No Libro A Jonas
No Pakatonngan so Paytābwan no Nya Libro
Si Jonas, ki asa propīta a naybibyay do kachimpwaw no kapagāri ni Jeroboam do Israel (2 Āri 14:23-25). Siraw taga Assirya a omyan do ammyānan kan do dayāen no Israel, ki kabōsor da san Israelita saw. Iyaw syodad a Ninebeh, ki sintro no Assirya. Minandaran Āpo Dyos si Jonas a mangay do Ninebeh tan ibahey na dyirad tawotawo saw maynamot do karahet da kan īto danaw karārayaw no syodad da. Ki maynamot ta kabōsor no Israel tawotawo do Assirya, chinaskeh ni Jonas nagtongpal so bilinaw no Dyos. Chinakey naba a myan gondāway dan taga Ninebeh a makadngey so minsāhi, as magbabāwi sa. Ta an parinen da, chapatak ni Jonas a chāsi sa ni Āpo Dyos kan isalākan na sa.
Pinādas ni Jonas a payyayowan si Āpo Dyos, kan naglogan do biray a komwan do Tarsis a machibawa do komwanaw do Ninebeh. Ki pinagbagyo ni Āpo Dyos so mayit do tāw. As do nakatoneng daw syan tripolanti saw a si Jonas nakayapwan no bagyo, intapwak da do tāw. Aran komwan, insalākan ni Āpo Dyos si Jonas do nakapanoboy na so rakoh a among a nanghamon sya, as nakaihwa na sya do aptan.
Sinpangan na, tinongpal ni Jonas si Āpo Dyos do inmandar naw a kangay na do Ninebeh, kan intoroh naw minsāhi no Dyos dyirad tawotawowaw daw. Do nakapagbabāwi dan tawotawo, tinongtong paba no Dyos a rārayawen Ninebeh. Dawa, iyaw libro no Jonas, ki mangipaboya so kasisyen no Dyos do tabo tawotawo, sira aba lang tawotawo no Israel.
No Naychakarwan no Nya Libro
No katawag ni ĀPO di Jonas kan no nakapagsōkir na (1:1-17)
No dasal ni Jonas di ĀPO do irahem no bodek no among (2:1-10)
No minsāhi ni Jonas dyirad tawotawo do Ninebeh (3:1-10)
No kāsi ni ĀPO dyirad tawotawo do Ninebeh (4:1-11)
Jonas
1
No Kapayyayo ni Jonas a Mangkaro di ĀPO
1 Do asa karaw, inpakatoneng ni ĀPO minsāhi na di Jonas* 1:1 2 Ār. 14:25 a pōtot ni Amittay a kāna, 2 “Mangay ka do Ninebeh† 1:2 Gen. 10:11-12. Iyaw Ninebehaya, ki sintro no Syodad no taga Assyria, as siranchiw mangay a mangrārayaw so tana dan Israelita (2 Ār-Āri 18:13), as kan romapit sanchi a mangrārayaw so Syodad a Jerosalem (2 Ār-Āri 19:37; Isa. 37:38). a mabīleg a syodad. Ballaāgan mo saw tawotawo daw a īto danaw kasoli no Dyos dyira, ta chapatak dana sīgod no Dyos makabābabaya a karahet da.” 3 Imbes a magtongpal si Jonas, ki basbāli a nagrobwat a nangay do Ispanya,‡ 1:3 Mana “Tarsis”. ta chakey na dichanan si ĀPO. Ingodes naw minosok do idi a Joppe a nakaboyan na so biray a magrobwat a mangay do Ispanya. Do nakatayoka naw a nagbāyad so plīti na, somnakay do birayaw a nachirayay dyira a kominwan do Ispanya tan payyayowan na si ĀPO.
