1 TOTECO, xiquincamaijixnamiqui cati noca cualanij.

Xiquintehui cati quinequij nechtehuise.

2 Xijcui nochi motatehuijca teposhua,

huan ximotanana para techmanahuiqui.

3 Xijquixti mohacha cati ica titatehui,

huan xiquinojtzacua cati nechtepotztocatihualahuij.

Huan techilhui:

“Na nimitzmaquixtis.”

4 Ma pinahuaca huan ma mocuapoloca cati nechtemohuaj para nechmictise.

Ma mocuepaca ininchaj ica pinahualisti cati quinequij nechchihuilise cati fiero.

5 Quej se ajacat quihuica tasoli,

iilhuicac ejca TOTECO ma quintojtocatiya cati nechcualancaitaj.

6 Ma onca tzintayohuilot ipan iniojhui.

Ma talxixitaca campa nemij para ma huetzica,

huan nopa ilhuicac ejquet ma quintepotztocatiyas para quinmictis.

7 Pampa masque amo teno nijchijtoya,

quitalijque se taquetzti para nechmasiltise.

Quixajque se ostot para ipan ma nihuetzi.

8 Ma quintalochajsi se hueyi tequipacholi.

Ma masica ipan nopa taquetzti cati inijuanti quitalijque huan ma motzontamiltica.

9 Huajca quena, na nipaquis ipan TOTECO.

Nijpiyas paquilisti pampa TOTECO nechmaquixtijtos.

10 Ica nochi noyolo niquijtos:

“Amo aqui seyoc quej ta, TOTECO.

Tiquinmocuitahuía cati amo quipiyaj fuerza para masehualme cati tetique amo teno huelis quinchihuilise.

Quena, tiquinmanahuía cati teicneltzitzi huan cati amo quipiyaj cati quinpolohua.

Tiquinmanahuía inimaco cati quinequij quintacuijcuilise.”

11 Motananaj masehualme cati amo cuajcualme huan nechcualancaitaj.

Inijuanti quitestigojquetzaj cati amo melahuac,

huan nechtaijilhuíaj ica tamanti cati amo nijmati.

12 Nechtaxtahuíaj ica cati amo cuali,

masque nelcuali niquinchihuilijtoc.

San quinequij nechtequipacholmacase.

13 Pero quema inijuanti mococojque,

nimotequipacho inihuaya huan nimoyoyonti ica nopa fiero yoyomit para nochi quimatise nimotequipachohuayaya inihuaya.

Hasta nimosajqui por inijuanti para nijtajtanis TOTECO ma quinchicahua.

Pero TOTECO amo quicajqui cati niquilhui.

14 Nimotequipachojtinemiyaya quej se tamanti fiero ipantitosquía se nohuampo o se noicni.

Nimotequipacho huan nichocatinemiyaya quej mictosquía nonana.

15 Pero quema na nechajsic tequipacholi, inijuanti pajque.

Quema nimotepotani huan nihuetzqui,

inijuanti mosentilijque huan nechhuetzquilijque.

Masehualme cati amo cuajcualme huan cati nechixmatiyayaj nechejelnamiquiyayaj huan nechmaquiliyayaj masque amo teno nijchijtoya.

16 Quej masehualme cati amo cuajcualme quihuetzquilíaj ten hueli,

inijuanti noca pajque huan motancochhuehuechotzque noixpa ica cualanti.

17 TOTECO, ¿hasta quema noja san tijtachilijtos nochi ni tamanti?

Techmanahui para amo nechmictise,

pampa san setzi nonemilis.

Techmaquixti ten ni masehualme cati mochihuaj quej tecuanime cati quinequij nechhuejhuelose.

18 Huan nimitztascamatis miyacapa ipan tasentilisti.

Iniixpa nochi nopa miyaqui momasehualhua nimitzpaquilismacas.

19 Amo xiquincahuili nocualancaitacahua cati istacatij ma noca paquica.

Amo xiquincahuili cati nechcualancaitaj ma moixijcopilica ica paquilisti noixpa por notequipachol.

20 Inijuanti amo quitemohuaj tasehuilisti.

San moilhuíaj quenicatza huelis quincajcayahuase masehualme cati itztoque ica cuajcualtzi ipan ni tali.

21 Nechtaijilhuíaj huan quiijtohuaj:

“¡Xiquitaca tijnelitztoque cati fiero quichijqui!”

22 TOTECO, ta tiquitztoc cati quichihuaj.

Amo san xiitzto huan amo teno tijchihuas.

¡Amo techtahuelcahua!

23 Ximotanana huan techchihuili cati xitahuac huan melahuac.

Quena, TOTECO, xiisihui huan techmanahuiqui.

24 TinoTeco Dios, ta cati ipa titetajtolsencahua xitahuac,

xitenextili para amo teno nijchijtoc.

Amo xiquincahuili nocualancaitacahua ma noca huetzcaca.

25 Ma amo nopanti cati inijuanti quinequij.

Ma amo quiijtoca nechixpolojtoque.

Amo xiquincahuili ma moilhuica para inijuanti nechtantoque.

26 Xijchihua para inijuanti cati noca paquij por notequipachol ma mocuapoloca huan ma ayecmo quimatica taya quichihuase.

Quena, xijcahua para inijuanti cati moilhuíaj para más huejhueyi que na ma mopinahualtica huan ayecmo aqui ma quintepanita.

27 Pero ma huicaca ica paquilisti inijuanti cati nechpalehuíaj.

Ma paquica inijuanti cati quiitaj para nijchihua cati xitahuac.

Huan nochipa ma quiijtoca:

“Nelía hueyi TOTECO cati quipactía quipalehuis David,

pampa yaya quitequipanohua.”

28 Quena, xijtacaquili cati nimitztajtanía,

huan teipa nitepohuilis para nelía xitahuac cati tijchihua.

Quena, semilhuit nimitzpaquilismacas.