1 Toteco, ta nochipa techmocuitahuijtinentoc,

hasta ten ipejya nochi xihuit huan para nochi tonali.

2 Hasta quema ayemo tiquinchijchihuayaya tepeme huan taltipacti, ta ipa tiitztoc.

Pampa ta, tiToteco Dios, amo quema tijpixqui mopejya,

huan amo quema tijpiyas motamiya.

3 Ta tijchihua para nochi masehualme ma mocuepaca tali.

Quena, ticamanalti huan tiquijtohua:

“Ximiquica anmasehualme.”

4 Pampa mil xihuit ta tiquita quej se tonal cati panoc yalohua,

o quej elisquía se eyi hora quema se tamocuitahuiyaya tayohua.

5 Tonemilis motalojti quej at cati hualtemo chicahuac ipan se atajti.

Huan ica se talojtzi tiixpolijtehuaj quej se temicti.

Nojquiya tiitztoque quej se xihui cuahuit.

6 Ica ijnaloc moscaltía huan cahuani,

huan ica tiotac quitzontequij huan huaqui.

7 Pampa ica mohueyi cualancayo techtaijyohuiltía huan techtzontamiltía.

8 Totajtacolhua huan totaixpanolhua tanemijya nestoc moixpa.

9 Yeca nochi tonali huan nochi xihuit tijpanoj huejhueyi taohuijcayot,

cati ta techtitanilía ica mohueyi cualancayo.

10 San techcahuilía timasehualme ma tiitztoca setenta xihuit.

Huan cati quentzi más tejtetique san tiquincahuilía ma itztoca ochenta xihuit.

Pero ipan nochi nopa xihuit san tijpanoj taohuijcayot huan tequipacholi,

pampa nochi nopa xihuit san panotiquisa huan tojuanti san tiixpolijtehuaj.

11 ¿Ajquiya quimachilía nochi cati tihueli tijchihuas quema ticualani?

¿Ajquiya ten tojuanti mitzimacasi quej quinamiqui?

12 Amo miyac tonali tijpiyaj,

huajca technextili quenicatza ma tijchihuaca para amo timotonalpolose,

huan para ma tijpiyaca talnamiquilisti ipan toyolo nochi tonali.

13 TOTECO, xihuala huan techtiochihua.

¿Hasta quema tamis ticualantos?

Techtasojta tojuanti timotequipanojcahua.

14 Mojmosta ica ijnaloc technextili motaicnelilis,

huan nochi tonemilis timitzhuicatise huan tiyolpactose.

15 Toteco, techmaca paquilisti quej ipataca nopa taohuijcayot cati tijpanoque.

Huan techcahuili ma tiitztoca ica cuajcualtzi para miyac xihuit,

quej imiyaca nopa xihuit quema tijpanoque tamanti cati fiero.

16 Xijchihua para sempa ma tiquitaca nopa huejhueyi tiochicahualnescayot cati tijchihua.

Huan toconehua ma quiitaca nochi nopa cuajcualtzitzi tamanti san se quej tijchihuayaya achtohuiya.

17 TOTECO, ta titoDios,

techtaahuilía ica motatanex huan technextilía para techcualita.

Techpalehui para nochi cati tijchihuase ma quisa cuali huan ma huejcahuas.

Quena, Toteco, ma cualquisa nochi cati toma quichihuas pampa ta techfuerzajmaca.