148
Genembo Eni Roera Nanjogo Utuda, Endada Evada Irira Aimi God Dae Sakai Saore Dae Resira.
1 Bajari dae sakai saore!
Ne utu iká bekáda iritireva, aimi utudaghe Bajari dae sakai sevu!
2 Nunda aneya mane isambu, nunda isoro embo utuda ireva, nundae sakai sevu!
3 Iji nengae tambunoghae, nundae sakai sevu! Damana mane jaraghuse nundae sakai sevu!
4 Utu iká bekáda kotugo borija utu ikáda jungedo irira, aimi nundae sakai sevu!
5 Ne isasambu Bajari da javo jighovo erare dae resena!
Ainda susu mo, nune setiri, ne sirorusevu.
6 Nunda sarida, ne nenda vasada siroredo, evovodae aminda iritirera.
Nu nange setiri fetirera, ainda geka ava ne jo bu fugae arera.
7 Enda emindaghe, eva da oka mane,
kotugo karaje kafuru jokáda gambauva iritirera aimi, Bajari dae sakai sevu!
8 Biria barara, borija dombu eni aisi yaurago diraira,
a kotugo yaura vovoga isambu ne nunda sari ava ningiraeva.
9 Enda jiro fumbari, doriri mane, taima da ika mane,
kotugo mindari vuji da ika mane nanjogo, aimi nundae sakai sevu!
10 Sino fuka tamo dari tamo dae isasambu, jingabu, sivoro kororo, kotugo rika mane aimi nundae sakai sevu!
11 Kini mane isasambu, natofo nanjogo ireva, gavana mane,
sabua kokotofu nanjogo ireva isasambu aimi, nundae sakai sevu!
12 Ade mose, yarata seka bajari, evevetako embabako,
kotugo sasingako barago isasambu aimi nundae sakai sevu!
13 Ne isasambu Bajari da javo jighivo erare dae resena!
Nunda javo mo, javo isasambu ainda iká bekádari.
Nunda duró mo, utu enda ainda iká bekádari.
14 Nunda dubo bari natofo Israel embo mo, nune etiri fakina edo irera.
Susu aindae nunda natofo isasambukena resena,
Bajari dae sakai sevu!