Mo꞉mo꞉do꞉ Bugo꞉
Asuluma꞉no꞉ towo꞉ we
Mo꞉mo꞉do꞉ bugo꞉ a꞉la꞉do꞉ sa꞉lab wema꞉ ha꞉go꞉ we, kelego꞉ tambolo꞉ mo꞉mo꞉da fa꞉la꞉do alifa꞉. Mo꞉mo꞉do꞉ bugo꞉ wema꞉yo꞉ henfelo꞉ amilo꞉ kelego꞉ tambo fa꞉la꞉dowo꞉wo꞉, kaluka꞉isale fa꞉la꞉dowo꞉wo꞉lo꞉, mogago꞉ mo꞉mo꞉da fa꞉la꞉dowo꞉wo꞉lo꞉, a꞉la꞉ta꞉ga꞉ henfelo꞉ wilo꞉ hida꞉yo꞉, nagalo꞉ fa꞉la꞉dowo꞉ a꞉no꞉ ko꞉lo꞉ sio꞉. A꞉la꞉ta꞉ga꞉ Gode eyo꞉ kaluka꞉isale asuwa꞉foma꞉kilo꞉ kalu nol ko꞉lo꞉ da꞉fea꞉sa꞉ga꞉lo꞉ iliga꞉fa꞉no꞉ a꞉no꞉ ko꞉lo꞉ sio꞉. Mo꞉mo꞉do꞉ bugo꞉ we heb a꞉la꞉ alobo꞉no꞉ ko꞉lo꞉ da꞉lab.
Mo꞉mo꞉do꞉ bugo꞉ we heb a꞉la꞉ alobo꞉no꞉ ko꞉lo꞉ da꞉lab. Heb 1–11 a꞉namio꞉ Godeya꞉lo꞉ akin o꞉lia꞉ henfelo꞉ o꞉lia꞉lo꞉ dimido꞉ a꞉no꞉ ko꞉lo꞉ malolo꞉. A꞉la꞉ta꞉ga꞉ taminde amilo꞉ kelego꞉ mo꞉mo꞉da fa꞉la꞉dowo꞉ a꞉no꞉ a꞉la꞉ta꞉ga꞉yo꞉ henfelo꞉ wenamilo꞉ kaluka꞉isale fa꞉la꞉dowo꞉ a꞉no꞉ ko꞉lo꞉ sa꞉sa꞉lo꞉. Adama꞉ ene eso꞉lo꞉ amilo꞉ fa꞉la꞉dowo꞉ a꞉no꞉ ko꞉lo꞉ malolaki sa꞉sa꞉lo꞉. A꞉la꞉ta꞉ga꞉ Noaya꞉ eso꞉lo꞉ ko꞉lo꞉ ho꞉na꞉lo꞉ galusana mo꞉no꞉wo꞉lo꞉, a꞉la꞉ta꞉ga꞉ Babel walado꞉ a꞉no꞉ ko꞉lo꞉ malolaki sa꞉sa꞉lo꞉.
Heb 12–50 a꞉namio꞉ Isolael so꞉lo꞉ ima꞉mu i mio꞉ a꞉no꞉ ko꞉lo꞉ malolo꞉. Kalu tamin amilo꞉ fa꞉la꞉dowo꞉wo꞉ Ablaham. Ablaham eyo꞉ Godeya꞉ towo꞉ tilida꞉dakiyo꞉, elo꞉ asulan man a꞉ma꞉ ha꞉ga dowo꞉. Ablaham e Gode amilo꞉ tilidabu kaluka꞉isale tif amilo꞉ fa꞉la꞉doma꞉nigab a꞉no꞉ ko꞉lo꞉ da꞉feaki go꞉. A꞉la꞉ta꞉ga꞉ malolo꞉ wema꞉ us amio꞉, Ablahama꞉ ene so꞉wayo꞉ Aisa꞉go꞉, ema꞉mu Ya꞉kobo꞉ (ene wi nowo꞉ Isolael) a꞉la꞉ta꞉ga꞉ ene insiso꞉i kalu kugu a꞉la꞉fo꞉ i a꞉namilo꞉ fa꞉la꞉dowo꞉ a꞉no꞉ ko꞉lo꞉ malolo꞉. Ya꞉koba꞉ so꞉wa imilig nowo꞉ Yosa꞉b e Isib hen a꞉na tililia꞉ ha꞉na꞉sa꞉ga꞉yo꞉, tif amio꞉ Ya꞉koba꞉ eso꞉lo꞉wo꞉ tambo Isib hen a꞉na mesa꞉ni ane, a꞉no꞉ ko꞉lo꞉ malolaki sa꞉sa꞉lo꞉.
