31
Mwet Israel Elos Folokla Nu Yen Selos
1 LEUM GOD El fahk, “Pacl se ac tuku ke nga ac fah God lun sruf nukewa lun Israel, ac elos ac fah mwet luk. 2 In acn mwesis nga tuh akkalemye pakomuta luk nu selos su painmoulla. Ke pacl se mwet Israel elos kena mongla, 3 nga sikyang nu selos liki acn loessula. Mwet Israel, nga nuna lungse kowos oemeet me, ouinge nga srakna fahkak lungse kawil luk nu suwos. 4 Nga fah sifilpa musaikowosyak, na kowos ac sifilpa srukak tambourine nutuwos, ac onsrosro ke engan. 5 Kowos ac sifilpa yok ima in grape fin inging Samaria, ac elos su yukwiya fah kang fahko kac. 6 Aok, pacl se ac tuku ke mwet san uh ac wowoyak fin inging Ephraim ac fahk, ‘Fahsru, kut utyak som nu Zion, nu yurin LEUM GOD lasr.’ ”
7 LEUM GOD El fahk,
“On ac insewowo ke mwet Israel,
Mutunfacl se su yohk ac pwengpeng inmasrlon mutunfaclu.
Alullul ke on in kaksak lowos ac fahk,
‘LEUM GOD El molela mwet lal;
El loangelos nukewa su painmoulla.’
8 Nga fah usalosme liki acn epang,
Ac eisaloseni liki saflaiyen faclu.
Mwet kun ac mwet ul fah welulos tuku —
Mutan pitutu ac elos su apkuran in isusla.
Elos ac foloko tuh na sie mutunfacl lulap.
9 Mwet luk fah tung ke elos foloko,
Elos ac pre ke nga pwanulosme.
Nga ac kololos nu ke infacl srisrik
Fin soko inkanek fwel, yen elos fah tia tukulkul we.
Nga oana sie papa nu sin Israel,
Ac Ephraim pa wen se ma matu oemeet nutik.”
10 LEUM GOD El fahk,
“Kowos mutanfahl uh, lohngyu
Ac sulkakin kas luk nwe yen loessula.
Nga tuh akfahsryelik mwet luk, tusruktu nga ac sifil eisaloseni
Ac liyalosyang oana sie mwet sropo su liyaung un kosro natul.
11 Nga aksukosokyela mwet Israel,
Ac molelosla liki sie mutunfacl kulana.
12 Elos ac tuku ac on ke engan Fineol Zion,
Ac arulana insewowo ke mwe kite luk inge:
Wheat, ac wain, ac oil in olive,
Oayapa sheep ac cow.
Moul lalos ac fah oana sie ima ma aksroksrokyeyuk wo;
Ma nukewa elos enenu ac fah itukyang nu selos.
13 Na mutan fusr fah tacn ac engan,
Ac mukul fusr ac mukul matu ac fah insewowo.
Nga fah akwoyalos ac ekulla sasao lalos nu ke insewowo,
Ac asor lalos nu ke engan.
14 Nga fah akkihpye mwet tol ke mwe mongo na yuyu,
Ac akfalye enenu nukewa lun mwet luk.
Nga, LEUM GOD, pa fahk ma inge.”
LEUM GOD El Pakomuta Mwet Israel
15 LEUM GOD El fahk,
“Sie pusra lohngyuk Ramah me,
Pusren tung na upa.
Rachel el tungi tulik natul.
Elos wanginla,
Ac el tia lungse in akwoyeyuk el. Gen 35:16–19; Mt 2:18
16 Nimet tung.
Eela sroninmotom.
Kom ac fah eis lacnen orekma nukewa
Ma kom oru nu sin tulik nutum an.
Elos ac foloko liki facl sin mwet lokoalok lalos.
17 Oasr mwe finsrak lom nu ke pacl fahsru;
Tulik nutum ac foloko nu yen selos.
Nga, LEUM GOD, pa fahk ma inge.
18 “Nga lohng ke mwet Israel elos fahk ke asor lun insialos,
‘LEUM GOD, kut oana kosro lemnak ma soenna akmunayeyuk.
Tusruktu kom luti kut in akos.
Folokinkutwot.
Kut akola in folok nu yurum,
LEUM GOD lasr.
19 Kut tuh forla liki kom,
A tia paht na kut kena folokot nu yurum.
Tukun kom kai kut
Kut suwoli ke asor lulap.
Kut mwekinla ac tonongla
Mweyen kut oru ma koluk ke pacl in fusr lasr!’
20 “Israel, kom wen saoklana nutik,
Tulik se su nga kuloi.
Pacl nukewa nga fahk inem uh
Nga asor yohk keim.
Nga arulana nunkekom;
Ac pakomutom na pwaye.
21 Tulokunak kutu akul in akilenya inkanek.
Sifilpa konauk innek ma kowos tuh ut we som.
