1 Nochi anmasehualme ximomatajtatzinica.

Xijpaquilismacaca Toteco Dios huan xihuicaca chicahuac.

2 Pampa TOTECO yaya cati más hueyi huan temajmati.

Yaya nopa hueyi tanahuatijquet cati quinahuatía nochi ni taltipacti.

3 Quintzontamilti pilaltepetzitzi toixpa huan quitalijtoc nochi talme tomaco para tiquinnahuatise.

Yeca tojuanti tahuel tipaquij.

4 Yaya quitapejpenijtoc ni tali para techaxcatis.

Techmaca cati más cuali pampa techicnelía tojuanti tiimasehualhua.

5 Toteco Dios tejcotoc campa tanahuatía.

Nochi tzajtziyayaj ica paquilisti huan tapitzayayaj ica tapitzali quema TOTECO calajqui.

6 Xihuicaca tiohuicat para tijpaquilismacase Toteco Dios.

Xijhuicatica pampa yaya totanahuatijca.

7 Toteco Dios, yaya nopa tanahuatijquet cati quinahuatía nochi ni taltipacti.

Xijcualtalica se huicat cati cuajcualtzi huan xijhuicatica.

8 Toteco Dios mosehuijtoc ipan isiyaj tatzejtzeloltic,

huan tanahuatía ipan nochi talme.

9 Nopa huejhueyi masehualme cati quipiyaj tanahuatili ipan campa hueli tali ipan ni taltipacti mosejcotilíaj tohuaya.

Quinequij para san sejco tijhueyichihuase Toteco Dios,

yaya cati iTeco Abraham cati huejcajquiya itztoya.

10 Iaxca ya nochi tanahuatiani huan inisoldados campa hueli ipan taltipacti,

huan inijuanti quihueyitepanitaj.