Bugo꞉ wenamio꞉ kaluka꞉isale ko꞉lo꞉ ta꞉i mio꞉ malolo꞉wo꞉ modo꞉ ko꞉lo꞉ da꞉lab. Ko꞉sega bugo꞉ wenamio꞉, Godeya꞉lo꞉ kaluka꞉isale o꞉lia꞉lo꞉ nanog dimida꞉i mio꞉ a꞉no꞉ wa꞉la꞉b to ko꞉lo꞉ sa꞉sa꞉lo꞉ da꞉labo꞉ o꞉m. Tamin amio꞉ Gode eyo꞉ kelego꞉ da꞉lab we tambo e dimida꞉sa꞉ga꞉ ta꞉fo꞉. Tif amio꞉ kaluka꞉isale iliyo꞉ man mogago꞉wo꞉ a꞉dimidabikiyo꞉ Gode eyo꞉ iyo꞉ tambo yasalaki, Noaya꞉ ene so꞉lo꞉leko꞉ ta꞉fo꞉. A꞉la꞉ta꞉ga꞉yo꞉ tif amio꞉ Gode eyo꞉ Ablahamo꞉ da꞉fe alitakiyo꞉ nafale mesa꞉no꞉ to a꞉no꞉ Ablaham o꞉lia꞉ ene so꞉lo꞉wa a꞉la꞉ta꞉ga꞉lo꞉ ema꞉mui ta꞉i ha꞉na꞉nigab imo꞉wo꞉ dinali saefa꞉. Bugo꞉ wenamio꞉ Godeya꞉ enedo꞉ man dimidan a꞉no꞉ ko꞉lo꞉ malolaki sa꞉sa꞉lo꞉. Kaluka꞉isaleya꞉ iya hendeleyo꞉ Gode e. Eyo꞉ kaluka꞉isaleya꞉ man dimido꞉ a꞉no꞉ aloba꞉dakiyo꞉, mogago꞉lo꞉ dimido꞉ imo꞉wo꞉ falasilaki wa꞉dea꞉sen. A꞉la꞉ta꞉ga꞉ kaluka꞉isale Godeya꞉ ha꞉g amilo꞉ dowab i a꞉no꞉ dinafa tilidowaki bo꞉fo꞉lowa꞉sen. Bugo꞉ wenamio꞉ kaluka꞉isale tamin amilo꞉ ta꞉i mio꞉ ili tilidabu a꞉no꞉ ko꞉lo꞉ sa꞉laki, a꞉la꞉ta꞉ga꞉ tifamilo꞉ so꞉lo꞉ fa꞉la꞉doma꞉nigab iliyo꞉ dinafa agelaki tilidabuwa halale kagama꞉ki sio꞉.
1
1 Tamindeya mo꞉mo꞉dakiyo꞉, Gode eyo꞉ akin o꞉lia꞉ henfelo꞉ o꞉lia꞉ dimido꞉. 2 Hen misido꞉wo꞉ aundo꞉ma a꞉la꞉ta꞉ga꞉ fo꞉fo꞉dolo꞉ ko꞉lo꞉ elen. Ho꞉na꞉yo꞉ heno꞉ go꞉lula꞉fo꞉labikiyo꞉, tambo sololiya elen. A꞉la꞉ta꞉ga꞉ Godeya꞉ ene Mamayo꞉ ho꞉n wa꞉l a꞉na sia꞉len. 3 2Kol 4.6Gode eyo꞉ a꞉la꞉sio꞉, “Ho꞉wo꞉ fa꞉la꞉doma” a꞉la꞉sa꞉labiki, ho꞉wo꞉ a꞉na fa꞉la꞉dowo꞉. 4 Gode eyo꞉ ho꞉ a꞉no꞉ nafa ba꞉dabikiyo꞉, ho꞉ o꞉lia꞉ sololi a꞉no꞉lia꞉yo꞉ a꞉na alobanala꞉. 5 A꞉la꞉ta꞉ga꞉ Gode eyo꞉ ho꞉ a꞉no꞉ “Ho꞉len” wikilaki, sololi a꞉no꞉ “Nulu” wikilo꞉. Ho꞉leno꞉ a꞉la꞉ga꞉ sololiabiki, ho꞉len agelo꞉ o꞉m.
