1 Wɑɑtʋ ɩnɩ ɩ tɑɑ kɛ́ Wulɑʋ sɔsɔ Akusi kpɑɑlɑɑ sɩ pɑɑ kɑlɑ ɩ tɛtʋ tǝnɑ tɑɑ yǝlɑɑ. 2 Kʋkɑlʋɣʋ kɑncɑɑlɑɣɑ ŋyǝŋkʋ kʋnɛ kʋ lɑpɑ Silii kʋfǝnɛɛ Kiliniyusi pɔɔlɛ tɑɑ. 3 Ḿpʋ́ɣʋ́ pɑɑ wei ɩ polɑ ɩ ɩcɑtɛ tɑɑ sɩ pɑ́ kɑlɑ-ɩ.

4 Pǝ tɔɔ kɛ́ Yosɛɛfʋ lɩɩnɑ Nɑsɑlɛtɩ ɩcɑtɛ kɛ Kɑlilee nɑ ɩ́ polo Yutɑ kɛ wulