1 Cuali xijtacaquilica ya ni,

amojuanti cati campa hueli anitztoque ipan ni taltipacti.

2 Nocamanal elis para nochi.

Elis para cati tominpixtoque huan para cati teicneltzitzi.

Elis para cati quipiyaj tequiticayot huan para cati amo quipiyaj tequiticayot.

Huajca xijtacaquilica.

3 Nicamanaltis ica talnamiquilisti.

Nimechpohuilis nochi cati nimoyolilhuijtoc ipan noyolo.

4 Achtohui nimechilhuis se tatzintoquili cati totalnamijca huejcapan tatahua quiijtojque,

huan nitatzotzonas ica se arpa huan nihuicas para nimechmatiltis taya quinequi quiijtos:

5 ¿Para ten monequi nimomajmatis quema hualas taohuijcayot,

huan quema nopa tajtacolchijca masehualme cati nechcualancaitaj hualase nechyahualoquij?

6 Inijuanti motemachiyaj ipan inintomi,

huan mohueyimatij pampa quipiyaj miyac tamanti cati pajpatiyo.

7 Pero yon se ten inijuanti amo huelis momaquixtis ten itajtacolhua,

yon amo huelis quimaquixtise se iniicni.

Amo aqui huelis quitaxtahuis Toteco Dios para ma quimaquixti.

8 Pampa tonemilis eltoc se tamanti cati miyac ipati.

Amo onca yon se tomi ipan nochi taltipacti cati ica huelis moixtahuas.

9 ¡Amo! Amo aqui huelis quicohuas inemilis para itztos para nochipa huan para amo quema miquis.

10 Nochi masehualme miquise.

Cati talnamiquij huan cati mohueyimatij,

huan nojquiya nochi cati huihuitique,

san se ininpantis.

Mictehuaj huan quicajtehuaj nochi cati pajpatiyo quipiyayayaj.

Huan sequinoc moaxcatise.

11 Inijuanti moilhuíaj itztose para nochipa,

yeca quicualtalíaj ininchajchaj huan quitalíaj inintoca ipan inintal,

quej elisquía iniaxca para nochipa.

12 Pero se masehuali amo huejcahuas masque nelía tominpixtoc,

pampa nojquiya miqui san se quej se cuatitan tapiyali.

13 Nochi masehualme cati motemachijtoque san ipan inijuanti iniselti,

quipantise miquilisti.

Huan nojquiya miquise nopa masehualme cati quintoquilíaj huan quihueyitalíaj inincamanal.

14 Nopa masehualme miquise quej miquij borregojme.

Quena, miquilisti quinchiya nochi.

Pero se tonali nopa masehualme cati itztoque xitahuaque iixpa Toteco Dios quinnahuatise masehualme cati amo cuajcualme.

Quej nopa elis quema ya palantose inintacayohua nopa masehualme ostoijtic.

Huajca quena, ipan nopa tonali nopa tominpiyani quicajtejtose huejca ininchajchaj cati cuajcualtzi.

15 Pero Toteco Dios nechmaquixtis ten ichicahualis miquilisti huan nechhuicas ihuaya.

16 Amo ximotequipacho sinta se masehuali moricojchihua,

huan mojmosta más quiyecchijchihua ichaj.

17 Pampa quema miquis amo teno huelis quihuicas.

¡Amo! Quema quitemohuise itacayo ostoijtic,

yon quentzi cati cuajcualtzi quipixqui amo huelis quihuicas.

18 Masque se masehuali itztos ica paquilisti quema noja yoltoc,

huan sequinoc quitepanitase pampa moricojchijtoc,

19 ajsis se tonali quema miquis quej ihuejcapan tatahua,

huan ayecmo quema quiitas taahuili.

20 Se masehuali cati moricojchijtoc,

pero amo quielnamiqui para amo huejcahuas inemilis ipan ni taltipacti,

mictehuas san se quej se cuatitan tapiyali.