6-7 2Bid 3.5Gode eyo꞉ a꞉la꞉sio꞉, “Ho꞉n we aloba꞉dakiyo꞉, ho꞉ndo꞉ ka꞉ma꞉no꞉ kelego꞉wo꞉ usamio꞉ fa꞉la꞉doma.” A꞉la꞉sa꞉labiki a꞉naka fa꞉la꞉dowo꞉. Ho꞉ndo꞉ ka꞉lan kelego꞉wo꞉ dia꞉tabiki, ho꞉no꞉ usa alobanala꞉. Ho꞉n nowo꞉ iwalu ta꞉taki, ho꞉n nowo꞉ ha꞉ga ta꞉fo꞉. 8 Ho꞉ndo꞉ aloba꞉dan kelego꞉ a꞉no꞉ Gode eyo꞉ “akin” wikilo꞉. Ho꞉leno꞉ a꞉la꞉ga꞉ sololiabiki, ho꞉len andebo꞉ o꞉m.
9 A꞉la꞉ta꞉ga꞉ Gode eyo꞉ a꞉la꞉sio꞉, “Akin ha꞉g amio꞉, hen kalaido꞉wo꞉ fa꞉la꞉doma꞉ki, ho꞉no꞉ nowa kegenema.” A꞉la꞉sa꞉labiki a꞉la꞉ka fa꞉la꞉dowo꞉. 10 Kalaido꞉ a꞉no꞉ Gode eyo꞉ “hen” wikilo꞉. Ho꞉n kegenelia꞉ga꞉lo꞉ dowo꞉ a꞉no꞉ “so꞉lu ho꞉n” wikilo꞉. Gode eyo꞉ dimida꞉sa꞉ga꞉ ta꞉fo꞉ ko꞉lo꞉ nafa ba꞉ba꞉.
11 A꞉la꞉ta꞉ga꞉ Gode eyo꞉ a꞉la꞉sio꞉, “Hen amilo꞉ fa꞉la꞉ba꞉no꞉ kelego꞉ a꞉no꞉ tambo fa꞉la꞉doma. I ko꞉li ko꞉lilo꞉ o꞉lia꞉, e ko꞉li ko꞉lilo꞉ o꞉lia꞉ a꞉no꞉ tambo fowo꞉ enedo꞉leko꞉ helema꞉ki fa꞉la꞉doma.” A꞉la꞉sa꞉labiki a꞉la꞉ka fa꞉la꞉dowo꞉. 12 Henfelo꞉ amilo꞉ fa꞉la꞉ndan kelego꞉, i ko꞉li ko꞉lilo꞉ o꞉lia꞉, e ko꞉li ko꞉lilo꞉ o꞉lia꞉yo꞉ tambo fa꞉la꞉ne. A꞉no꞉ tambo fowo꞉ enedo꞉leko꞉ helema꞉ki ta꞉fo꞉. A꞉la꞉ta꞉ga꞉ Gode eyo꞉ a꞉no꞉ nafa ba꞉ba꞉. 13 Ho꞉leno꞉ a꞉la꞉ga꞉ sololiabiki, ho꞉len asolo꞉ o꞉m.
14 A꞉la꞉ta꞉ga꞉ Gode eyo꞉ a꞉la꞉sio꞉, “Akin a꞉namio꞉ ho꞉len o꞉lia꞉ nulu o꞉lia꞉yo꞉ alobanama꞉ki, ho꞉lo꞉ doma꞉no꞉wo꞉ tambo fa꞉la꞉doma. Ho꞉ a꞉ma꞉yo꞉ ele ba꞉ba꞉no꞉ dowakiyo꞉, ho꞉leno꞉, donayo꞉, ta꞉no꞉, imo꞉wo꞉ a꞉ma꞉ aloba꞉da꞉melea꞉ki ta꞉fo꞉. 15 A꞉la꞉ta꞉ga꞉ ho꞉ akin amilo꞉ ta꞉fo꞉ a꞉ma꞉yo꞉ henfelo꞉mo꞉wo꞉ ho꞉wo꞉ dimina.” A꞉la꞉sa꞉labiki a꞉la꞉ka fa꞉la꞉dowo꞉. 16 Gode eyo꞉ ho꞉wo꞉ alan a꞉la꞉ ko꞉lo꞉ dimido꞉. Ho꞉ mada alan a꞉ma꞉yo꞉ ho꞉leno꞉ e bo꞉fo꞉melea꞉ki dimido꞉. Ho꞉ alandego꞉ a꞉ma꞉yo꞉ nuluwo꞉ e bo꞉fo꞉melea꞉ki dimido꞉. A꞉la꞉ta꞉ga꞉ tamino꞉lo꞉ dimido꞉. 17 I a꞉no꞉ akina ta꞉taki, ho꞉wo꞉ henfelo꞉mo꞉wo꞉ dimia꞉melea꞉ki ta꞉fo꞉. 18 Ho꞉ i a꞉ma꞉yo꞉ ho꞉len o꞉lia꞉ nulu o꞉lia꞉yo꞉ bo꞉fo꞉liki aloba꞉da꞉melea꞉ki ta꞉fo꞉. Gode eyo꞉ a꞉no꞉ dimida꞉sa꞉ga꞉ ta꞉fo꞉ ko꞉lo꞉ nafa ba꞉ba꞉. 19 Ho꞉leno꞉ a꞉la꞉ga꞉ sololiabiki, ho꞉len fa꞉la꞉lamelo꞉ o꞉m.
