20
Hay Miyadwah Hinapit Zophar
1 Hi Zophar an nalpud Naamah ya tembalnan inalinay,
2 “Ten un maguguluy punnomnoma',
ya ten adia' pa"edpol hi aat nan nanapitmu,
at mahapul an tabolo' he"a!
3 Nan hinapitmu ya umipapahal ay ha"in,
mu inila' di pambal'u.
4 Undan agguymu inilan hidin penghana ya hay taguy nahhun hi nihinah tun luta
5 ya adi madnoy di pangabakan hinan nappuhiy pangatna?
Ya un na'amtang di umamlongan nan mi'id di dayawonda.
6 Ya ta"on un umatam ad abuniyan di pumpahiyaana
ya mitu'dud hinan bunut di uluna
7 mu ma'ubah hiyah enggana damdaman umat hinan analugitna an umuyna ipo"oy.
At din nangin'innilan hiya ya alyonday,
Hay immayana nin?
8 At ma'ubah an umat hinan enap hi mahdom an ma'utaw,
at mi'id an adi mahkay tigon hi enggana.
9 At din liligwana ya nan pamilyana ya adida ahan ipidwan tigon hiya,
ya ta"on un din lugal an nunhituwana ya mi'id goh mattig ay hiyah di.
10 At nan imbabaluyna ya mahapul an diday mangibangngad hinan way innalnah nan nun'awotwot,
ya ta"on hi un hiya ya mahapul goh an bayadanan dida.
11 Hidin a'ungana ya mabi'ah di odolna,
mu hi awniat mumbalin hi hupu'.
12 Nan nun'appuhi ya paddungnay munlameeh di panaphapitna
ti ipo"oynah nan inogban nan dilana.
13 Ya adina abalinan an ibula an unnaat goh iya'amel ti pohdonay tamtamna.
14 Mu nan inana ya pumait hi putuna
an ay bininun di ulog hi odolna.
15 Ya nan inadangyanan nalpuh akaw ya ad ugwan ya paddungnay utaona
ti ta"on hi un wah putuna mu ipa'utan Apo Dios damdama.
16 Umat hi habidung di nun'u'muna
an ay habidung di ulog an pumatoy.
17 At nan adi mahkay tumagu ya adina pun'am'amlongan nan do'ol an idat Apo Dios
an umat hi lanan di olibo, ya gatas, ya danum di alig.
18 At nan intamuana ya mi'id di gunuhana
ti nan nunla'ula'uana ya adina hiya ipa'amlong.
19 Ti manu ay ya unna hiniwihiwitan ya linayalayahan nan nun'awotwot,
ya penlohna nan abung an inyamman di udumna.
20 Ya ta"on un hiya ya pimmunghapunghan mu adi damdama mahengla,
at hiyanan an amin din innalnan pohdona ya mi'id ahan inangangda.
21 Ya mi'id ahan ah na'angang ti innaldan amin,
at napogpog di inadangyana.
22 Ti hidin immadangyanana ya nawaday ligatna,
at napa"in amin,
at nun'a'ubah din inadangyana.
23 Ya hidin inanan amin din pohdona ta na"abhug
ya un moltaon Apo Dios hiyah nan nidugah an bungotna.
24 Ya ta"on un melwang nan hanggap ay hiya
mu nan gambang an panay me'nan hiya.
25 At munhawang nan panah odolna,
ya nan tulid di panan umela'elat ya nunhawang hi akbuna,
at nidugah di ta'otna!
26 Ya din mun'aphod an gina'una ya ubahon nan helong,
ya nan nidugah an gimmagaban apuy di manghob ay hiya,
at mumpe'yeghob an amin din gina'unan na'angang hinan abungna
27 ta nan wad abuniyan ya wah tun lutay mangipanuh an henen tagu ya numbahol.
28 Ya an amin nan wah abungnan inadangyana
ya mun'apa"i eden algaw an bumungtan Apo Dios an ay mabi'ah an datong.
29 At hiyah ne ma'at hinan numbahol
ti hiyah ne indadaan Apo Dios hi lagbuda.”