89
Nopa camanal sencahuali cati Toteco quichijqui ihuaya David
1 Nimitzhuicatis, TOTECO, para nochipa pampa tahuel hueyi moyolo ica na.
Quena, nochi telpocame huan huehuentzitzi niquinpohuilis para ta nelía titemachti.
2 Na niquijto: “Ta titetasojtas para nochipa.
Huan nochipa tiitztos titemachti san quej para nochipa huejcahuas ilhuicacti campa tiitztoc.”
3 Ta tiquijtojtoc para tijchijqui se camanal sencahuali ica motequipanojca David cati tijtapejpenijtoc.
Titatestigojquetzqui ten taya tijchihuilis.
4 Tiquilhui para se iixhui mosehuis ipan isiyaj campa yaya tanahuatía,
huan nopona tanahuatis para nochipa.
5 TOTECO, cati itztoque ipan ilhuicac mitzpaquilismacaj por nochi nopa tiochicahualnescayot cati tijchihua.
Huan miyac millones moilhuicac ejcahua mitzhueyimatise pampa titemachti.
6 Pampa ipan nochi ilhuicac amo aqui seyoc cati san se quej ta, Toteco Dios.
Huan yon se ilhuicac ejquet amo quipiya chicahualisti quej cati tijpiya ta, Toteco.
7 Toteco Dios, ta nelía tihueyi huan titemajmati.
Nochi motatzejtzeloltijca ilhuicac ehuani mitztepanitaj.
Quena, nochi cati mitzyahualojtoque, majmahuij quema moquetzaj moixpa.
8 TOTECO, ta tiDios Cati Tijpiya Nochi Chicahualisti,
¿ajquiya seyoc tahuel quipiya chicahualisti quej ta?
¡Amo aqui seyoc! San ta TOTECO tahuel tijpiya chicahualisti.
San ta nelía titemachti.
9 San ta tihueli tijtacahualtía nopa hueyi at quema mosisinía huan mocoxonía chicahuac.
Tijtacahualtía huan quichihua cati tiquilhuía.
10 Ta tijtzontamilti nopa cati temajmatiyaya ipan hueyi at.
Ica mohueyi chicahualis tiquinsemanqui mocualancaitacahua.
11 Ta moaxca ilhuicacti, taltipacti huan nochi cati onca,
pampa nochi tijchijchijqui ta.
12 Tijchijchijqui nopa norte huan sur.
Nopa tepeme Tabor huan Hermón paquij pampa ta tiquinchijchijqui.
13 Moajcol tahuel quipiya chicahualisti.
Huan monejmat quipiya tetili huan miyac yajatili para tatanis.
14 Motanahuatilis motatzquilijtoc ipan ome tamanti:
Titetajtolsencahua xitahuac huan tijchihua cati cuali.
Titeicnelía huan tiquijtohua cati melahuac.
15 Nelía paquij nopa masehualme cati quicaquij nopa tapitzali cati quinnotza ma mitzhueyichihuaca, TOTECO.
Inijuanti nemise nelía monechca huan ta tiquintaahuilis.
16 Semilhuit mopaquilismacase ipan ta pampa tahuel tihueyi huan tixitahuac.
17 Pampa san ta tijpiya mohueyitilis huan tiquinfuerzajmaca.
Timasehualme tijpiyaj chicahualisti pampa ta techpalehuía.
18 Quena, Toteco Dios, ta cati titatzejtzeloltic techmocuitahuía tojuanti ipan tali Israel.
Ta titotanahuatijca.
19 Ipan se tanextili tijcamanalhui motatzejtzeloltijca profeta huan tiquilhui:
“Ten nochi masehualme nijtapejpenijtoc se cuajcualtzi telpocat cati tahuel motemaca,
huan nijtequitali ma eli tanahuatijquet para na.
20 Quena, nijpantijtoc notequipanojca David huan nicaltijtoc ica nopa aceite cati ica niteiyocatalía para ma nechtequipanoca.
21 Nijchihuas ma eli temachti huan nijmacas chicahualisti.
22 Amo quiechcapantalise icualancaitacahua,
yon amo quitanise taixpanoca masehualme.
23 Iixpa niquintzontamiltis icualancaitacahua huan nochi cati quicualancaitaj.
24 Na cati nitemachti nijmocuitahuis huan nijtiochihuas talojtzitzi,
huan tahuel miyac niquicnelis.
Ica na notapalehuil yaya elis tahuel hueyi.
25 Na nijchihuas para itanahuatilis pehuas campa hueyat Eufrates,
huan tamis hasta campa hueyi at cati itoca Mediterráneo.