20 A꞉la꞉ta꞉ga꞉ Gode eyo꞉ a꞉la꞉sio꞉, “Ho꞉n amio꞉lo꞉ mela꞉no꞉lo꞉ a꞉lab ko꞉li ko꞉lilo꞉ a꞉no꞉ ililifoma. A꞉la꞉ta꞉ga꞉ o꞉ba꞉ ko꞉li ko꞉lilo꞉ a꞉no꞉ tambo iwaluwo꞉ dalolia꞉ sima꞉ki fa꞉la꞉doma” a꞉la꞉sio꞉. 21 A꞉la꞉go꞉ko꞉lo꞉ ka꞉ mada alan ho꞉na꞉ usamilo꞉ sano꞉lo꞉, mela꞉no꞉lo꞉ a꞉lab kelego꞉ ko꞉li ko꞉lilo꞉ ho꞉na꞉ usamilo꞉ dalale san a꞉no꞉lo꞉ tambo, a꞉la꞉ta꞉ga꞉ o꞉ba꞉yo꞉lo꞉, tambowo꞉ inin misido꞉ sugusula꞉melea꞉ki, Gode eyo꞉ dimida꞉sa꞉ga꞉ ta꞉fo꞉ ko꞉lo꞉ nafa ba꞉ba꞉. 22 Gode eyo꞉ iyo꞉ halaido꞉ doma꞉ki a꞉la꞉sio꞉, “Gio꞉ inso꞉wo꞉ modo꞉ sugusulakiyo꞉, ho꞉no꞉ tambo ilila꞉bi. A꞉la꞉ta꞉ga꞉ o꞉ba꞉ gio꞉lo꞉ uso꞉ modo꞉ segesela꞉la꞉ga꞉ gula꞉sa꞉ga꞉yo꞉, henfelo꞉ we ilili alita꞉bi” a꞉la꞉dinali salifa꞉. 23 Ho꞉leno꞉ a꞉la꞉ga꞉ sololiabiki, ho꞉len biyo꞉ o꞉m.
24 A꞉la꞉dimida꞉sa꞉ga꞉ Gode eyo꞉ a꞉la꞉sio꞉, “Hen wenamio꞉ no꞉ ko꞉li ko꞉lilo꞉ a꞉lab a꞉no꞉ tambo, no꞉ kaluwa꞉lo꞉ fofano꞉lo꞉, no꞉ ilaboda꞉lo꞉ sano꞉lo꞉, no꞉ kelego꞉ galin hen amilo꞉ dalolia꞉ ha꞉nano꞉lo꞉, inin misido꞉le ko꞉li ko꞉lilo꞉ a꞉no꞉ fa꞉la꞉dota꞉ga꞉ mela꞉no꞉ doma.” A꞉la꞉sa꞉labiki a꞉la꞉ka fa꞉la꞉dowo꞉. 25 Gode eyo꞉ hen wenamilo꞉ no꞉ ko꞉li ko꞉lilo꞉ a꞉lab a꞉no꞉ tambo, no꞉ kaluwa꞉lo꞉ fofano꞉lo꞉, no꞉ ilaboda꞉lo꞉ sano꞉lo꞉, no꞉ kelego꞉ galin hen amilo꞉ dalolia꞉ ha꞉nano꞉lo꞉, inin misido꞉le ko꞉li ko꞉lilo꞉ a꞉no꞉ Gode eyo꞉ dimida꞉sa꞉ga꞉ ta꞉fo꞉ ko꞉lo꞉ nafa ba꞉ba꞉.
