1 TOTECO, na nimitznotza.

Ximoisihuilti techpalehuiqui.

Techtacaquili quema nimotatajtía ica ta.

2 Xijseli nonetatajtilis quej elisquía copali cati quitatíaj moixpa,

huan quema nimomatanana para nimitzhueyimati,

xiquita quej se tacajcahualisti cati nimitzmactilía ica tiotac.

3 TOTECO, techmocuitahui para ma amo nicamanalti quej hueli.

Techpalehui para nimocamatzacuas.

4 Amo techcahuili nijnequis tamanti cati amo cuali.

Amo techcahuili ma niquinpalehui taixpanoca masehualme ica cati quichihuaj.

Ma amo niquixtoca nijcuas nopa cuali tamanti cati quipiyaj.

5 Quema monequi se nechtalnamictis,

xijchihua para cati monejnemiltíaj xitahuac moixpa ma nechtatzacuiltica.

Ya nopa niquitas quej se cuali tamanti cati nechchihuilíaj.

Sinta masehualme cati cuajcualme nechtacahualtise,

elis quej se pajti para na.

Amo techcahuili para nijhuejcamajcahuas ya nopa.

Pero na talojtzitzi nimotatajtía para ma quiselica tatzacuiltili taixpanoca masehualme.

6 Quema nijchihuas para mocuamimilose inintayacancahua ipan tepet,

quicaquise nocamanal huan quipantise para nelcuali.

7 Nopa fiero masehualme quiselise tatzacuiltili huan iniomiyohua quitepehuase ipan campa hueli tali.

8 TOTECO, ta cati titoTeco, na san nimitzchiya para techpalehuis.

Ipan ta nimotemachía para techmocuitahuis.

Amo xiquincahuili ma nechmictica.

9 Techpalehui para amo nimasis ipan nopa taquetzti cati quitalijtoque nopa fiero masehualme.

10 Xijchihua para nopa amo cuajcualme iniselti ma momasiltica ipan nopa taquetzti cati quisencajtoque para sequinoc.

Pero na ma nipano nimajcajtoc huan amo teno ma nopanti.