14
Hay Inalin Hosea hinan I'ibbanan Holag Israel ta Mumbangngaddan Mundayaw ay Apo Dios
1 Ya ha"in an hi Hosea ya alyo' di,
“Da'yun i'ibba' an holag Israel,
hay baholyuy dimmalat hi nungngohoyanyun Apo Dios!
At uggoh mah ta mumbangngad ayuh nan Ap'apu tu'u tuwalin hi Apo Dios
2 ta alyonyun Hiyay,
Aliwam ni' ahan di numbaholanmi,
at abulutom tun pundayawmi.
3 Ti ad ugwan ya nale'nami mahkay an mi'id di abalinan nan i'Assyria
ya nan kabayumin mun'abi'ah an mi'gubat an mangibaliw ay da'mi.
Ya idinongmi goh an dayawon nan gunmi inyamman alyonmih dayawonmi.
At mumpahmo' ami mahkay ay He"a, Apo Dios,
ti inilamin He"a ya anggay di mabalin an hummo' hi tagu.”* Hay ipa"el nan mahmo' an tagu ya nan nguhu ya nan i'Israel an muntutuyu.
Hay Pangaliwan Apo Dios hinan Bahol nan Holag Israel
4 Ya inalin mahkay Apo Dios di,
“Awniat ipaphod'u da'yun holag Israel ti ongol di namhod'un da'yu.
Ya ma'aan mahkay nan bungot'un da'yu.
5 At umata' hi dulnu ay da'yun i'Israel an gun da'yu honngon
ta umat ayuh nan habhabung an mapmaphod.
Ya umat ayu goh hinan ayiw an cedar ad Lebanon an gun lumnod di lamutna,
6 at manaphapang,
ya na'abbanglu.
At nan amaphodyu ya umat hinan ayiw an olibo.
7 At mun'am'amlong ayu mahkay hinan pangipapto"un da'yu,
at umat hi un ayu mun'eblay hinan na'alliduman an puun di ayiw,
ya pumhod di nitaguanyu an umat hinan pimmaguy an nilia'.
Ya umat ayu goh hinan mamyog an greyp,
at mundongol ayun umat hi nundongolan din ma"aphod an ma'inum ad Lebanon.
8 At hiyanan da'yun i'Israel ya idinongyun mundayaw hinan inyamman di tagun dayawonyu
ta way ato' an mambal hi luwaluyu,
ya ta ipapto"u da'yu.
Ti Ha"in di umat hinan maphod an bolbol an alpuwan di ibungayu.”
9 Ya ha"in an hi Hosea ya inali' di,
“Gulat ta nomnomnomon tu'u,
ya ma'awatan tu'u,
ya unudon tu'u daten Tugun Apo Dios an makulug di pangatna
at mibilang tu'uh nanomnoman.
Mu nan nangohoy an tatagu ya adida donglon daten Tuguna,
at hiyanan mun'a'ubahda.”