5
Ni tal u Xhun uvaꞌ kam ixoꞌnil u Tiixh
1 As abꞌil uvaꞌ ni niman uvaꞌ aꞌ u Jesús u Cristo, as aꞌeꞌ uvaꞌ meꞌal ikꞌaol u Tiixheꞌ. As abꞌil uvaꞌ xoꞌn veꞌt u Tiixheꞌ ste, as aꞌeꞌ uvaꞌ xoꞌn veꞌt unqꞌa meꞌal ikꞌaol u Tiixheꞌ ste unpajte.
2 As oꞌ uvaꞌ oꞌ meꞌal ikꞌaol u Tiixheꞌ, as ootzimal sqaꞌn uvaꞌ xoꞌn veꞌt unqꞌa qitzꞌin qatzikeꞌ sqe, tan tiꞌ uvaꞌ xoꞌn u Tiixheꞌ sqe. As nu kunima veꞌteꞌ kam uvaꞌ ni tal vitzaqꞌit Aakeꞌ.
3 As aꞌ nu kukꞌuchkateꞌ uvaꞌ xoꞌn veꞌt u Tiixheꞌ sqe, tiꞌ uvaꞌ nu kunima kam uvaꞌ ni tal vitzaqꞌit Aakeꞌ. As jit kuxh kꞌaxkꞌo kunimataꞌ,
4 tan jankꞌal oꞌ uvaꞌ oꞌ meꞌal ikꞌaol u Tiixheꞌ, as ni qolebꞌeꞌ tiꞌ teesal iqꞌii u vaꞌlexheꞌ vatz u txꞌavaꞌeꞌ tan tiꞌ uvaꞌ kꞌujleꞌl kukꞌuꞌl tiꞌ u Jesús.
5 As yeꞌxhebꞌil ni tolebꞌ tiꞌ teesal iqꞌii u vaꞌlexheꞌ vatz u txꞌavaꞌeꞌ. Pet taꞌn kuxh oꞌeꞌ ni qolebꞌeꞌ, jankꞌal oꞌ uvaꞌ nu kunima uvaꞌ iKꞌaol u Tiixheꞌ u Jesús.
Niyolon u Tiixhla Espíritueꞌ tiꞌ u Jesús
6 As aꞌ u Jesucristoeꞌ uvaꞌ kat uli uvaꞌ la kuꞌ xeꞌ u aꞌeꞌ, as uvaꞌ la el vikajaleꞌ sqiꞌ. As jit kuxh tiꞌ ikuꞌ u Jesús xeꞌ u aꞌeꞌ kat ulkat. Pet tiꞌ uvaꞌ la el vikajal Aakeꞌ vatz u kuruseꞌ sqiꞌ. As u Tiixhla Espíritu uvaꞌ jik chittuꞌ, as aꞌeꞌ ni alon veꞌt isuuchil u yoleꞌ tiꞌ u Jesús.
7 As oxvaꞌl uvaꞌ ni alon isuuchil u yoleꞌ sqe uvaꞌ echen tu almikaꞌ. As aꞌeꞌ u Tiixheꞌ tukꞌ u kꞌuchul tetz u tijleꞌm u Tiixheꞌ, as tukꞌ u Tiixhla Espíritu. As eela kuxh iyoloneꞌ stoxil.
8 As oxvaꞌl uvaꞌ ni kꞌuchun isuuchil u yoleꞌ vatz u txꞌavaꞌeꞌ. As aꞌ u Tiixhla Espíritueꞌ tukꞌ uvaꞌ kat kuꞌ u Jesúseꞌ xeꞌ u aꞌeꞌ, as tukꞌ uvaꞌ kat el vikajal Aakeꞌ vatz u kuruseꞌ sqiꞌ. As eela kuxh ikꞌuchat isuuchil stoxil.
9 As nu kunima umaj yol uvaꞌ ni tal unqꞌa uxhchileꞌ sqe. ¿As aꞌ kol chit yeꞌ la kunima viyol u Tiixheꞌ qꞌa? Tan nim talcheꞌ taꞌ u Tiixheꞌ tiꞌ unqꞌa uxhchileꞌ. As Aakeꞌ taꞌ ni alon isuuchil u yoleꞌ tiꞌ viKꞌaoleꞌ.
10 As abꞌil uvaꞌ kꞌujleꞌl ikꞌuꞌl tiꞌ viKꞌaol u Tiixheꞌ, as ootzimal staꞌn uvaꞌ jik chit unqꞌa yoleꞌ uvaꞌ ni tal Aak tiꞌ viKꞌaoleꞌ. Pet abꞌil uvaꞌ yeꞌ ni niman u Kubꞌaal Tiixheꞌ, as kat toksa veꞌt u uxhchileꞌ Aak chulin yolil, tan yeꞌ kat inima u yoleꞌ uvaꞌ kat tal Aak tiꞌ viKꞌaoleꞌ.
11 As aꞌ isuuchil u yoleꞌ uvaꞌ kat taqꞌ u Tiixheꞌ kutiichajil skꞌatz uvaꞌ yeꞌl iyaꞌtebꞌal. As kat taqꞌ Aak sqe taꞌn viKꞌaoleꞌ.
