1 Toteco Dios, ta techhuejcamajcajtoc huan ayecmo tijmatij taya tijchihuase.

Ticualantoc ica tojuanti huan techtahuelcajtoc.

Ama timitztajtaníaj para sempa ximoyoltali ica tojuanti huan sempa techfuerzajmaca.

2 Ni tali tijchijqui ma huihuipica ica majmajti.

Tahuel tijtaijyohuiltijtoc.

Huajca ama, noTeco Dios, sempa xijcualtali total cati tamitatapacatoc.

3 Tijchijtoc para tojuanti timomasehualhua ma tijpanoca huejhueyi taijyohuilisti.

Huan ica ni taijyohuilisti techchijtoc ma timomimilojtinemica quej elisquía tiihuintitoque.

4 Pero ama techmacatoc nochi tojuanti cati timitzimacasij huan timitztepanitaj quej se bandera campa timosentilise.

Huan quena, nochi tojuanti cati tijchihuaj cati melahuac timosentilise nopona,

para timomanahuise quema tocualancaitacahua techmajcahuilise cuataminti.

5 Technanquili huan techmanahui nochi tojuanti cati techicnelía.

Xijtequihui mohueyi chicahualis para techmanahuis.

6 Toteco Dios, yaya cati itztoc ipan ichaj nepa ilhuicac quiijtojtoc:

“Ica paquilisti nijxelos tali Siquem,

huan nijtamachihuas nopa tamayamit cati itoca Sucot,

para nijmacas aqui nijnequis pampa nopa talme noaxcahua.

7 Huan nopa tali Galaad huan Manasés nojquiya noaxcahua.

Ipan tali Efraín hualase nosoldados cati nechmanahuise quej notzontzajca,

huan ipan tali Judá hualase notanahuatijcahua.

8 Cati itztose ipan tali Moab elise notequipanojcahua cati teicneltzitzi.

Cati itztoque ipan tali Edom nechtequipanose.

Huan nitahuejchihuas chicahuac quema ya niquintantos nopa filisteos.”

9 ¿Ajquiya nechchihuas ma nicalaqui ipan nopa altepeme cati moyahualtzactoque ica tepamit ipan tali Edom?

¿Ajquiya nechchihuas ma niquintani sinta amo ta?

10 San ta techyacanas ipan tatehuilisti, noTeco Dios.

Amo techtahuelcahua.

Sinta ta amo tiyas ihuaya tosoldados para tatehuise, Toteco,

amo aqui techpalehuis.

11 Quena, Toteco Dios, techpalehuis para tiquintanise tocualancaitacahua,

pampa inintapalehuil masehualme, amo teno ipati.

12 Ica itapalehuil Toteco Dios tijchihuase huejhueyi tamanti.

Yaya iselti quintzontamiltis nochi tocualancaitacahua.