22
Hay Pitlun di Himmapitan Eliphaz ay Job
1 Tembal Eliphaz an iTeman an inalinay,
2 “Undan nan tagu ya waday punhulbianan Apo Dios?
Ta"on nan nala'eng an tagu ya un hay odolnay punhulbiana ya anggay!
3 Ya undan mipa'anlah Apo Dios hinan pangatam hi nahamad?
Undan way pulimyunah un'a adi mumbahol?
4 Undan nan anahamadmuy
dumalat hi panugunanan he"a ya panumalyaanan he"a?
5 Bo'on ahan, ti nan nappuhin ato'atom,
at nan numbaholam an adi mapogpog di dumalat!
6 Ti impa'utangam nan i'ibbam hi pihhu,
mu mahapul an waday pamatangda.
Ya adida ay pa'abbayad hidin pihhun inutangda
ya adim ibangngad din namatangda,
at nangiw'iwadyada an mi'id di ilubungda.
7 He"a ya agguymu indat di inumon din na'uwaw,
ya agguymu pinangan din nun'ahinaangan.
8 Ta"on hi un'a nidugah an adangyan,
ya me'gonan'a,
ya ongol di abalinam,
9 mu agguymu binadangan din nun'abalun u'umutun,
ya penlohmuy gina'un din nguhu,
ya pinaligatmu dida.
10 At hiyay dimmalat hi nawadaan nan paddungnay bitun nale'woh ay he"a,
at hiyaat un himbumaggay timma'tam
11 an paddungnay un'a wadah nan helong,
ya ay'a nahe'nob hinan lobong.
12 Undan bo'on ad abuniyan an na'abbagbagtuy wadan Apo Dios?
Ya unna dan adi uh'uhdungan nan bittuan?
13 Mu hay pambalmu ya alyom di,
Hay aton Apo Dios an mannig hinan ato'ato'?
Hay atonan munhumalyah un nahahanian hinan ma'ugtul an bunut?
14 Hay punnomnommu ya un adi tigon Apo Dios
ti nali'dupan hinan ma'ugtul an bunut
ti Hiya ya wah dih nan ata'nang ad abuniyan
an hidi ya anggay di dumanaldallanana.
15 Unmu dan inaynayun an mangat hinan nun'appuhi
an umat hidin ina'inat din tataguh penghanan nun'abaholan?
16 Ti agguy nadatngan di gutud di atayanda,
mu ay nun'iyanud din datong ay dida,
at nun'a'ubahdan amin.
17 Ya inalidan Apo Dios di,
Taynan da'mi ta okod ami!
Hay ngadan di aton nan Nidugah di Abalinanan ditu'u?
Hiyah ne inalida
18 an ta"on un hi Apo Dios di numpangidat hinan do'ol an mahapulda!
Mu tagwan an mi'id di inila' hi umatan di punnomnoman nan nun'abaholan.
19 Mu nan nahamad an mi'id di baholda ya umamlongdah
unda tigon di amoltaan nan nun'abaholan hi a'ubahanda.
20 Ya alyonday,
Immannung an nan buhul tu'u ya nun'a'ubahda,
ya din na'angang an agguy napa"in gina'uda ya noghob an amin!
21 At he"a, Job, ya mahapul an mi'pohhodan'a ay Apo Dios,
ya indinongmun mi'bohhol ay Hiya.
At gulat ta atom at wagahan da'a,
ya waday pumhodam hi udum di algaw.
22 At abulutom nan ituguna ya an amin nan hapitona,
ya italeponmuh nomnommu ta adim aliwan.
23 Ya gulat ta bangngadom hi Apo Dios ta du'gom nan nun'appuhin pumbaholan
at halimunan da'an Hiya,
ya an amin di ma'at ay he"a ya pumhod.
24 At mahapul an bo'on hay pihhuy pa'anhanom hi am'amon,
ya nun'iwidwidmu nan balitu'mun nalpud Ophir
25 ta nan Nidugah di Abalinanay ibilangmuh inadangyanmu,
ya Hiyay na'ahhamad hi silvermu.
26 At ipa'amlong da'ah nan Nidugah di Abalinana,
ya mabalin mahkay an tangadom hi Apo Dios.
27 At wa ay ta munluwalu'an Hiya ya donglonay ibagam,
ya inatna,
at mahapul an ipa'annungmu din inhapatam ay Hiya.
28 At an amin nan nomnomom hi atom ya madadawoh an ma'at,
ya an amin di umayam ya mahalimunan'a
an paddungnay waday dilag an mangipangpangulun he"a.
29 Ya gulat ta waday tagun mi'id ah namnamana
ta wa ay ta mumpabadang ay Apo Dios
at immannung an mabadangan.
30 Ya ta"on nan nabaholan an tagu ya baliwana
ti dumalat nan nahamad an aatmu.”