2
No Kapaydasal ni Jonas di ĀPO
1 Do kayanaw ni Jonas do bodekaw no rakoh a among, naydasal di ĀPO a Dyos a kāna,
2 “Nangakdakdaw ako dyimom ĀPO do kayan kwa nalidyatan,
kan inatbay mo yaken.
Yapod makatayrahem a yanan do ngalab no kadiman, ki nagpaarāyat ako,
as kan nadngey mo yaken.
3 Inpaitapwak mo yaken do hobok no kararahman a tāw.
Siraw rarakoh a allon mo kan āyos mo,
ki pinaned da yaken do kensad no tāw.
4 Iniktokto ko a pinasyay mo na yaken
do salapen mo.
Aran komwan, mirwa akonchi
a maboyaw masantwan a Timplo mo.* 2:4 Mana “kan maboya ko pabanchiw masantwan a Timplo mo”.
5 Tinonep yaken no tāw
kan namonyitan ako no ranom.
Nachidibedibed tametamek no tāw do oho ko.
6 Minned ako a mandad kensad dan tokotokon,
kan akmay nabahod ako do tanaya a nāw ko daw a abos pandan.† 2:6 Mana “do tana a nāw na naitolbek rowangan na saw a abos pandan.” No chakey na batahen, ki do yanan dan nadiman. Chiban nyo 2:2.
Ki iyaw nyaya nakaned ko, ki inawon mo yaken
mo ĀPO a Dyos ko do kadiman ko.
7 Do kapaytiytinawsan danaw no byay ko,
nanakem koymo, mo ĀPO,
as kan nagpakpakaāsi ako dyimo.
Nakarapit nya pakpakaāsi kod masantwan a Timplo mo.
8 As siraw managdaydāyaw dyirad abwayas sinpaspangan a didyosen,
ki sīgod a tinadyichokodan daymo kan iyaw kāsi mo dyira.
9 Ki an yaken, magkansyon akonchi so pagdaydāyaw ko dyimo.
Manoroh akonchi dyimo so dāton ko,
as kan tongpalen konchiw insapata ko dyimo.
Ta kaisalakānan, ki yapo di ĀPO.”
10 Katayokan dasal naw, binilin ni ĀPO rakohaw a among, ki inyota nas Jonas do aptan.