14
1 Ya intuluy Job an himmapit an inalinay,
“Numpapaddung an hehe'he'dod ya maguguluy aat di pi'taguan an amin nan tatagun
2 umat hinan humangaw an habhabung an maphod di tigawna,
mu un na'amtang ya nalyaw,
ya umatda goh hinan ngau an ag'aga ya na'ubah.
3 Un ammunah umatan di taguh na ya hinahalepatam ta way humalyaom?
4 Mi'id ahan ah ohah agguy nabaholan hi tatagu,
at undan way tagun mi'id ah pahalna?
5 Nan pi'taguanmih tun luta ya na'i'innilan nahnot,
ya nan uyap di algaw ya nalpah an lempongmuy agtudanan adi malumluman.
6 At hay maphod ya adim titiggon ta okod ami
ta mi'id al'alin da'mih na'amtang hinan pangelpahanmih nan naligat an tamumih tun luta.
7 Gulat ta malngoh nan ayiw ya mabalin an humalepeng,
ya himmapang,
ya gun tumubu,
ya immongol.
8 Ya ta"on un nadunut di tungodnah nan luta
9 mu adya waday danum an ta"on hi un pa"itang hi manebna
at humalepeng an umat hinan pa'attubun nitanom.
10 Mu adi umat hinay tagu
ti wa ay ta natoy ya hiyah ne apogpogan di nitaguana,
at ma'aliwan
11 an umat hinan danum hi lobong an matdu',
unu umat hinan wangwang an namaganan.
12 Nan matoy an tagu ya adida ahan tumagu,
ya ta"on un mapogpog ad abuniyan ya adida damdama tumagu.
13 Mu ha"in ay, Apo Dios, ya on'onaynah unna' matoy ta ipo"oya' ni' ay He"ah nan lubu'
ta mihinaa' hidi ta engganay ma'aan nan bungotmu!
Mu adia' ni' aliwan ta idadaanmuy gutud di pamaliwam ay ha"in.
14 Ya gulat ta matoy nan tagu ya undan goh mumbangngad ta tumagu?
Mu ha"in ya heten algaw an punligligata'
ya waday halimido' hi pumhoda' hi duminngan tun ligat'u.
15 Ya wa ay ta ayagana' ay He"a ya tabolo',
ya umamlong'an ha"in an limmum.
16 Ya wa ay ta ma'at hene ya ihamhamadmun manalimun ay ha"in,
mu adim ni' gun uyapon hay way pumbahola'.
17 Ya aliwam nan bahol'un paddungnay itapalmu,
ya paddungnay pumpu'naham an amin nan nun'appuhin inat'u.
18 Mu waday gutud di pun'egdayan nan duntug,
at mun'apulig di o"ongol an batu.
19 Nan mabi'ah an datong hinan ginnaw ya pun'iyanudna nan batu,
ya numbulubulna nan luta.
Ya umat hinay atom an mama"ih hehemlon di tataguh tun luta.
20 He"a ya abakom dida,
ya pumbalinom an maluman di tigawda ti matoyda,
ya impiyuymu didah nan wadan di ihinandah enggana.
21 Ya gulat ta mipabagtu nan imbabaluyda ya adida innilaon,
ya gulat goh ta mipa'ampada ya adida tigon
22 ta ammuna nan dogoh di odolday le'le'naonda,
ya nan punlungdayaanday hihi'alonda.”