1 Chicahuac nijtzajtzilis TOTECO huan nijtajtanis ma nechtasojta.

2 Iixpa ya nijpohuilía nochi cati nechtequipacholmaca.

3 Quema eltoc quej nimisahuía ipan taohuijcayot,

huan ayecmo nijmati taya nijchihuas, nijnojnotza.

San ya quimati taya ojti monequi nijtoquilis para nimomanahuis ten nopa taquetzti,

cati quitalijtoque nocualancaitacahua.

Quena, campa hueli quitatijtoque taquetzti ipan noojhui.

4 Nijtachili campa hueli huan niquitac.

Amo aqui moyolilhuía ten na.

Amo aqui quinequi nechpalehuis.

Amo aqui nechmocuitahuía, yon amo aqui quichihuilía cuenta nonemilis.

5 Huajca na nimitztzajtzili, TOTECO, huan nimitzilhui:

“TOTECO, san ipan ta nimotemachía para techmocuitahuis.

San ta hueli techmanahuis para amo teno nopantis.

6 Xijtacaquili cati nimitztajtanía,

pampa tahuel nechtaijyohuiltíaj masehualme.

Techmanahui inimaco cati nechtepotztocatinemij,

pampa inijuanti achi más quipiyaj chicahualisti que na.

7 Techquixti ipan ni tatzacti campa niitztoc para nihuelis nimitztascamatis.

Huan huajca nopa masehualme cati itztoque xitahuaque,

nechyahualose huan paquise pampa tijpiyas hueyi moyolo ica na para nochipa.”