1 Nijtascamatis TOTECO talojtzitzi huan nochipa nijsenpaquilismacatos.

2 Nijhueyitalis huan niquinilhuis nochi masehualme cati yaya nechchihuilijtoc.

Inijuanti cati teicneltzitzi quicaquise huan paquise.

3 Ma tijhueyichihuaca huan ma tijhueyitalica TOTECO san sejco.

4 Nijtzajtzili TOTECO ma nechpalehuiqui,

huan yaya nechtacaquili huan nechmanahui ten nochi cati nechmajmatiyaya.

5 Sequinoc cati motemachíaj ipan Toteco ixcahuanij ica paquilisti nojquiya,

por cati yaya quinchihuilijtoc.

Amo quema pinahuase.

6 Masque nipilteicneltzi,

nijtzajtzili TOTECO,

huan yaya nechmaquixti ten nochi tamanti cati nechtequipachohuayaya.

7 Iilhuicac ejca TOTECO quinmocuitahuía nochi cati quiimacasij TOTECO,

huan yaya quinmanahuía.

8 Xijyejyecoca TOTECO huan anquiitase para melahuac cuali iyolo ica tojuanti.

Hueyi paquilisti quipiyaj nochi masehualme cati ipan ya motemachíaj.

9 Nochi amojuanti cati aniaxcahua TOTECO, xiquimacasica,

pampa nochi cati quitepanitaj amo teno quinpolohua.

10 Nopa tecuanime cati más quipiyaj chicahualisti quemantica mayantinemij huan amo quipantíaj ten quicuase,

pero masehualme cati quitemohuaj TOTECO quipiyase nochi cati cuali.

11 Xihualaca noconehua, huan techtacaquilica,

huan nimechmachtis quenicatza monequi anquitepanitase TOTECO,

huan anquiimacasise anquiixpanose.

12 ¿Tijnequi tiitztos ica cuajcualtzi?

¿Tijnequi tihuejcahuas ipan ni taltipacti,

huan tiquitas cati cuali?

13 Monequi xijmocuitahuis monenepil para amo tiquinmahuispolos sequinoc ica istacatili.

14 Ximoiyocatali ica cati amo cuali,

huan xijchihua san cati xitahuac.

Xijchihuaca cati anhuelij para ma onca tasehuilisti inihuaya nochi masehualme.

Quena, ya nopa xijtemoca ica nochi amoyolo.

15 TOTECO quintachilía cati nemij xitahuac iixpa,

huan san quichiya para quinmacas cati quitajtanise.

16 Pero TOTECO sencualantoc ica inijuanti cati quichihuaj cati fiero.

Quintzontamiltis para ayecmo aqui quinelnamiquis ipan ni taltipacti.

17 Quema masehualme cati itztoque xitahuaque iixpa TOTECO quitzajtzilíaj,

yaya quintacaquilía.

Huan quinmanahuía ten nochi inincuesolhua.

18 TOTECO itztoc ininechca masehualme cati motequipachohuaj.

Huan quinmaquixtía cati motequipachohuaj ica inintajtacolhua.

19 Se masehuali cati itztoc xitahuac iixpa TOTECO quipiya miyac tequipacholi,

pero TOTECO quimanahuía ica nochi cati ipanti.

20 Pampa TOTECO quimocuitahuía para amo postequis yon se iomiyo.

21 Se masehuali cati fiero inemilis miquis por nopa tamanti fiero cati quichihua.

Quena, TOTECO quintalilis tatzacuiltili cati quicualancaitaj cati cuali.

22 TOTECO quinmaquixtía itequipanojcahua.

Quena, quintapojpolhuía imasehualhua cati motemachíaj ipan ya.