1 ¡TOTECO tanahuatía!

Nochi masehualme ipan nochi talme ma huihuipicaca ica majmajti.

Isiyaj campa mosehuía para tanahuatis quipiya más tanahuatili huan eltoc más huejcapa que nopa ilhuicac ehuani cati inintoca querubines.

Nochi cati onca huan nochi cati itztoque ipan taltipacti,

ma moyolpitzahuilica.

2 Ipan Tepet Sion nochi quimatij para TOTECO nelía hueyi.

Yaya más hueyi ten nochi sequinoc tanahuatiani ipan taltipacti.

3 Nochi ma quihueyichihuaca Toteco, yaya cati hueyi huan temajmati.

San ya nelía tatzejtzeloltic.

4 Toteco yaya se tanahuatijquet cati quipiya nochi chicahualisti,

huan quipactía tetajtolsencahuas xitahuac.

Nochi cati quichihua senquisa cuali.

Yaya quinchihuilijtoc cati xitahuac nochi israelitame.

5 ¡Ma tijhueyitalica TOTECO, yaya toDios,

yaya cati tatzejtzeloltic!

Ma timotancuaquetzaca huan ma timoixtapachoca hasta talchi iicxita,

pampa san yaya tatzejtzeloltic.

6 Quema nopa totajtzitzi Moisés huan Aarón, huan nopa tajtolpanextijquet Samuel,

quitzajtziliyayaj TOTECO para quitajtanise itapalehuil,

yaya quinnanquiliyaya.

7 Toteco quincamanalhui ipan se mixti,

huan inijuanti quichijque nochi cati quiijto icamanal huan itanahuatilhua.

Quena, inijuanti quichijque nochi cati quinilhui ma quichihuaca.

8 Quena, TOTECO, ta titoDios, ta tiquinnanquili.

Ta tieli se Dios cati tiquintapojpolhuía inintajtacolhua masehualme.

Pero nojquiya tiquintatzacuiltía quema quichihuaj tamanti cati amo cuali.

9 Ma tijhueyitalica TOTECO huan ma tijhueyichihuaca.

Ma timoixtapachoca iixpa ipan nopa tepet tatzejtzeloltic cati itoca Sion.