13
1 Ya intuluy Job an himmapit an inalinay,
“Ha"in ya hinamad'un tinnig an amin hana,
ya dengngol'un amin nan inalim,
ya na'awata' di aatna.
2 Ya adim alyon hi un'a nala'la'eng ya un ha"in
ti an amin hanan inilam ya i'innila' goh.
3 At hay pohdo' hi pi'hapita' ya hi Apo Dios an na'abbagbagtu an bo'on da'yu,
ta way ato' an mangipa'innilan Hiya an mi'id di anappuhi'.
4 Ya unna' ahan inlayalayahan ay da'yu
an umat ayuh nan duktul an mi'id di ipa'adaogna.* Hiyah ne umatan an amin di nappuhin lelehyon ya kulto an wah tun luta.
5 At hay maphod hi atonyu ya un ayu didindinong
ta olom man ya waday munnomnom an mangalih nala'eng ayu!
6 Unyu donglon nan ibaga',
ya pa'innilaonyuy umatan tun hapito'.
7 Undan hay nappuhi ya layah di hapitonyuh pangihtiguyun Apo Dios?
8 Undan da'yuy way biyangnan mangihtiguh aat di amaphodan Apo Dios,
ya undan da'yuy huwisnah nan punhumalyaan?
9 Undan makulug an mi'id ah mattig Apo Dios hi nappuhin aatyu?
Undan alyonyuy un mabalin an ilayahanyuh Apo Dios
an umat hinan pangilayahanyuh nan tatagu?
10 Ta"on hi unyu ipo"oy nan atonyun mangipangngel hi pangihtiguyuh aat Apo Dios
mu abohlan da'yu damdama.
11 Ya undan adi da'yu ipata'ot hinan nidugah an ana'abbagbagtuna,
ya undan adi da'yu ipa'ogyat hinan ta'otyun Hiya?
12 Nan panapityu an nipa"el ya mi'id di ibadangna
an umat hi dapul an umalihbu' ya na'ubah,
ya umat goh hi hapiaw an pananggayu an un hay uklit di niyamma.
13 At duminong'a ta okoda' an mi'hapit
ta nangamung di ma'at ay ha"in.
14 Ha"in ya adia' tuma'ot,
at okoda' an ta"on hi un way ma'at ay ha"in.
15 Ya ta"on hi unna' patayon ay Apo Dios ya Hiya damdamay kulugo',
ya ta"on un'u adi namnamaon an badangana'
mu hapito' damdama nan ilili' ay Hiya.
16 At olom man ya hiyay dumalat hi abaliwa' ti inila' an mi'id di bahol'u,
ya adi ahan mabalin nan nabaholan hi mi'haggangan ay Apo Dios.
17 At ihamadyun donglon nan hapito' ta innilaonyuy alyo':
18 Ha"in ya indadaan'uy aat nan idiklamu'
ti manu ay ya inila' an mi'id di numbahola',
at mabaliwana'.
19 Wada mah di mabalin an mi'hannun ha"in an dumalat ete?
Gulat ta waday ma'ah'upanyuh panginnilaan hi nibahhawa'
mu ta"on ya unna' didindinong hi engganah unna' matoy.
20 Un duwa ya anggay di mahapul hi ibaga' ay He"an Dios'uh adim aton ay ha"in,
ya gulat ta tabolom at adia' mipo"oy ay He"a:
21 Idinongmu ni' nan pummoltaam ay ha"in,
ya ipogpogmu ni' nan pana'ta'atotmun ha"in.
22 At humapit'an ha"in ta tabolo',
unu ha"in di humapit ta tabolom!
23 Undan atnay inat'uh nibahhaw hi numbahola'?
Ipa'innilam ay ha"in nan bahol'u!
24 Anaad ahan ta adi'a mipattig ay ha"in
an imbilanga' ay He"ah buhulmu?
25 Ya anaad ta ta'ta'tona' an ten mi'id di hulbi' an umata' hinan paya' an nalyaw an punggilitam,
ya umata' goh hi dugi an mun'iyaddib an pudugom?
26 Nidugah nan ipabaholmun ha"in
an ta"on nan numbahola' hidin nete"ah a'ung'ungnga.
27 Paddungnay unmu hinawid di hu'i',
ya inhamadmun titinnig an amin di umaya',
ya ta"on nan gopa'o' ya inun'unudmu ti minalkaam di dapan'u.
28 At hay aatna mah ya unna' mun'ulay an matoy an umat hinan nadunut an ayiw,
ya umata' goh hinan lubung an nun'im'iman di la'oy.”