1 ¡NoTeco Dios, techmanahui inimaco nocualancaitacahua!

¡Techmocuitahui ten inijuanti cati hualajtoque para nechtzontamiltise!

2 ¡Techmanahui inimaco tajtacolchijca masehualme,

inijuanti cati temictíaj!

3 Nechtachilíaj para quiitase quenicatza nechmictise.

Masehualme cati quipiyaj chicahualisti nechchixtoque yahualtic.

Pero amo pampa niquinchihuilijtoc se tamanti cati amo cuali

o pampa niquinixpanotoc.

4 ¡Amo! Amo teno cati fiero niquinchihuilijtoc,

pero inijuanti mocualtalíaj para nechmictise.

¡TOTECO, xiisa!

¡Xihuala techpalehuiqui!

5 TOTECO, Ta Cati Tijpiya Nochi Chicahualisti,

ta cati titoDios tiisraelitame,

ximotanana huan xiquintatzacuilti nopa talme campa itztoque masehualme cati amo israelitame,

pampa techyahualojtoque.

Amo xiquintapojpolhui nopa masehualme cati mosisiníaj huan nimantzi taixpanoj.

6 Mojmosta ica tapoyahui hualahuij para quitachilise quenicatza huelis techtanise.

Tzajtzitinemij quej chichime cati quiyahualojtinemij ni altepet.

7 Nijcaqui camanaltij fiero hasta camaposonij,

huan mitztelchihuaj Toteco,

pampa inijuanti quiijtohuaj:

“Amo aqui techcaqui.”

8 Pero ta TOTECO, san xiquinhuetzquili,

huan xiquinpinahualti ni masehualme ten sequinoc talme cati nechyahualojtoque.

9 NoTeco Dios, pampa nocualancaitacahua quipiyaj chicahualisti, ipan ta nimotemachis,

pampa ta cati techmanahuía.

10 NoTeco Dios, ta nochipa techicnelijtoc miyac,

yeca nijmati para temachti techyacantiyas.

Tijchihuas ma niquita cati tahuel nijnectoc ma ininpanti nocualancaitacahua.

11 NoTeco, ta cati techmanahuía,

amo xiquinmicti nimantzi ni nocualancaitacahua,

pampa huelis ni nomasehualhua nimantzi quielcahuase cati ininpantis nopa mosisinijca masehualme.

Más cuali san xiquinsemana ica mohueyi chicahualis huan xiquinechcapantali.

12 Quena, xiquintatzacuilti pampa nochi inijuanti tahuel istacatij, mohueyimatij huan tatelchihuaj.

13 Xiquintzontamilti ica mohueyi cualancayo,

huan xiquintamiixpolihuilti.

Huan quej nopa nochi masehualme quimatise para ta, Toteco Dios,

titanahuatía ipan tali Israel,

huan ipan nochi taltipacti.

14 Nocualancaitacahua mocuepaj ica tiotac huan tzajtzij quej chichime,

huan quiyahualojtinemij ni altepet.

15 Nentinemij campa hueli para quitemojtinemise inintacualis.

Huan quema amo ixhuij,

tzajtzij seyohual quej chichime.

16 Pero na sese ijnaloc nihuicas ica nopa chicahualisti cati techmaca.

Huan nimitzhueyimatis pampa techtasojta miyac.

San ta techmanahuía huan san ipan ta nimotemachía,

quema huala taohuijcayot.

17 Toteco Dios, momaco ta niitztoc temachti,

yeca nimitzhueyimatis huan nihuicas para ta,

pampa san ta techmocuitahuía huan techicnelía.