26 Huan yaya nechtzajtzilis huan nechilhuis:
‘¡Ta tinoTata, ta tinoTeco Dios!
Ta cati techmaquixtía huan techtatía para amo teno nechajsis.’
27 Na niquitas nopa tanahuatijquet quej noachtohui cone.
Nijchihuas para yaya ma eli nopa tanahuatijquet cati más hueyi ipan nochi taltipacti.
28 Niquicnelis para nochipa huan para nochipa nijchihuilis cati cuali.
Huan nopa camanal sencahuali cati nijchijtoc ihuaya, amo quema tamis.
29 Na nijtequimacas se iixhui para ma tanahuatis campa yaya tanahuatiyaya.
Itanahuatilis huejcahuas para nochipa quej huejcahuas ilhuicacti.
30 Pero sinta iconehua quitahuelcahuase noley huan amo monejnemiltise quej quiijtohua notamachtil,
31 o sinta quiixpanose cati niquinnahuatijtoc ma quichihuaca ipan ininemilis huan amo quintepanitase notanahuatilhua,
32 huajca niquintatzacuiltis pampa ya nopa quinextis para amo nechneltocatoque huan tajtacolchihuaj.
33 Pero amo nijcahuas niquinicnelis,
yon amo nijtamiltis nopa camanali cati nijchijtoc inihuaya.
34 Amo niquelcahuas cati ica nimocajtoc David huan amo nijpatas nocamanal.
35 Pampa na nitatestigojquetzqui para nijchihuilis David nochi cati nijtajtolcahuilijtoc.
Huan na niDios cati nitatzejtzeloltic amo hueli niistacatis.
36 Iixhui mosehuis huan tanahuatis para nochipa campa ya mosehui.
Itanahuatilis huejcahuas san quej imiyaca tonali taahuijtos tonati.
37 Quena, itanahuatilis tahuel huejcahuas quej huejcahuas metzti,
o quej huejcahuas nochi cati eltoc ipan ilhuicac cati eltoque quej notestigos.”
Quena, quej nopa tiquijto, Toteco.
38 ¿Huajca para ten techtahuelcahua huan techhuejcamajcahua?
¿Para ten tahuel ticualani ica yaya cati tijtapejpenijtoc para elis tanahuatijquet?
39 ¿Tijsosolojtoc nopa camanali cati tijchijqui ihuaya?
Pampa eltoc quej tijtahuiso icorona hasta talchi.
40 Tiquincahuili tocualancaitacahua ma quihuelonica nopa tepamit cati yahualtic quitzacuayaya toaltepe.
Huan quitamisosolojque nopa calme cati huejcapantique campa timomanahuiyayaj.
41 Nochi cati panoj nopona quiichtequij cati inijuanti quinequij.
Huan nopa masehualme cati itztoque tonechca san techhuetzquilíaj.
42 Tiquinfuerzajmacatoc tocualancaitacahua,
huan tiquinchijtoc ma paquica pampa techtantoque.
43 Tijquixtili itatequiyo tomacheta cati ica titatehuiyayaj,
huan amo tijnejqui techpalehuis para ma titatanica.
44 Techquixtili noyejyejca huan tijtahuisojtoc hasta talchi notanahuatilis.
45 Techchijtoc ma nitalochhuehuejtiya huan techpinahualtijtoc iniixpa nochi masehualme.
46 TOTECO, ¿hasta quema tamis ticualantos?
¿Hasta quema noja timotatijtos ten tojuanti?
¿Mohueyi cualancayo eltos quej tit para nochipa?
47 ¡Toteco, xiquelnamiqui para tonemilis amo huejcahuas ipan ni taltipacti!
¿Huelis timoilhuía amo teno ipati nopa nemilisti cati tiquinmacatoc nochi masehualme?
48 Yon se masehuali amo huelis itztos para nochipa. ¡Nochi miquise!
¿Ajquiya huelis quimanahuis inemilis imaco miquilisti?
49 NoTeco Dios, ¿canque eltoc motaicnelilis ten huejcajquiya?
¿Para ten ayecmo tijpiya hueyi moyolo ica tojuanti?
Ta tiToteco cati titemachti, tijtajtolcahuili David para melahuac amo quema techtahuelcahuas.
50 TOTECO, xijtachili quenicatza nochi masehualme techcualancaitaj tojuanti timomasehualhua.
51 Mocualancaitacahua quipinahualtíaj yaya cati tijtapejpenijtoc para elis tanahuatijquet.
52 Ma tijpaquilismacaca TOTECO para nochipa.
Quej nopa ma eli.