Joel
Hay Aat Ten Liblu
Hay Nangitudo' eten Liblu: hi Joel.
Hay Nangitud'an Joel eten Liblu: nan Hudyud Judah.
Hay Pohdon nan Ngadan ten Liblun Ibaga: hi Apo Dios ya Dios tuwali.
Hay Gutud hi Nangitud'anan ten Liblu: hidin numbattanan di 814 B.C. hi engganah din 798 B.C.
Hay Teman ten Liblu: umannung an mamolta nan Hudyuh din amatagun Joel an dumalat nan pama"ian nan dudun hinan paguyda, mu iyal'allanan ma'at goh ay didah udum di gutud.
Hay Outline ten Liblu:
Hay IMMANNUNG an dudun ya didana nan tumayap an nama"ih nan babluydah DIN AMATAGUN JOEL (1:1—2:27)
Hay IPADDUNGAN nan dudun ya didana nan titindalun mama"ih nan babluydah UDUM DI GUTUD (2:28—3:21)
Waday ma'at hinan ngilin di Hudyu an Pentecost (2:28-29)
Waday ma'at hinan Punligatan di Tatagu (2:30—3:8)
Waday ma'at hinan Hinlibuy Tawon (3:9-21).
1
1 Hiyah te hinapit Apo Dios an impa'innilanan ha"in an hi Joel* Hay pohdonan ibaga ya hi Apo Dios ya Dios tuwali. an hina' Pethuel.
Hay Niho'napan nan Do'ol an Dudun
2 Ya inali' di,
“Da'yun mumpumpangipangpangulu ya an amin tu'un nunhitud Judah
ya ihamad tu'un mundongol ti mi'id ah na'at hi umat eten alyo' ay ditu'u
ya ta"on un hidin o'ommod tu'uh umat eten na'at ay ditu'ud ugwan!
3 At mahapul an ulgudon tu'uh nan imbabaluy tu'u
ta ibaag tu'un dida hatun na'at ta ibaagda goh hinan imbabaluyda,
ya minaynayun an ma'ulgu'ulgud hinan holagdah pidwa.
4 Ti nidugah an nahonhonod di immalih nan do'ol ahan an dudun,
at gunda hino'napan ya nun'a'an nan inhabal tu'u.
Ya nan inangang nan nahhun an dudun ya nun'a'an nan nehnod an dudun.
5 At da'yun ma'abbutong ya ihi'alyu ta kilaanyu nan nun'apa"i an intanomyun greyp
ti mi'id mahkay di iyammayuh bayah!
6 Ti hadi din dudun ya nipaddungdah nan do'ol an titindalun di buhul an numpama"ih tun numbabluyan tu'u.
Nipaddungda goh hinan layon an mun'atadom di babada,
7 at nun'a'anday greyp tu'u,
ya nun'a'anda nan gudah nan bungbungaan an fig an ayiw,
at mun'attig an ahipapaha' ta engganah nan hapangda.
8 Oltonyun mun'ebel an umat hinan aton nan babain balahang
an mangebel hinan natoy an iyahawana.
9 Ya ta"on un da'yun papadin munhulbin Apo Dios ya umebel ayu goh
ti mi'id di Onong an Ma'an ya Onong an Ma'inum hi me'nong hinan Timplu.† Manu ay mi'id e'nongdan Apo Dios ti pina"in nan dudun nan nitanom.
10 Ti nun'apa"i nongkay din nitanom,
at mi'id di mephod hi alena, ya ma'inum, ya lana,‡ Dumalat nan batel hidi.
11 at hiyanan munlungdaya tu'u nongkay an numpuntanom
ti nun'apa"in amin din intanom tu'un wheat ya barle.
12 Ya nun'a'leng nan greyp ya nan fig an ayiw,
ya umat goh hinan pomegranate, ya nan palma, ya nan apple,
ya an amin nan a'ayi'ayiw hinan punhabalan.
At mi'id mahkay di amlong nan tatagu!”
Hay Ama'ahhapul di Puntutuyuan
13 Ya inali' goh di,
“At da'yun papadin ad tamuh nan me'nong ya munlubung ayuh langgut,
ya immuy ayuh nan Timplu ta munlungdaya ayu an ilablabiyun kumila
ti mi'id mahkay di alena ya ma'inum an e'nongyuh di.
14 Ya ipa'ayag tu'un amin nan tatagun ta"on un nan a'ap'apu ta ma'amung tu'uh nan Timplu,
ya munlangdu tu'un mumpahmo' ay Apu tu'un Dios.
15 Ti magadyuh an madatngan nan algaw an punhumalyaan Apo Dios an nidugah di abalinana§ Unu Shaddai an ohan ngadan Apo Dios hinan hapit di Hudyu. ta moltaon ditu'u,
ya henen a'atana ya atata'ot ahan!
16 Ya mi'id di abalinan tu'u ti hiyah ne tuwaliy ma'at an mapa"i nan inhabal tu'u,
at mi'id mahkay di iyuy tu'uh nan Timpluh pi'yam'amlongan tu'uh di!
17 Ya umat goh an mun'amaganan nan punhabalan tu'u,
at adi tummol di itanom tu'u,
at mun'abukawan ya mun'apa"i nan alang tu'u.
18 Ya nan abakabaka ya humanagwanganda,
ya umali'alida ti mi'id di ononda,
ya umat goh hinan kalnilu.
19 Apo Dios, mumpahpahmo'a' an mumpabadang ay He"a
ti ten mi'id ah pumpahtulanmi
an ten nun'alyaw nan holo' ya ayiw an ay genhob di apuy!
20 Ya ta"on nan a'animal hi inalahan ya paddungnay mumpahpahmo'da goh ay He"a
ti nun'atdu' nan giginginnaw,
at mun'a'leng di holo'.”