1 ¡NoTeco Dios! ¡NoTeco Dios!

¿Para ten techtahuelcajtoc?

¿Para ten timohuejcatalijtoc huan amo tihualajtoc para techmanahuiqui?

Amo tijtacaquilía quema nimitztzajtzilía.

2 NoTeco, tonaya huan tayohua amo nimosiyajquetza nimitznotza,

pero amo technanquilía.

3 Huan masque quej nopa eltoc,

ta quejipa titatzejtzeloltic.

Nochi tohuejcapan tatahua tiisraelitame mitzyahualojque huan mitzhueyichijque.

4 Totatahua mochixque ipan ta.

Quena, motemachijque ipan ta huan ta tiquinmanahui.

5 Mitznojnotzque quema taijyohuiyayaj huan tiquinmaquixti.

Ipan ta motemachijque huan amo tiquinpinahualti.

6 Pero na nimomati quej se pilocuiltzi huan amo nise masehuali.

Sequij san nechhuetzquilíaj huan sequinoc nechcualancaitaj.

7 Nochi cati nechitaj san noca paquij,

huan nechhuihuiitaj huan motzonojoliníaj,

8 huan quiijtohuaj:

“Yaya motemachía ipan TOTECO,

huajca ma tiquitaca sinta quimaquixtis.

Sinta nelía quiicnelía,

ma quimanahuiqui.”

9 Pero TOTECO, na nijmati para techpalehuijtoc.

Techquixti iijtico nonana.

Techmocuitahuijtoc hasta ten quema noja nichichiyaya.

10 Huan quema nitacatqui ya ipa nimotemachijtoc ipan ta.

Nochi tonali tieltihualajtoc tinoTeco Dios.

11 Amo techtalcahui san pampa hualajtoc ni tequipacholi huan amo aqui seyoc cati hueli nechpalehuis.

12 Miyaqui nocualancaitacahua nechyahualojtoque quej torojme cati mosisiníaj.

Quena, nesij quej nopa huejhueyi torojme cati itztoque ipan tali Basán.

13 Nanalcaj quej tecuanime cati mosisiníaj.

Camachalohuaj huan nechmelaitaj.

14 Na nimomati quej at cati mopatzcatoc huan campa hueli toyajtoc.

Nochi noomiyo lelecuecatoc.

Noyolo eltoc quej cera cati atiya.

15 Tantoc nochi nochicahualis.

Nijpiya nocamac huactoc quej se chachapal tepalcat,

huan nonenepil tatzquitoc ica nocholec.

Techtalijtoc campa tahuactoc huan campa onca miquilisti.

16 Masehualme cati amo cuajcualme nechyahualojtoque quej chichime.

Quicocoyotztoque nomax huan noicxihua.

17 Hasta hueli nijpohuas noomiyohua,

pampa sese nechcocohua.

Nocualancaitacahua nechtachilijtoque huan san noca paquij.

18 Momajmacaj cati nimoquentiyaya.

Quena, mahuiltíaj ica piltetzitzi para quiitase ajquiya quitocaros sesen noyoyo.

19 Pero ta, TOTECO, amo techtalcahui,

pampa na niitztoc momaco.

Xihuala nimantzi techpalehuiqui.

20 Techmanahui ten inimacheta ni mosisinijca masehualme cati itztoque quej chichime.

Amo xiquincahuili ma nechmictica.

21 Eltoc quej niitztoc inincamaco tecuanime,

huajca techmaquixti. Nopa masehualme itztoque quej torojme,

amo ma nechtompojhuica.

22 Huan na niquinpohuilis noicnihua ten ta, TOTECO,

huan quema oncas tasentilisti,

nimitzhueyichihuas iniixpa nochi.

23 TOTECO, tojuanti cati timitztepanitaj huan tiquimacasij timitzixpanose timitzpaquilismacaj.

Nochi tiiteipan ixhuihua Israel,

timitzhueyichihuaj.

Quena, timitzhueyimatij nochi tiisraelitame.

24 Pampa amo techelcajtoc quema titaijyohuíaj,

yon amo techhuejcamajcajtoc.

Amo cana techcuanecatatilía.

¡Amo! Ta techtacaquilía quema timitztajtaníaj techpalehuiqui.

25 Huajca, TOTECO, ipan nopa hueyi tasentilisti nimitzpaquilismacas iniixpa nochi momasehualhua,

pampa ta titemachti.

Iniixpa cati mitztepanitaj huan quiimacasij mitzixpanose,

na nijchihuas cati nimitztencahuilijtoc para nijchihuas.

26 Huajca nochi cati teicnetzitzi tacuase huan ixhuise.

Nochi cati quitemohuaj TOTECO quipantise huan quipaquilismacase.

Quena, paquise para nochipa.

27 Masehualme ten nochi talme campa hueli ipan taltipacti motepotztocase huan quielnamiquise TOTECO.

Inijuanti pehuase quihueyimatise huan motancuaquetzase iixpa.

28 Pampa TOTECO, yaya nopa tanahuatijquet cati quinnahuatía nochi talme.

29 Nochi cati quipiyaj tomi huan nochi cati teicneltzitzi ipan ni taltipacti motancuaquetzase iixpa.

Quena, nochi taltipac ehuani cati teipa miquise, quihueyimatise.

30 Nojquiya noteipan ixhuihua quihueyimatise TOTECO huan tepohuilise ten ya nochi ininemilis.

31 Quema toteipan ixhuihua tacactiyase,

tepohuilise para xitahuac TOTECO huan nochi nopa huejhueyi tamanti cati techchihuilijtoc.