1 A be ꞌto ngwüjänü gwerre, ngwïjïr ngwuju gu ngwoko ngwuru ngwuꞌduru anaku ngwoorta ngwaji ngwa ji ꞌdanggalanu ꞌto ngwanni ngwuru ngwuꞌduru. Ngindenga la apa ngwujaꞌri ngwuru ꞌter ngwudi dudi ngwanni ngwaꞌti ätï ngwäyänü ngwa aar je änïjï ngwujaꞌranu ngwudi Ngwaalu, la ꞌrïꞌrïnyïnï Delenya danni düꞌrädïjälü. Ngindenga la dudiyi yigoꞌro yegen puprang ape gwe yiꞌral yanni yiki. 2 A lonyadu la gwuji gay gidi yidigany yegen. Ngwujaꞌri ngwegen ngwanni ngwuki ngwärräär je, ma je ngwüjï engga, ngwa ondaji ngwujaꞌri ngwanni ngwaꞌti jaw giyobo yanni yätï ngwäyänü. 3 Ndi ubanu gwegen, ngwoorta ngwee ngwa je aganu lütülütü gwe gwegen aar gu mbojaji. Lima je le Ngwaalu obalu ꞌtuꞌtu gwerre na dudi gwegen nggwo gwaꞌti ola ngwaalinganu.

4 Ndi ari manari Ngwaalu ngwaꞌti je yïꞌrr ïnädï yanni yärrü yiꞌral yanni yiki, ngwuje gatu gidel didi yiꞌrendeny, aar gu gennadalu yuꞌrung ye gïdïrïmänü nunnu aar dünïcï gomon gegen gadi je ge Ngwaalu obalu. 5 Na manari Ngwaalu ngwaꞌti je dïdlä ïnädï duubu anni mung dingada därä ngwape ngwüjü ngwanni ngwüꞌtüdänü gïdrü didi Ngwaalu. Ngwube etadi ndi Nuwa gweꞌte pu gwanni gwondacu ngwüjü ngwujaꞌri ngwe ngwanni ngwüdünälü na ngwüjï ngwüngün kwoꞌra täꞌrïl (7) ꞌdogo. 6 Manari Ngwaalu ngwübïdälü ngwüjü ngwe ngwudi yündär yani Jadum na Gamura ngwuje uꞌdiyi ꞌdi aar ru ngwaru nunnu ngwuje geꞌte aar ru gora gidi ngwüjï ngwanni ngwadi ꞌtü gïdränü. 7 A manari Ngwaalu ngwüꞌtüyä Luding gwuru dïjï dïdünälü gwanni gwünäcä yidigany yidi ngwüjü ngwïndälü mbüny. 8 Ndi ari nginde gwüdünälü ngwuji ꞌdenggenanu giyomon giyomon, ngwangiꞌri yündä ndi dünälü gwudi lingeno lüngün gwani apepe gwegen gwanni gwïndädälü mbüny gwanni gwänggädïng ngwuꞌdingini. 9 Manari yiꞌral giyee yiru gu no, Deleny diru be dïlïngïdï awa ndi ꞌtüyï ngwüjü ngwanni ngwo gïdrü düngün gïdïrbänü na ngwulenge ndi määtädä ngwüjälü ngwanni ngwaꞌti dünälü aar rerani ꞌdi a gomon ila gadi aar je ge obalu. 10 Gwece gwece ngwüjï ngwanni ngwati gwuji gay gidi amiꞌra gwudi dudi gwudi drü danni diki aar ci yelenyalu mireny.

