzquis nochi cati mitzcualancaitaj.

9 Quema timonextis, inijuanti tatase moixpa quej itztosquíaj ipan se horno cati xahuantoc.

TOTECO, quema tiquintajtolsencahuas,

mocualancayo quintamitatis.

10 Tiquintzontamiltis hasta ininconehua huan iniixhuihua.

11 Masque masehualme cati amo cuajcualme mitzcualancaitaj huan quisencahuaj cati amo cuali mitzchihuilise,

amo quisas cuali cati moilhuijtoque.

12 Inijuanti moicancuepase para cholojtehuase quema quiitase para tiquinmelaita ica mocuahuitol para tiquintehuis.

13 Timitzhueyimatij, TOTECO,

pampa hueyi mochicahualis.

Huan timitzhueyichihuase ica huicat pampa nelía tijpiya nochi chicahualisti.