1 ¡Tahuel hueyi TOTECO!

Quena, quinamiqui para tijpaquilismacase Toteco Dios cati itztoc ipan ialtepe huan ipan itepe cati tatzejtzeloltic.

2 Nelía cuajcualtzi nopa tepet Sion huan ijcatoc tahuejcapa ipan nopa altepet.

Nopona mosehuía Jerusalén, ialtepe Toteco Dios,

nopa hueyi tanahuatijquet.

3 Toteco Dios iselti itztoc ipan nopa huejcapantic cali campa monequi moquetzas cati tachixtoc para quimanahuis altepet Jerusalén.

Tenextilijtoc para yaya cati quimanahuía huan quimocuitahuía.

4 Tanahuatiani ten campa hueli itztoque ipan ni taltipacti mosentilijque para san sejco quitehuise nopa altepet.

5 Pero quema quiitaj ajquiya quimocuitahuía nopa altepet huan para nelía hueyi ichicahualis,

momajmatíaj.

Huan nimantzi cholojtehuaj huan mocuepaj campa hualajtoque.

6 Quena, quinitzquía se majmajti huan nelía taijyohuíaj,

quej se sihuat quema conepiya,

7 o quej se ajacat chicahuac cati quinsosolohua nopa huejhueyi barcos cati hualahuij tali Tarsis.

8 Ipa tijcactoque quenicatza TOTECO quimocuitahuía ialtepe,

huan ama tiquitztoque.

Quena, TOTECO yaya cati quinyacana nochi nopa miyac millones iilhuicac ejcahua para tatehuitij.

Quitalijtoc para ialtepe Jerusalén ma huejcahuas para nochipa.

9 Toteco Dios, quema tiitztoque ipan motiopa,

tiquelnamiquij huan timoyolilhuíaj quenicatza techicnelía.

10 Toteco, campa hueli masehualme mitzpaquilismacaj,

pampa quicactoque quenicatza mohueyitilis.

Quicactoque hasta campa ontami taltipacti.

Huan quimatij para ica mohueyi chicahualis titetajtolsencahua xitahuac.

11 Huajca ma paquica nopa masehualme ipan tepet Sion.

Ma huitonica ica paquilisti nochi cati ehuani ipan altepeme ten tali Judá pampa cuali huan xitahuac titetajtolsencahua.

12 Nochi amojuanti cati animasehualhua Toteco Dios,

xiyaca xijyahualotij nopa altepet Jerusalén,

huan xijpohuaca quesqui tepancali huejhueyi quipiya campa soldados tamocuitahuíaj.

13 Xijtachilitij nopa hueyi ichaj nopa tanahuatijquet,

huan xiquitaca quenicatza tatzajtzactoque huan quiyectalijtoque,

para quej nopa huelis anquinpohuilijtiyase amoteipan ixhuihua.

14 Pampa ni Toteco Dios, yaya elis toDios para nochipa,

huan amo quema tamis ichicahualis.

Yaya techyacanas mojmosta hasta más nepa quema ya timictose.