Ikaꞌv uꞌuj
uvaꞌ itzꞌibꞌa bꞌen
u Xhun
te unqꞌa niman tetz u Jesús
1
Ni taqꞌ bꞌen u Xhun itzii
1 Ineꞌ in Xhun uvaꞌ in iqꞌesal. As tuk unqꞌiila bꞌen ex cheel tu u uꞌujeꞌ, ex uvaꞌ txaael veꞌt ex taꞌn u Tiixheꞌ, as ex uvaꞌ nemol etibꞌ tiꞌ toksal iqꞌii u Tiixheꞌ tu u tenam uvaꞌ atkat ex. As xoꞌn veꞌt ex sve, tan tiꞌ uvaꞌ nu kunima u jikla yoleꞌ setukꞌ. As jit kuxh in ni xoꞌnin ex. Pet xoꞌn ex unpajte te unjoltu unqꞌa qitzꞌin qatzikeꞌ uvaꞌ ootzin tetz u jikla yoleꞌ.
2 As xoꞌn veꞌt ex sqe, tan chabꞌamal veꞌt tatin u jikla yoleꞌ tu u qaanxelal setukꞌ. As at chiteꞌ tu u qaanxelal tiꞌ chit ibꞌeneꞌ.
3 U Kubꞌaal Tiixheꞌ tukꞌ u Kubꞌaal Jesucristo uvaꞌ iKꞌaol u Tiixheꞌ la aqꞌon veꞌt kuꞌ tzan vibꞌaꞌnileꞌ sqiꞌ setukꞌ. As tiꞌ uvaꞌ bꞌaꞌn veꞌt qatin sukuvatzaj setukꞌ. As la itxum veꞌt Aak kuvatz, oꞌ uvaꞌ nu kunima u jikla yoleꞌ uvaꞌ chusel sqe taꞌn Aak, as oꞌ uvaꞌ nu kuxoꞌni qibꞌ sukuvatzaj.
Yeꞌ la taqꞌ kan unqꞌa niman tetz u Jesús u jikla chusbꞌal
4 As vaꞌl untxuqꞌtxun veꞌteꞌ, tan ni vabꞌi uvaꞌ at ex nenima u jikla yoleꞌ echeꞌ ni tal u Tiixheꞌ sqe.
5 As tuk unjaj bꞌaꞌnil sete cheel, vitzꞌin vatzik, tiꞌ uvaꞌ la kunima u tzaqꞌiteꞌ uvaꞌ at kan sukuxoꞌl. As yeꞌl umaj yol nuntzꞌibꞌa bꞌen sete cheel uvaꞌ yeꞌ atixoj qabꞌi. Pet aꞌ u yoleꞌ uvaꞌ kat qabꞌi, tul uvaꞌ kat kunima u Kubꞌaal Tiixheꞌ setukꞌ. As aꞌ ni tal u tzaqꞌiteꞌ uvaꞌ la kuxoꞌni veꞌt qibꞌ sukuvatzaj.
6 As aꞌ nu kukꞌuchkateꞌ uvaꞌ xoꞌn veꞌt u Tiixheꞌ sqe tiꞌ uvaꞌ nu kunima unqꞌa itzaqꞌit Aakeꞌ. As aꞌ ni tal vitzaqꞌit Aakeꞌ uvaꞌ la kuxoꞌni veꞌt qibꞌ sukuvatzaj, echeꞌ uvaꞌ alel sqe setukꞌ, tul kat kunima u Jesús.
7 Estiꞌeꞌ nuntzꞌibꞌa bꞌen u yoleꞌ sete, tan tiꞌ uvaꞌ nimal unqꞌa chulin yoleꞌ paxin veꞌt tibꞌ tulaj unqꞌa tenameꞌ cheel uveꞌ ni tal teesat oꞌ tu bꞌey tiꞌ u jikla yoleꞌ. As ni taleꞌ uvaꞌ jit naj u Jesucristo, tul kat ul Aak vatz u txꞌavaꞌeꞌ. As abꞌil uvaꞌ ech ni taleꞌ echeꞌ u veeꞌ, as aꞌeꞌ u chulin yoleꞌ. As eqꞌomal vitxumbꞌal u najeꞌ staꞌn uvaꞌ la ul toksa tibꞌ Cristoil.
8 Pet la etil jeꞌ etibꞌ sejununilaj, aqꞌal uvaꞌ la etil ivatz vetaqꞌoneꞌ uveꞌ nebꞌaneꞌ tiꞌ viyol u Tiixheꞌ. As la ekꞌul veꞌt vetxꞌajaꞌmeꞌ skajayil xeꞌ u Tiixheꞌ.
9 Tan abꞌil uvaꞌ la teesa tibꞌ kꞌatz vichusbꞌal u Cristo, as yeꞌxhkam chabꞌamal koj tatin kꞌatz u chusbꞌaleꞌ. As aꞌeꞌ uvaꞌ yeꞌl u Tiixheꞌ tu u taanxelaleꞌ. Pet abꞌil uvaꞌ chabꞌamal tatin tu vichusbꞌal u Cristo, as aꞌeꞌ uvaꞌ at veꞌt u Tiixheꞌ tukꞌ viKꞌaol Aakeꞌ tu u taanxelaleꞌ.
10 Pet asoj la ul umaj uxhchil tukꞌ umaꞌt chusbꞌal uvaꞌ jit vichusbꞌal u Cristoeꞌ, as ekꞌulak ok u uxhchileꞌ tekabꞌal tiꞌ etaqꞌat ivatbꞌal. As mitaꞌn la aal ste uvaꞌ achaꞌv tuleꞌ,
11 tan abꞌil uvaꞌ la kꞌulun u uxhchileꞌ tibꞌaꞌnil, as eela kuxh stukꞌ uvaꞌ la iloch veꞌt u uxhchileꞌ tiꞌ ipaxsal u vaꞌlexhla chusbꞌaleꞌ.
Nitzojpisa u Xhun talat viyol
12 Nimaltel kuxh yol la val bꞌen sete, ni valeꞌ. As yeꞌ nibꞌan sve uvaꞌ la kuxh untzꞌibꞌa bꞌen sete. Pet aꞌ ni valeꞌ uvaꞌ in la bꞌen ilon ex, aqꞌal uvaꞌ la txuqꞌtxun veꞌt oꞌ tiꞌ tilat tibꞌ kuvatz.
13 As unqꞌa qitzꞌin qatzikeꞌ tzitzaꞌ uveꞌ txaael veꞌt taꞌn u Tiixheꞌ, as ni taqꞌ bꞌen itzii sete. An chiteꞌ.