1 Yaya TOTECO Cati Más Quipiya Chicahualisti que nochi cati quintocaxtíaj dioses,

quinnotztoc nochi masehualme cati itztoque campa hueli ipan ni taltipacti.

Quinnotza cati itztoque hasta campa quisa tonati huan hasta campa oncalaqui.

2 Toteco Dios ica iyejyejca petani huan taahuía ten Sion,

nopa tepet campa ijcatoc itiopa cati senquisa cuajcualtzi.

3 Toteco Dios hualas ica chicahualisti,

huan iixpa hualas se hueyi tit cati quisosolojtihualas nochi cati quipantis.

Tatomonilot huan tapetanilot quiyahualohua.

4 Toteco Dios quinnotza nochi cati itztoque ipan ilhuicacti huan ipan taltipacti,

para ma contachilica quenicatza quintajtolsencahuas imasehualhua.

Quiijtohua:

5 “Xiquinsentilica nomasehualhua cati moiyocacajtoque ten na.

Quena, ma hualaca nochi inijuanti cati quichijtoque se camanali nohuaya,

quema nechmacaque tacajcahualisti huan quiijtojque para nechtoquilisquíaj.”

6 Nochi ilhuicacti tepohuilía para Toteco Dios itztoc xitahuac.

Huan para yaya nopa juez cati tetajtolsencahuas.

7 “Xijtacaquilica nochi annomasehualhua,

xijcaquica nochi cati niquijtos.

Nimechtelhuis miyacapa ica nochi tamanti cati anquichijtoque,

pampa na niDios huan niamoTeco.

8 Amo nimechajhuas pampa amo antechmacaj tacajcahualisti,

yon pampa amo anquinmictíaj tapiyalme huan anquintatíaj noixpa,

pampa quena, ya nopa anquichihuaj.

9 Pero amo ya nopa cati nijnequi.

Amo monequi techmacaca tacajcahualisti,

quej becerros huan oquich chivojme cati hualahuij ten amopotrero.

10 Pampa na noaxcahua nochi tapiyalme ipan cuatitamit huan nochi huacaxme cati tacuajtinemij ipan nochi tachiquilme.

11 Niquinixmati nochi totome campa hueli huan nochi tapiyalme cati nemij cuatita, pampa noaxcahua.

12 Sinta nimayanasquía, amo nimechtajtanisquía techtamacaca,

pampa ni taltipacti huan nochi cati eltoc ipani noaxca.

13 ¿Anmoilhuíaj nimotacualtía ica torojme ininacayo,

huan niqui inieso oquich chivojme?

¡Amo!

14 Nijnequi techtascamatilica ica nochi cati nimechchihuilía huan ya nopa niquitas quej se tacajcahualisti.

Xijtamichihuaca nochi cati anquiijtojtoque para anquichihuase.

15 Huan technojnotzaca quema anmotequipachohuaj,

huan na nimechmanahuis huan amojuanti antechnextilise miyac tatepanitacayot.”

16 Pero Toteco quinilhuía masehualme cati amo cuajcualme:

“Amo anquipiyaj tequiticayot para ancamanaltise ten nopa camanal sencahuali,

cati quiijtohua cati nimechmacas,

yon amo hueli antepohuilise notanahuatilhua.

17 Pampa amo anquicaquij quema nimechtacahualtía,

yon amo anquichihuilíaj cuenta nocamanal.

18 Quema anquiitaj se tachtejquet,

anmohuampochihuaj ihuaya,

huan nojquiya anmohuicaj inihuaya cati quichijtinemij ten hueli ica cati amo inintahuical.

19 San campa hueli anquicalaquijtinemij amonenepil para anquiijtose cati fiero.

Nimantzi anistacatij.

20 Anmosehuíaj huan anquitelhuíaj se cati amonelicni.

Quena, yaya cati nojquiya icone amonana huan san sejco anmoscaltijque,

anquitaijilhuíaj.

21 Nochi ya ni anquichijtoque,

huan na amo teno niquijtojtoc.

Huajca anmoilhuijtoque para na nieli san se quej amojuanti.

Pero ama nimechixcoilhuis nochi cati anquichijtoque,

huan nimechpannextilis nochi.

22 Xijtacaquilica ya ni,

amojuanti cati antechelcahuaj na, niamoTeco Dios.

Sinta amo antechelnamiquij,

nimechhuejhuelos huan amo aqui huelis amechmanahuis nomaco.

23 Pero quema antechtascamatij ica nochi cati nimechchihuilía,

eltoc quej se tacajcahualisti cati nechnextilía antechtepanitaj.

Huan nopa masehuali cati momaca cuenta para mocuapolojtoc,

huan mocuepa ipan noojhui cati xitahuac,

na nijmaquixtis.”