Ngwujaꞌri ngwanni ngwullu je
Butruj giꞌra rom
Änï kitabanu
Ngwujaꞌri ngwudi Butruj giꞌra rom ngwondacaar je yiꞌdonga yidi Ngwaalu yonyadanu yidi ngwïkïrïjïn ngwudi gwerreng. Butruj gwullu ndi orꞌtemaji ngwïkïrïjïnä aar elelle elelleng gwanni gwa gäbïcï Ngwaalinga aar jayanu (1.3) na aar mätïnälü ꞌdïꞌdäny ngwujaꞌri ngwanni ngwätï ngwäyänü ngwätädï je Ngwaalu (1.12). Nginde gwärngädï ngwïkïrïjïnä gwani ngwoorta ngwanni ngwuru ngwuꞌduru na gwani mïꞌrï ngwäyänü gwanni gwuma yiiru giyee yiru yiꞌduru geꞌte ngwüjänü. Butruj gwondaja gwulleny gwani bebere Ngwaalu na ndi Yicu Kirictu gwanni gwuru ꞌdidanu. Bebere nggwee gwuru gwinggida gwe ngwüjï ngwanni ngwänggädï Yicung aar ꞌdingini enggacing gwüngün.
Butruj gwinggida gwece gwece gwani enggaci gwudi ngwüjï ngwanni gwati ari Yicu gwäꞌtüdï gwadi oꞌra mana. A be Butruj ari, jana gwudi Yicu gwenene gwuru ndi ari Ngwaalu “gwaꞌti bupu dïjü dere ndi dudi ngwube bupi ndi ari aar joꞌrenyana ꞌdar” (3.9).
Yajang yidi ngwujaꞌri
1. Aganni (1.1–2)
2. Urnidi gwudi ngwïkïrïjïn (1.3–21)
3. Ngwoorta ngwanni ngwuru ngwuꞌduru (2.1–22)
4. Oꞌra gwudi Kirictu gwadi ji ꞌdidanu (3.1–18)
1
Aganni
1 Äny gwuru gwani Jamaan Butruj gwuru dïnäd nyi ru dooꞌra dükäjäär didi Yicu Kirictu. Ngwujaꞌri ngwee ngwükäcï nje ngwüjü ngwanni ngwuma ape ämnïng Ngwaalu gwanni gwuru guꞌru gipa nono gwärï, dünälü gwe gwudi Ngwaalu na Gilang gwege gwani Yicu Kirictu.
2 Ara je gu yïmïꞌrü na adatalu ji gwïrälü ngaa lenge Ngwaalinga na Delenya dege dani Yicu.
A urnidi na äbrï gwalu ru ꞌdidanu
3 Ndi ari yiima ye yidi drü dïndï Ngwaalu yima aar nje ye gïꞌtïjï yiꞌralalu ꞌdar yanni yïbüpïnä nunnu ar elelle elelleng na ar ape apepeng gwanni gwujaw gwani Ngwaalu enggaci gwe gwanni gwuma aar nje gwe enggaci Yicung gwanni gwuma aar nje gwe urnidi gwani näjï ngwani jayi gwüngün. 4 Yiꞌral ye giyee, nginde gwuminje ätädä ngwujaꞌri ngwüngün ngwanni ngwaru ngwe ngwuru guꞌru gipa nunnu ar ngwe acajidi gïdrü didi Ngwaalu ar abra keng gïdïdlä gwanni gwïndï ndi amiꞌra gwanni gwuki.
