23
Hay Nambal Job ay Eliphaz
1 Ya tembal Job an inalinay,
2 “Ta"on un ad ugwan ya nidugdugah di punlilia',
ya gun ma'udman di ligat'u an ta"on hi un nidugah di dogoh tun holtapo'.
3 Ya gulat nin hi un'u inilay wadan Apo Dios
at umuya' hinan wadan di inumbunana ta mi'hapita' ay Hiya
4 ta ipa'innila' nan aat di punligligata',
ya ta pun'ibaga' ay Hiyay aat di umatan di ato' hi nitagua',
5 ya ta donglo' di pambalna,
ya hinamad'un innilaon nan alyonan ha"in.
6 Undan adina ahan donglon di alyo' ay Hiya
an dumalat nan nidugah an abalinana?
Adi ahan umat hina ti Hiya ya donglonay hapito'!
7 Ha"in ya mi'id ah inat'uh nappuhi,
at mabalin an mi'hapita' ay Hiya,
at ibaagnan ha"in an alyonay liblia' an mi'id ah bahol'u.
8 Mu agguy'u inilay awadan Apo Dios!
Ta"on hi ngadan di umuy'u panganapan ay Hiya ya mi'id di ah'upa'.
9 Ti manu ay ya inila' an wadah Apo Dios,
mu unna' adi pa"ah'up ay Hiya ti mi'id hidi.
10 Mu hi Apo Dios ya inilanan amin di aat'u,
at inilanay umaya' ya nan ato'.
Ya wa ay ta padahona' an hamadon at umata' hinan nahamad an balitu' an natanag hi apuy,
at Hiya ya ibaagnan mi'id ah bahol'u.
11 Nan intugun Apo Dios di gun'u aton an miyunnud hinan pohdona,
ya Hiyay inunud'uh enggana
ti agguy'u ahan din'ug.
12 Ya agguy'u goh binataanan nan immandalna
ti nan hinapitna ya intalepon'uh nomnom'un paddungnay nahamad an banoh'u.
13 Mu hi Apo Dios ya adi malumluman di aatna,
ya mi'id ah ohah way abalinanan mangipawah nan pohdonah ma'at.
14 At ipa'annungna nan ninomnomnan ma'at ay ha"in,
ya do'ol di planunan nitalepon.
15 At hiyaat unna' wumogwog hi ta'ot'uh nan wadan di hinagangna,
ya wa ay ta nomnomo' an amin hanan aatna ya Hiyay ita'ot'u.
16 Hi Apo Dios di nangipa'unay hi nomnom'u,
ya nan nidugah an abalinanay nangipata'ot ay ha"in.
17 Hay tuma'ta' ya hi Apo Dios ya bo'on nan helong
an ta"on hi un pa'ahhelong an mi'id ahan ah mattig.”