12
1 “At hiyanan mi'id di hulbin nan gunyu aton hi binigat
ti anggay nan patoy ya layah di pun'amlonganyun aton.
Ti mi'yunnudan ayu ihi"ah nan i'Assyria,
ya mi'ligwa ayu goh hinan i'Egypt an buhul di i'Assyria
an gunyu idatan hi lanan di olibo.”
2 Ya inalin goh Apo Dios di,
“Nidugah di adi' namhodan hinan gunyu aton an iJudah ya i'Israel,
at hiyanan moltao' da'yu.
3 Ti ta"on tuwalih din awadan da Jacob an hin'agih putun inada ya ni'pattoy ay aginan hi Esau.* Gen. 25:21-26.
Ya hidi goh hidin a'ungana ya ni'pattoy ay Apo Dios
4 ti ni'yagwit hinan Anghel,
ya nangabak.
Mu hidin angunuhna damdama ya kimmila,
at numpahmo'† Gen. 32:22-32. an numbagah wagah ay Apo Dios.
At ad Bethel‡ Hay pohdonan ibaga ya punhituwan Apo Dios ti hiyah ne lugal hidin ni'dammuwan Jacob ay Apo Dios. Mu nan babluy ad Bethel hidin amatagun Hosea ya hiyah ne gagwan nan lugal hi nundayawan nan i'Israel hinan bululdan ay baka, at numbalin hi punhituwan nan bulul. goh di ni'hapitan Apo Dios ay hiya
5 an inalinay,
Ha"in nan Dios an nidugah di abalinana.§ Gen. 28:12-22; 35:1-15.
6 At hiyanan mumbangngad ayun Ha"in ta Ha"in an Dios di pundenolanyu,
ya an amin di atonyu ya ipattigyuy pamhod ya nahamad an pangat.
7 Ti da'yun mumpungkumildu ya pun'amlonganyun balibaliyan nan i'ibbayu
ti ta"on un nan atonyun mungkilu ya nibahhaw.
8 Ya alyonyu goh udot di,
Immadangyan ami ti mahlu ami,
ya mi'id ahan di mangalih immadangyan amin dumalat di kuluk!
9 Mu Ha"in an hi Apo Dios an nangibaliw ay da'yuh din nihbutanyud Egypt
ya i'innila' an amin di numbaholanyu,
at hiyanan ipiyuy'u da'yuh nan mapulun ta umuy ayu goh mun'al'allung hidi
an umat hinan gunyu aton hinan nagtud an pundayawanyun Ha"in hinan mapulun.* Hiyah ne Behtan di A'ab'abbung (Lev. 23:42-44).
10 Ti uya'ay gun'u ni'hapitan hinan propeta ya nangipattiga' hinan penhod'un ipa'innila ta ibagadan da'yu,
mu gagangaynan agguyyu inunud.
At hiyanan ma'ubah ayu.”
11 Ya ha"in an hi Hosea ya alyo' di,
“Undan bo'on bahol nan gun aton nan i'ibbayud Gilead?† Agguy tu'u inilay na'at hitud Gilead, mu heten lugal di nahhun an na'abak hinan i'Assyria ti na'at hidin 734-732 B.C.
Ya undan waday hulbin nan gunda pumbahbaholan?
Ya undan abuluto' nan baka an gunda e'nong ad Gilgal?‡ Bahaom nan footnote di Hos. 4:15.
Adi'.
At hiyanan mapa"i nan na'allup an pun'onnganda
ta matuputupugdan mepong hinan apayapayaw.
12 Hidin ommod tu'un hi Jacob ya inlayawanah aginan hi Esau§ Limmayaw ay Esau (Gen. 27:41-28:5). ta immuy ad Aram.* Unu ad Syria.
At hidiy nangahawaana,
mu gahin un numpahtul hi kalnilu† Gen. 30:31; 31:41. ta imbo'lanay nangiyahawaanan den babai.‡ Gen. 29:16-30.
13 Mu impapto' damdaman Apo Dios din o'ommod tu'u
ti hidin awadandad Egypt ya hennag Apo Dios han propeta§ Hi Moses.
an nangipangulun dida ta tinaynandah den babluy.
14 Mu ad ugwan ya moltaon da'yun i'Israel ay Apo Dios
an dumalat di nabainanah nan adi maphod an ina'inatyu.”
*12:3 Gen. 25:21-26.
†12:4 Gen. 32:22-32.
‡12:4 Hay pohdonan ibaga ya punhituwan Apo Dios ti hiyah ne lugal hidin ni'dammuwan Jacob ay Apo Dios. Mu nan babluy ad Bethel hidin amatagun Hosea ya hiyah ne gagwan nan lugal hi nundayawan nan i'Israel hinan bululdan ay baka, at numbalin hi punhituwan nan bulul.
§12:5 Gen. 28:12-22; 35:1-15.
*12:9 Hiyah ne Behtan di A'ab'abbung (Lev. 23:42-44).
†12:11 Agguy tu'u inilay na'at hitud Gilead, mu heten lugal di nahhun an na'abak hinan i'Assyria ti na'at hidin 734-732 B.C.
‡12:11 Bahaom nan footnote di Hos. 4:15.
§12:12 Limmayaw ay Esau (Gen. 27:41-28:5).
*12:12 Unu ad Syria.
†12:12 Gen. 30:31; 31:41.
‡12:12 Gen. 29:16-30.
§12:13 Hi Moses.