5 Yiru giyee ngwäyälü, undar be ngwäy gwulleny ngaa gendani jaying ndi ämnï Ngwaalu gwalu na ndi jayi gwalu gendanar bebereng 6 na ndi bebere gwalu gendanar määtäng lingina na ndi määtä lingina gwalu gendanar orꞌtemajing na ndi orꞌtemaji gwalu gendanar drü 7 na gïdrü dalu gendanar ämnäjïdïng yengga na ndi ämnäjïdï yengga gwalu gendanar ämnäjïdïng. 8 Ndi ari manari ngaa lima ätï ngwujaꞌri yiꞌremna giyee ngwïrälü, ngwa je gäbïcï ngaa laꞌti la muli nono na ndi undi ngwuyanu ngwalu ngwudi bebere gwalu gwani Deleny dege dani Yicu Kirictu. 9 Ma be ari gwere nggwo gwaꞌti ätï ngwujaꞌri ngwee, nggwo be gwombajidalu giyoranu ngwürïmü ngwäy ndi engga gweere, gwuma dudanu ndi ari gwuma aar jaꞌrima keng nono gwüngün gwudi gwerreng.
10 Yäy gu no lani ngwänggärï, jädänär be ndi gäbïcï urniding na äbrïng gwani nga nga, ngwuru ꞌdidanu. Ndi ari manari ngaa lati ärrï yiꞌral giyee, ngaa laꞌti la ïꞌdï aꞌtur 11 na laji la je ätädä guꞌru gipa ndi änï giyelenyanu yidi gwurꞌtaling yidi Deleny na Gilang gwege gwani Yicu Kirictu.
Yïjïr yidi gitab
12 No nggwa je diwayiniyi yiꞌral giyee yomon ꞌdar ma je ni lenge. Na ndi ari ngaa gilo lïmätïnälü ꞌdïꞌdäny ngwujaꞌri ngwee ngwuru ꞌdidanu ngwätädä je gweneno. 13 Äny gwaru yijaw nda je ꞌritiyi yaꞌranya yalu ngwujaꞌri ngwe ngwee äny nggwona gwumidu gilingeno. 14 Ndi ari äny gwülïngïdï gomon gima ja gito nggwa ayi, anaku enggacar nyi gu Delenyalu dege dani Yicu Kirictu gilingenalu. 15 Nyi be ari nggwa undi ngwäy nyi engga ndi ari ma ji miny ayi, ngaa la burni giyomon ꞌdar ndi diwayini yiꞌral giyee.
16 Ndi ari nyii laꞌti gwuja ngwujaꞌri ngwüꞌtïyä je ngwüjï ngwümnä aar je ondaji bebere gwe gwegen anni ondacara je yiima ye na oꞌra gwe gwudi Deleny dege dani Yicu Kirictu. Nyii be ru lanni länggädï yelenya yüngün. 17 Ndi ari Papa gwuru Ngwaalu gwätädïng guꞌru gipa ngwünäjïnï kaji ganni giꞌdinginiiny ge yal yanni yüllü ndi näjï gwudi yeleny aar ari, “Gïjï güny giru nggee ganni gämnïny, ganni nggo gïjädïnyänü gwulleny.” 1.17 Mätä 17.5; Murkuj 9.7; Luka 9.35 18 Änyängä liꞌdingina yal giyee ngwänï ngwe ngwärï yanni yüllü kerala anni jiiny le kenala ganni gijuꞌru.
19 Na yïjïr yondaja je ngwïjïr ngwudi Ngwaalu yïgäbïcï nje nyii gu lengedani, na ya gu jayani ndi ari ngaa je geꞌte ngwäy nono aar ru nono lamba lüllïnä ngwaalu ngwümnänü ꞌdi a ngwaalu uꞌri ara je gu guurrum giru daapa ꞌtädä ngwuji giyigoranu yalu.* 1.19 Gurrum giru daapa gani Yicu Kirictu gwanni gwadi oꞌra gwanni gwadi gäbïcï yiꞌral ꞌdar aar linginni gilingenalu. ꞌTäälü 22.16; Luka 1.78 20 Giyiꞌral giyee ꞌdar, lïngïdär ndi ari yïjïr yere yaꞌti yüllïnä bebere gwe gwudi dïjï dümnä. 21 Ndi ari yïjïr yaꞌti aꞌtur yïndï bupi gwe gwudi dïjï dümnä, a be ngwüjï ru ngwudi Ngwaalu ngwondaja anaku enggaca je gu Ngwaalu Lïgïꞌrïm le lanni Lijuꞌru.