Foloko, mwet Israel,
Fahsru nu yen suwos, nu ke siti srisrik ma kowos tuh som liki.
22 Kowos su sululalfongi, kowos ac nikinkowosla nwe ngac?
Nga orala sie lumah sasu, sie liki ma meet ah,
Ekla na yohk se, oana ke sie mutan fin loango sie mukul.”
Kapkapak Lun Mwet Lun God Ke Pacl Fahsru
23 LEUM GOD Kulana, God lun Israel, El fahk, “Ke nga ac folokunla mwet uh nu in facl selos, elos ac sifilpa fahk in facl Judah ac siti nukewa we mu,
‘Lela LEUM GOD Elan akinsewowoye eol mutal* eol mutal: pa Eol Zion, eol soko in Jerusalem, yen Tempul ac inkul fulat sin tokosra musala we. lun Jerusalem,
Acn mutal yen El muta we.’
24 Mwet uh ac fah muta Judah ac in siti nukewa we, na ac fah oasr mwet ima, ac mwet shepherd wi un kosro natulos. 25 Nga ac fah akkeyalos su totola, ac sang mwe mongo nu selos su munasla. 26 Ouinge mwet uh fah fahk, ‘Nga motulla ac ke nga ngutalik monuk arulana kui.’
27 “Nga, LEUM GOD, fahk mu pacl se ac tuku ke nga fah akpusyelik pisen mwet ac kosro natulos in facl Israel ac Judah. 28 Na oana ke nga tuh oaru in fusak, amakinya, topkakunla, kunausla, ac fukulya, in pacl fahsru nga fah oayapa oaru in yokwalosi ac in musaelosyak. 29 Ke pacl sac summa, mwet uh ac tia sifilpa fahk kas se inge:
‘Papa ac nina kangla grape mukol,
A tulik uh isla wihselos.’ Ezk 18:2
30 A ac fah ouinge: kutena su kang grape mukol, wihsel sifacna fah isla. Ac kais sie mwet fah misa ke sripen koluk lal sifacna.”
31 LEUM GOD El fahk, “Pacl se ac tuku ke nga fah oakiya sie wuleang sasu yurin mwet Israel ac yurin mwet Judah. Mt 26:28; Mk 14:24; Lk 22:20; 1 Cor 11:25; 2 Cor 3:6 31:31–34; Heb 8:8–12 32 Ac fah tia oana wuleang matu su nga tuh orala yurin mwet matu lalos pacl se nga tuh sruokya paolos ac kololosme liki Egypt. Nga finne oana sie mukul tuma nu selos, a elos tuh tiana liyaung wuleang sac. 33 Wuleang sasu se su nga ac oru yurin mwet Israel fah ouinge: Nga fah likiya ma sap luk in elos, ac simusla insialos. Nga fah God lalos, ac elos fah mwet luk. Heb 10:16 34 Wangin selos ac fah enenu in luti mwet in facl sel in etu ke LEUM GOD mweyen mwet nukewa fah eteyu, mutawauk yurin mwet su arulana pusisel nwe ke elos su fulatlana. Nga fah nunak munas ke ma koluk lalos, ac nga fah tia sifil esam ma sutuu lalos. Nga, LEUM GOD, pa fahk ma inge.” Heb 10:17
35 LEUM GOD pa sang tuh faht in kalem ke len,
Ac malem ac itu in kalem ke fong.
El pa purakak noa in meoa uh in ngirngir.
Inel pa LEUM GOD Kulana.
36 Ke sripen oakwuk inge nukewa ac tia wanginla,
Ouinge El wulela mu mutunfacl Israel ac fah tia wanginla.
37 Oana ke koflana srikasrak uh acn lucng inkusrao,
Ac koflana tuniyuk acn loallana ke pwelung lun faclu,
Ouinge nga fah tia sisla mwet Israel
Elos finne orekma koluk.
LEUM GOD pa fahk ma inge.
38 LEUM GOD El fahk, “Pacl se ac tuku ke acn nukewa in Jerusalem ac fah musaiyukla tuh in siti sik, liki Tower Hananel layen roto, nwe ke Mutunpot Sruwasrik. 39 Na masrol uh ac fahla liki Mutunpot Sruwasrik suwoslana nu ke eol Gareb, na kuhfla nu Goah. 40 Infahlfal sac nufon yen mwet misa pukpuk we ac acn in sisi kutkut, wi ima nukewa lucng liki Infacl Kidron fahla nwe ke Mutunpot Horse nu kutulap, ac fah acn mutal nu sik. Mwet lokoalok ac fah tia sifilpa utyak ac sruokya siti se inge ku kunausla.”
*31:23 eol mutal: pa Eol Zion, eol soko in Jerusalem, yen Tempul ac inkul fulat sin tokosra musala we.
31:31 Mt 26:28; Mk 14:24; Lk 22:20; 1 Cor 11:25; 2 Cor 3:6
31:31 31:31–34; Heb 8:8–12