5
Okfu anụ Nchileke
t'ọ phụa imiko
1 Byiko Ojejoje;
nyatanụ iphe meru ayi.
Lenua ẹnya;
phụ iphe-iphere, ayi eje.
2 Òkè-iphe ayi; bẹ lakọtawaru
ndu laru alala l'ẹka.
Ufu ayi bụkotawa kẹ ndu mba ọdo.
3 Nna ayi phẹ; b'e ndu ọhogu gbukotawaru;
nne ayi phẹ awụshiru;
bụru ndu mma tụfushiru.
4 Mini, ayi angụ; bẹ ayi azụ azụzuu.
Ẹge ono bẹ tẹmanu ayi
eshia iphe lẹ nku;
ayi azụa ya azụzu.
5 Ndu ishi ayi dzọpyabekwaru ayi ichirukfu.
Ike gvụakwaru ayi
Ẹphe te ekwe haa ayi t'ayi tụta ume.
6 Ayi wowaru onwayi ye l'ẹka
ndu Íjiputu;
woru onwayi ye l'ẹka ndu Asiriya;
ẹge ee-shi t'ayi phụa nri; ria.
7 Nna ayi phẹ meru ẹjo iphe; nwụshihu.
Nta-a bẹ ayi ala ụla iphe ẹphe meru.
8 Ndu ohu achịwa ayi;
ọphu ọ dụdu onye
a-dzọfuta ayi l'ẹka ẹphe.
9 Ayi alọje ishi ayi alọlo;
tẹmanu ayi aphụa nri,
ayi e-ri;
kẹle mgburuma nọ l'echi-ẹgu.
10 Akpọ gbanwuhuru ayi ọku;
l'ọ bụ ovovo-ọku
lẹ k'ẹjo-ẹgu ono, emenu ono.
11 Ụnwanyi b'e mewaru
ẹjo iphe lẹ Ugvu Záyọnu.
Ọ kwaphu ẹge ono;
b'e gudetsuaru ụnwu-mgbọko
k'ẹhuka lẹ mkpụkpu, nọtsua lẹ Júda.
12 Ndu ishi ayi; bẹ ẹphe
swị-gbushiru.
Ndu bụ ọgurenya;
b'ẹ te eyeheduru ugvu.
13 Ụnwu-okorọbya;
b'e guderu l'ike t'ẹphe gude
mkpuma l'akwọ iphe.
Ụnwegirima unwoke
angatsụa anganga lẹ nkụ, e boru ẹphe.
14 Ndu bụ ọgurenya;
shiwaa l'obu-edukfu wụkahu.
Ụnwu-okorọbya ahawa
egvu, ẹphe agụje.
15 Ẹhu ta atsọhedu ayi ẹna.
Egvu, ayi shi eteje
ghọwaru ayi nggụmaphu.
16 Okpu-eze, ayi kpu dafụwaru.
Nshọo ayi; kẹ l'ayi mewaru ẹjo iphe!
17 Ọ bụ iya kparu iphe meji tọfuru ayi;
bụru iya kparu; ẹnya ayi
eletsuwa ẹruru-ẹruru;
18 kẹle Ugvu Záyọnu;
bẹ ẹgbara kfụwaru;
nkụta-ọswa anọdu iya l'akpa ụri.
19 Ọ bụ nggụbe Ojejoje achị;
yọ bụru nggu a-chị;
gbururu jeye lẹ gbururu.
Aba-eze ngu a-nọ tsube
l'ọgbo sweru l'ọgbo.
20 ?Bụ ngụnu meru iphe
ị zaharu ayi.
?Bụ ngụnu meru iphe
ị gharu ayi azụ ụlori ẹge-a?
21 Wophutanụ ayi azụ l'ẹke,
ị nọ; byiko Ojejoje;
k'ọphu ayi a-lakfuta ngu ọdo.
Menua t'iphe, dụru ayi
lẹ mma ẹge o shi dụhawa l'oge ọhazu.
22 ?Tị swịwaru ẹka;
swịa ọkpa l'ẹke ayi nọ?
Wenua pashia; byiko.

© 2014 WBT