4 Ki nanoboy si ĀPO so mayit a salawsaw do tāw, as kan napahtot so taywara so kayit a bagyo. Dawa, makey dana maysisyay birayaw. 5 Taywaraw nakamo dan tripolanti saw, as kan katakatayisa dyira, ki nangngēngengey a nagpakpakaāsi so sidong do bōkod na a dyos. Sinpangan na, intapwak daw kadwan saw a karga da tan maypatapaw birayaw. Ki si Jonas, ki myan do makatayrahemaw a ansagan birayaw a naynepdep.
6 Dawriw nakaboyan sya no kapitanaw no birayaw. Pinaydabdab na a kāna, “Āngo ta mapakdoh mo paw makaycheh? Kawanem ka! Maybangon ka daw, as kan maydasal ka pad dyos mwaw, ta arā na yaten a chāsi, as dyi ta madiman.”
7 Do dāwri, binatabata dan tripolanti saw do katakatayisa dyira a kon da, “Magbibinonōtan ta tan mapatakan ta an sino naynamotan no nyaya didigra?” Dawa, nagbinonōtan sa, ki nabōnot ngaran ni Jonas. 8 Dawa, inyahes da di Jonas a kon da, “Ngay, ibahey mo pa dyamen an sino nakayapwan nya a didigra. Āngo chabalay mo dya? Taga dino ka? Āngo nasyon a nakayapwan mo, as kan āngo trībo mo?”
9 Ki initbay ni Jonas a kāna, “Asa 'kwaw a Hebreo kan managdaydāyaw di ĀPO, iyaw Dyos no hanyit a iyaw namarswa so tāw kan iyaw tanaya.” 10 Inbahey na pa dyira a madama na payyayowan si ĀPO.
Do dāwri, siraw tripolanti saw, ki sominryam sa do nakamo da, kan binata da dya, “Ay pakawanem! Marahet abawriw nawri a pinarin mo?” 11 Ki ranan da a mangosisa sya, naypaypāngay paw no bagyowaw. Dawa, inyahes darana di Jonas, “Āngo paro parinen namen dyimo tan mangheteng bagyowaya a mangrārayaw dyaten?”
12 Ki initbay ni Jonas a kāna, “Na! Itapwak nyo na yaken ah, tan magtalnaw bagyowaya, ta chapatak ko a yaken naynamotan nyaya laklak-amen ta.”
13 Ki basbāli a ingodes dan tripolantyaw nangawod tan makapaypayraya sa. Ki alit na kinabaelan daba maynamot ta naypaypataywara paw kelsang. 14 Dawa, do dāwri, nangngēngengey sa nagpakpakaāsi di ĀPO a kon da, “ĀPO, dyi mo pakono yamen a nonolay a madiman an dimanen namen nya tawo a abos gatos. On, dyi mo pakono yamen a pagatosen, ta imom ĀPO makin plāno so tabo, ta iyaw nya bagyo, ki yapo do bōkod mo a pagayatan.” 15 Do dāwri, kinatkat das Jonas, as nakapagtos da sya do tāw, ki nānyeng a nandinak. 16 Do dāwri, oltimo nakāmo da no tripolanti saw di ĀPO. Sinpangan na, nangidāton sa di ĀPO, as insapata da a magsīrbi dana sa dya.
17 Ki nangmandar si ĀPO so rakoh a among§ 1:17 Mat. 12:40 a nanghamon di Jonas. Tatdo a karaw kan tatdo a kahep a minyan si Jonas do bodekaw no nya among.
*1:1 1:1 2 Ār. 14:25
†1:2 1:2 Gen. 10:11-12. Iyaw Ninebehaya, ki sintro no Syodad no taga Assyria, as siranchiw mangay a mangrārayaw so tana dan Israelita (2 Ār-Āri 18:13), as kan romapit sanchi a mangrārayaw so Syodad a Jerosalem (2 Ār-Āri 19:37; Isa. 37:38).
‡1:3 1:3 Mana “Tarsis”.
§1:17 1:17 Mat. 12:40