26 1Kol 11.7A꞉la꞉dimidalita꞉ga꞉yo꞉ Gode eyo꞉ a꞉la꞉sio꞉, “Niliyo꞉ kaluka꞉isaleyo꞉ dimidakiyo꞉, ninin misido꞉ o꞉ngo꞉ doma꞉ki, a꞉la꞉ta꞉ga꞉ ninin asulo꞉ o꞉ngo꞉ doma꞉ki dimidama꞉niki.* Gode e mama ko꞉lo꞉ e do꞉mo꞉ o꞉lia꞉ misido꞉ o꞉lia꞉yo꞉ aundo꞉ma. Ko꞉sega eyo꞉ kaluka꞉isale dimidakiyo꞉, inin o꞉ngo꞉ doma꞉ki dimido꞉. A꞉la꞉fo꞉ko꞉lo꞉ Baibo꞉l amio꞉ a꞉la꞉sa꞉sa꞉lo꞉, inin misido꞉ o꞉lia꞉ inin asulo꞉ o꞉lia꞉ o꞉ngo꞉ doma꞉ki dimido꞉. Kaluka꞉isale wema꞉yo꞉ ka꞉ ho꞉n amilo꞉ sano꞉lo꞉, o꞉ba꞉ iwalulo꞉ sano꞉lo꞉, no꞉ fofano꞉lo꞉, a꞉la꞉ta꞉ga꞉ no꞉ kelego꞉ galin hen amilo꞉ dalolia꞉ ha꞉nano꞉lo꞉, henfelo꞉ amilo꞉ a꞉lab we tambo imo꞉ bo꞉fo꞉melea꞉ki ta꞉fa꞉no꞉.” 27 Madi 19.4, Mak 10.6 Mo꞉mo꞉ 5.1-2A꞉la꞉fo꞉ko꞉lo꞉ kaluka꞉isaleyo꞉ asulo꞉ o꞉lia꞉ misido꞉ o꞉lia꞉yo꞉ Godeya꞉ enen o꞉ngo꞉ dimido꞉. Inin misido꞉ o꞉ngo꞉ dimido꞉ a꞉namio꞉, kalu o꞉lia꞉ ga o꞉lia꞉ ko꞉lo꞉ ta꞉fo꞉. 28 Gode eyo꞉ iyo꞉ halaido꞉ nafa mesea꞉kiyo꞉, towo꞉ a꞉la꞉sio꞉, “Giliyo꞉ so꞉wayo꞉ sa꞉la꞉la꞉i ha꞉nakiyo꞉, modo꞉ fa꞉la꞉dowaki, henfelo꞉ we tambo ilila꞉bi. A꞉la꞉ta꞉ga꞉ henfelo꞉ we tambo gili bo꞉fo꞉lubi. Ka꞉ ho꞉n amilo꞉ sano꞉lo꞉, o꞉ba꞉ dalolia꞉ga꞉lo꞉ siano꞉lo꞉, no꞉ fofano꞉lo꞉, a꞉la꞉ta꞉ga꞉ no꞉ kelego꞉ galin hen amilo꞉ dalale sano꞉lo꞉, a꞉no꞉ tambo gili bo꞉fo꞉lubi.” 29 A꞉la꞉ta꞉ga꞉ Gode eyo꞉ a꞉sa꞉lakiyo꞉, “Henfelo꞉ amilo꞉ e folo꞉ hedan o꞉lia꞉, i folo꞉ hedan o꞉lia꞉ a꞉no꞉ tambo gimo꞉ maiya꞉ki dimio꞉l. 30 No꞉ hen amilo꞉ sano꞉lo꞉, o꞉ba꞉ iwalulo꞉ dalolia꞉ga꞉lo꞉ siano꞉lo꞉, a꞉la꞉ta꞉ga꞉ no꞉ kelego꞉ galin hen amilo꞉ dalolia꞉ ha꞉nano꞉lo꞉, kelego꞉ tambo mela꞉no꞉lo꞉ a꞉lab i a꞉no꞉ i fo꞉s o꞉lia꞉ fugus o꞉lia꞉yo꞉ imo꞉ maiya꞉ki dimio꞉l.” A꞉la꞉sa꞉labiki a꞉la꞉ka fa꞉la꞉dowo꞉. 31 Kelego꞉ tambo enedo꞉ dimido꞉ a꞉no꞉, Gode eyo꞉ mada nafale ba꞉ba꞉. Ho꞉leno꞉ a꞉la꞉ga꞉ sololiabiki, ho꞉len do꞉go꞉feyo꞉ o꞉m.
*1:26: Gode e mama ko꞉lo꞉ e do꞉mo꞉ o꞉lia꞉ misido꞉ o꞉lia꞉yo꞉ aundo꞉ma. Ko꞉sega eyo꞉ kaluka꞉isale dimidakiyo꞉, inin o꞉ngo꞉ doma꞉ki dimido꞉. A꞉la꞉fo꞉ko꞉lo꞉ Baibo꞉l amio꞉ a꞉la꞉sa꞉sa꞉lo꞉, inin misido꞉ o꞉lia꞉ inin asulo꞉ o꞉lia꞉ o꞉ngo꞉ doma꞉ki dimido꞉.