21
Hay Nambal Job ay Zophar
1 Ya tembal Job an inalinay,
2 “Gulat ta pohdom an umal'alu' at mahapul donglom tun hapito'.
3 Anuham ni' ta humapita' ta engganah un'u lopahon
ya unmu goh ete"an mamahipahiw ay ha"in!
4 Undan nan tataguy punlilia' an un hi Apo Dios?
Ti manu ay ya un waday dimmalat an adi' abalinan an ma'anuhan.
5 Un adya tigonyuy aat'u at manoh'a ayu,
ya umogyat ayu,
at upuponyuy timidyu.
6 Ya wa ay ta nomnomo' di aat nan na'at ay ha"in
ya nidugah di ta'ot'un wumogwoga'.
7 Mu anaad ta nan tatagun nun'appuhiy ato'atonda ya mi'taguda ta engganay unda mun'ala'ay,
ya gun ma'udman di inadangyanda?
8 Ya tigonda nan imbabaluydan mun'ahlag,
ya tigonda goh nan a'ap'apudan mumpanga'ilog.
9 Ya mi'id di al'alih nan numpunhituwanda,
ya mi'id di tuma'tanda ti adi idat Apo Dios di ligatda.
10 Nan manilhig an bakada ya maphod di pangundulda,
ya nan obay an bakada ya mi'id al'alih nan a'lumanda.
11 Ya tuminnagtag an umanay'ayam nan imbabaluyda
an umat hinan uyaw an kalnilu.
12 Ya gunda mungkantan iyunnuddah nan tukal di tambourine ya alpa,
ya umamlongdah nan ipagangohdan tungngali.
13 Ya maphod di nitaguanda ti adangyandah tun ataguda,
ya umat goh hinan atayandan mi'id ligatda ya natoyda.
14 Ti alyondan Apo Dios di,
Adi da'mi halimunan ta okod ami!
Da'mi ya adimi pohdon an innilaon nan pohdom hi ma'at hinan nitaguanmi!
15 Undan hay aat nen Dios ta mahapul an itamuanmi Hiya?
Undan way lagbumih un ami munluwalun Hiya?
16 Inaliday un nan immadangyananda ya hay nalpuh nan intamuanda,
mu henen aat di punnomnomanda ya hay inila' ya nahihinnu ahan.
17 Anaad mah ta adi moltaon Apo Dios dida?
Ya uya'a mah ta agguyda nunligat?
Ya gulat goh ta ipa'alin Apo Dios di ligat an dumalat nan bungotna ya adina ilagat dida.
18 Ya anaad mah ta adina moltaon dida
an umat hi aton nan mabi'ah an tuyup hinan dagamin pun'iyaddibna?
Adina!
19 Ya inalim un moltaon Apo Dios nan ung'ungungngan dumalat nan numbaholan amana,
mu anaad ta bo'on at goh nan numbahol di moltaona ta way atonan manginnilah aat di numbaholana?
20 Maphod hi un holtapon nan gun mumbahol di moltada
ta male'naday aat di bungot Apo Dios an nidugah di abalinana!
21 Ti gulat ta malpah an matoyda
at undan mabalin an nomnomonay un way ma'at hinan imbabaluyna?
22 Undan way abalinan di tagun mangitudun Apo Dios?
Mi'id!
Ti hi Apo Dios di munhumalyah nan tatagun ta"on hi un nan na'abbagbagtuy haadna.
23 Nan udumnan tatagu ya mi'id di al'alih ma'at ay didah engganah atayanda,
24 ya mun'am'amlongda ti wadan amin di mahapuldah nitaguanda,
at umamlo'amlongdah engganay atayanda.
25 Ya nan udumnan tatagu ya nun'awotwotda
an unda ago'agogohgoh ta engganay unda matoy.
26 Mu waday apogpogan tu'un amin ti mun'atoy tu'u ya nun'ilubu' tu'u,
ya numpapaddung an pun'a'an ditu'un amin hi begeh.
27 Inila' di nappuhin wah nan nomnommu an pamihulmun ha"in
28 ti hay ibagam ya alyom di,
Undan mamolta nan adangyan an tagun hay nappuhiy ato'atona?
29 Mu gulat ta baganyu nan numbaat
at ibaagday makulug hi aatna
30 an nan tatagun nappuhiy gunda aton di maliblih nan gutud di bumungtan
Apo Dios hi pummoltaanan amin hi tatagu.
31 Ya mi'id di mamahiw hinan numbaholanda,
ya mi'id di mummoltan dida.
32 Ya wa ay ta iyuyda ilubu' hinan ilubu'ana an ma'a'adugan
33 ya nidugah an do'ol di mitnud an umuy munlabun,
ya do'ol di mange'gon hinan natoy an ul'ulodyondan ipali'uh hinan luta,
ya inul'ullayda goh an gabunan.
34 At hay atom an mangal'alu' ay ha"in hinan mi'id hulbinan panapitmu?
An amin din nambalmun ha"in ya mi'id ah maphod ti un layah an amin!”