Ngwoorta ngwee ngwuru ngwuꞌduru ngwuꞌranu aar üꞌrü ngwänänü, ngwaꞌti je yedeny ïtï ndi ari ngwulem ngwüjï ngwünäjïnä kerala. 11 ꞌDi yïꞌrr yanni yojemana aar ätänï yiima, yati ꞌti aru ngwulem ndi lo ngwüjü ngwünäjïnä kerala yiꞌduru ngwäyänü Gideleny. 12 A be ngwüjï ngwee ngwaru ngwulem giyiꞌral yaꞌti aar ye lïngïdädï yorto ye ngwaalinga. Ngindenga liru nono yooꞌra yaꞌti yaꞌranya yïlïngïnä gu nanninganu ndi a je ngwüjï ummi aar je ꞌrinye. Ngwuru nono ngwäng ngwadi dudi ꞌto.

13 Giyiꞌral giyee ya aar je gwäꞌräcï yanni yiki gwani apepe gwegen gwanni gwuki. Yiꞌral yegen yidi lingeno yami ndi ärrïnï ꞌdi ati aar je ärrï gilingenalu tar. Ngindenga lati ärrï yiꞌral yanni yiki ngaa le be acajidi ngwaalu ngweꞌte pu gwüpäng aar be jayanu gwulleny aar be ru yirled aar ru yaaru. 14 Ngwäy ngwe ngwonyadu yïjïnänü, ngwati ꞌti dünü aꞌtur ndi ärrï yiꞌral yanni yiki. Ngwati ꞌduꞌdi ngwüjü ngwanni ngwamiꞌratu. Yigor yegen yima äbräjï ndi ubanu lima aar je gu ꞌtäjï ngwünyü. 15 Ngindenga lima je gay doda ganni gïdünälü lima agu gay pïr gima aar gwuji gidi gur luubu gani Balaam gïjï gidi Bäwür gwanni gwübïjä ngwilinyanu ngwudi yiiru yanni yiki. 16 A be nginde gwuma gwe gïndüꞌrï rimalu gwani yiiru yüngün yanni yiki.Gïndüꞌrï ganni gati ꞌti ondaja, ngwondaji ngwujaꞌri ngwudi dïjï dümnä ngwüdünäjï yeꞌrra yidi dïjïr dani Balaam.

17 Ngwüjï ngwee ngwuru nono ngwelo ngwundu yaanu aar ru nono gïbäꞌrü gapu dirun gaꞌti nu giranyu. Ngwo ngwügïꞌtïjäär je ngwaalingalu ngwümnä dïrïmänü ꞌtïꞌtïn. 18 Ndi ari ngwuju ngwulemalu mbüny ngwujaꞌri aar ngwe piyi yigoꞌro yegen ndi päcï ngwüjälü aar je ꞌdoꞌda ndi amiꞌra gwudi lingeno gwanni gwuki. Ngwati ꞌduꞌdi ngwüjü ngwanni ngwo ndi abra ngwüjü ngwanni ngwelella dïlä dani dudi. 19 Aar je üꞌrïcï ngwujaꞌri ngwani gätïnï linginalu a be giyigoꞌro yegen aar be ru ngwïnäd ngwudi yiꞌral yidi dudi ndi ari dïjï dati ru dïnäd giyiꞌral yere yanni yima ru yorta ꞌdünggüngün. 20 Manari lima abra keng gwudi ngwüjï ngwudi dïdlä aar lenge Delenya danni diru Gilang dani Yicu Kirictu, aar be oꞌre aar oꞌraci keng aar ru ngwïnäd mana, ngindenga la be kani gwene ndi ke gwegen gwudi gwerreng. 21 Yaadi jayani adinar lima ꞌti lïngïdï gay gidi dünälü ndi ari aar lenge aar be gwürläcï ngwujaꞌri ngwanni ngwujuꞌru luꞌra ngwanni ngwenggacaar je. 22 Lädï je gu ngwujaꞌri nono ngwee ngwanni ngwaru nu, “Ginyen gati oꞌraci ngwony ngwanni ngwüꞌdrgümïdïng je.” 2.22 Gagitada 26.11 Na ngwujaꞌri ngwanni ngwaru nu, “Düdr danni dijaw nono, dati oꞌre ndi datiꞌri giyibrogocanu.”