1 Sik-a ay ili ay Jerusalem, pomigsa ka ta maidayaw ka kasin. Osalem din nabanol ay badom, sik-a ay nasantoan ay siyodad, tan awni et adi da kasin senggep en sik-a din adi mamatin Diyos. 2 Wayawayaam san awak mo. Komaan ka issan tapok ta tomokdo ka sin tronom. Dakayo ay man-ili ed Jerusalem, kaanen yo din naikadina en dakayo. 3 Kanan Diyos sin ipogaw na, “Adi kayon nailakos pilak idi naibag-en kayo, isonga maga abey pilak si maisobot en dakayo mo mawayawayaan kayo. 4 Ed bayag, nanballalong kayo ed Egipto et nanbalin kayo ay mangili isdi. Baken nabayag yan pinaligat din taga-Assyria si dakayo ay magay gapgapo na. 5 Isonga ed wani, sino ngin di amagek? Naibalod kayo ay ipogaw ko ay magay gapgapo na et manpaspasikat din nangibalod en dakayo. Kanayon abe ay laslasoyen da din ngadan ko. 6 Ngem domteng to di timpo ay mabigbig yo ay sak-en si Diyos ay makikalkali en dakayo.”

7 Peteg ay omiparagsak din omalian di mangibagas siged ay damag. Ibaga da sin taga-Jerusalem ay somiged ya tomalna di biyag da. Kanan da abe en maisalakan da ya say manturay din Diyos da. 8 Dengngen yo! Man-es-esa da ay bomanogaw din gowardiya yo si ragsak da. Maila da ay mismo din pantaolian Diyos ed Zion. 9 Dakayo ay nabakas ay luglugar ed Jerusalem, ibogaw yo din ragsak yo, tan isalakan Diyos dakayo ya liwliwaena din ipogaw na. 10 Osalena din nadiyosan ay panakabalina ay mangisalakan sin ipogaw na et ilaen di kaipoipogaw isnan intiro ay daga. 11 Taynan yo ed Babilonia ta maikakasin kayon daida. Adi yo aben al-alaen di sanikwa da, tan ibilang ko ay kadodogis. Mo dakayo pay ay manggen sin mallokong ya odom ay bonbonag ay naosal sin Timplok, masapol ay linisan yo din awak yo. 12 Ngem ed wani, adi masapol ay dalasen yo ay komaan sin siyodad. Adi masapol ay lomayaw kayo, tan ipangon Yahweh ay Diyos yo si dakayo yan sisya met laeng di manalaknib en dakayo sin likodan yo.

13 Kanan Diyos, “Awni et tongpalen nan baak din obla na et maingato ya maidayaw sisya. 14 Ad-ado di masdaaw sin pangilaan dan sisya, tan linmawlawa ay kaman baken ipogaw di kailaana. 15 Ngem ad-adon to ay nasyon di masdaaw en sisya et adi makakali din aari ay masmasdaaw, tan maila da din adi da inil-ila ya dengngen da din adi da dindinnge ed idi.”