12 As abꞌil uvaꞌ at veꞌt ok kꞌatz viKꞌaol u Kubꞌaal Tiixheꞌ, as aꞌeꞌ at veꞌt itiichajil kꞌatz Aak uvaꞌ yeꞌl iyaꞌtebꞌal. Pet abꞌil uvaꞌ yeꞌ atoꞌk kꞌatz viKꞌaol Aakeꞌ, as yeꞌl itiichajil at kꞌatz Aak.
Ni tal u Xhun uvaꞌ kam stiꞌ kat itzꞌibꞌakat u uꞌujeꞌ
13 As kat untzꞌibꞌa bꞌen unqꞌa yoleꞌ sete, jankꞌal ex uvaꞌ kꞌujleꞌl ekꞌuꞌl tiꞌ viKꞌaol u Tiixheꞌ, tiꞌ uvaꞌ la pal ex stuul uvaꞌ at veꞌt etiichajil kꞌatz Aak uvaꞌ yeꞌl iyaꞌtebꞌal.
14 As estiꞌeꞌ uvaꞌ yeꞌ la xoꞌv oꞌ tiꞌ kunachat Tiixh, tan ootzimal sqaꞌn uvaꞌ tul nu kujaj umaj bꞌaꞌnil te Aak uvaꞌ bꞌaꞌn te Aak, as la ibꞌan Aak kam uvaꞌ la kujaj te Aak.
15 As tiꞌ uvaꞌ ootzimal sqaꞌn uvaꞌ la ibꞌan Aak kam uvaꞌ nu kujaj te Aak, as estiꞌeꞌ uvaꞌ kꞌujleꞌl kukꞌuꞌl tiꞌ Aak tiꞌ uvaꞌ la ibꞌan Aak kam uvaꞌ la kujaj te Aak.
16 Asoj at umaj ex la ilon umaj vetitzꞌin etatzikeꞌ tul uvaꞌ nipaavineꞌ, as la ejaj bꞌaꞌnil te u Tiixheꞌ stiꞌ. Asoj jit aꞌ u paaveꞌ nibꞌaneꞌ uvaꞌ la kam staꞌn, as la ikꞌujbꞌaꞌ Aak ikꞌuꞌl u uxhchileꞌ tiꞌ uvaꞌ at itiichajil skꞌatz uvaꞌ yeꞌl iyaꞌtebꞌal. Pet aꞌ u yoleꞌ uvaꞌ ni valeꞌ tiꞌ unqꞌa uxhchileꞌ uveꞌ aꞌ u paaveꞌ nibꞌaneꞌ uvaꞌ yeꞌ la kam staꞌn, tan at paav uvaꞌ la eqꞌon uxhchil tu kamchileꞌ. As yeꞌxhkam ni val sete uvaꞌ la ejaj sotzbꞌal ipaav unqꞌa uxhchileꞌ tiꞌ vipaaveꞌ uvaꞌ la eqꞌon tu kamchileꞌ.
17 As jankꞌal unqꞌa vaꞌlexheꞌ uvaꞌ la bꞌanchi as aꞌeꞌ paav. As at paav uvaꞌ yeꞌ la eqꞌon unqꞌa uxhchileꞌ tu kamchileꞌ.
18 As ootzimaleꞌ sqaꞌn uvaꞌ jankꞌal oꞌ uvaꞌ oꞌ meꞌal ikꞌaol u Tiixheꞌ, as yeꞌ ni qoksa veꞌt qaama tiꞌ kupaavineꞌ, tan aꞌ viKꞌaol u Tiixheꞌ ni kolon oꞌ. As yeꞌ la olebꞌ veꞌt u txꞌiꞌlanajeꞌ sqiꞌ.
19 As ootzimal sqaꞌn uvaꞌ oꞌ tetz u Tiixheꞌ. Pet ech koj unqꞌa uxhchileꞌ uvaꞌ yeꞌ ni niman u Jesús, tan eyen tiqꞌabꞌ u txꞌiꞌlanajeꞌ.
20 As ootzimal sqaꞌn uvaꞌ kat ul viKꞌaol u Tiixheꞌ vatz u txꞌavaꞌeꞌ. As kat taqꞌ Aak kutxumbꞌal tiꞌ uvaꞌ la qootzi veꞌt u jikla Tiixheꞌ. As eyen veꞌt oꞌ kꞌatz Aak as kꞌatz viKꞌaol Aakeꞌ unpajte uvaꞌ Jesucristo. As aꞌ u Jesucristoeꞌ u jikla Tiixheꞌ. As Aakeꞌ u aqꞌol tetz u kutiichajileꞌ uvaꞌ yeꞌl iyaꞌtebꞌal.
21 Vitzꞌin vatzik uvaꞌ xoꞌn ex sve, as yeꞌ la etoksa etaama tiꞌ unqꞌa veeꞌ uvaꞌ la eesan el ex kꞌatz u Tiixheꞌ. An chiteꞌ.