11
Nan Nidugah an Pamhod Apo Dios hinan Holag Israel
1 Ya inalin goh Apo Dios di,
“Nidugah di namhod'un da'yun holag Israel
an nete"ah din penghanah namto'a' ay da'yu.
Ya imbilang'u da'yuh imbabaluy'u,
at hiyanan enekak'u da'yud Egypt.* Mat. 2:15.
2 Mu ad ugwan ya wa ay ta ayagan da'yu ya unyuat goh iyal'allan umadagwin Ha"in.
Ti adiyu idinong an onngan nan Ba'al
ya manghob hi incense hinan udum an bulul.
3 Paddungnay Ha"in di namdon ya nangipadalan ay da'yu,
mu adiyu nomnomnomon an Ha"in di gun nangipapto' ay da'yu,
ya ta"on un nan dogoh ya nelwang ayu.
4 Ma'ma'ullaya' ay da'yu ti nidugah di namhod'u nongkay ay da'yu,
at ipaddung'uy odol'uh nan tagun inaanay pakuh nan bakana ta munluung ta panganona.† Hidin nangekakan Apo Dios hinan Hudyud Egypt ya inaanay nidugah an ligatdan paddungnay madamot an pakudah bagangda, ya hidih nan mapulun ya paddungnay hinalimunana dida an paddungnay inadalday inatdan dimmalan (verse 3), ya pinangana goh didah nan ma"aphod an ma'an, ya dotag, ya ma'inum (Ex. 16:1-17:7).
5 Mu ta"on un umat hinay nangat'u ya gagangayna an nan i'Egypt di pundenolanyu‡ Bahaom nan footnote di Hos. 9:3.
an mi'id di alyonyuan mumbangngad ayun Ha"in.
At hiyanan ad ugwan ya nan i'Assyria di mun'ap'apu ay da'yu.
6 Ti na'uyday buhulyun mangubat ay da'yu ta mun'apa"i nan numbabluyanyu,
at mi'id di mipa'annung hinan do'ol an ninomnomyun aton.
7 Ti ta"on at nundadaan ayu tuwalin man'ug ay Ha"in
ta ihukata' hinan mi'id di abalinanan bulul
at hiyanan ta"on un ayu mumpahmo' ay Ha"in ya adi' da'yu badangan.
8 Mu ta"on un ayu umat hina ya adi ahan mabalin an du'go' da'yu.§ Itudun nan Uldin an mahapul an mapatoy nan mungngohoy an ung'ungngan adi matugun an hay atonda ya unda punggayang hi batu (Deut. 21:18-21), mu mattig an hi Apo Dios ya adina olog an mumpampah nan lala'in imbaluynan hi Ephraim.
Ti adi mabalin an ato' ay da'yu nan na'at hinan i'Admah ya iZeboiim,* Hatun duwan babluy an ad Admah ya ad Zeboiim ya ni'pa"i goh hidin nama"ian Apo Dios ad Sodom ya ad Gomorrah (Deut. 29:23).
ti ta"on hi un nidugah di bungot'un da'yu
mu mi'polloh nan nidugah an pamhod ya homo"un da'yu.
9 Ya ta"on un nidugah di bungot'u nongkay ya adi mabalin an ubaho' da'yun i'Israel.
Ti adia' umat ay da'yun tatagu
ti Ha"in an Dios ya maphod di pangat'u an adi minaynayun di bungot'u.
10 Udum hi algaw ya humapita' an umata' hi layon,
at ta"on un nan imbabaluy'u an wadah nan way alimuhan di algaw
ya donglonda ay di hapit'u ya unudona'.
11 At umat ayu mahkay hi hamutin tumayap an umi'ikay an umanamut
an malpud Egypt ya ad Assyria
ti ibangngad'u da'yuh nan numbabluyanyu tuwali.
Ha"in an Dios di nangalin te.”
Hay Numbaholan Nongkay nan i'Israel ya iJudah
12 Ya inalin Apo Dios di,
“Da'yun i'Israel ya nidugah di layahyu
ti nala'eng ayun bumalbali.
Ya umat goh ay da'yun iJudah an ngohoyona'
an ta"on un ma"aphod ahan di pangat'u.”
*11:1 Mat. 2:15.
†11:4 Hidin nangekakan Apo Dios hinan Hudyud Egypt ya inaanay nidugah an ligatdan paddungnay madamot an pakudah bagangda, ya hidih nan mapulun ya paddungnay hinalimunana dida an paddungnay inadalday inatdan dimmalan (verse 3), ya pinangana goh didah nan ma"aphod an ma'an, ya dotag, ya ma'inum (Ex. 16:1-17:7).
‡11:5 Bahaom nan footnote di Hos. 9:3.
§11:8 Itudun nan Uldin an mahapul an mapatoy nan mungngohoy an ung'ungngan adi matugun an hay atonda ya unda punggayang hi batu (Deut. 21:18-21), mu mattig an hi Apo Dios ya adina olog an mumpampah nan lala'in imbaluynan hi Ephraim.
*11:8 Hatun duwan babluy an ad Admah ya ad Zeboiim ya ni'pa"i goh hidin nama"ian Apo Dios ad Sodom ya ad Gomorrah (Deut. 29:23).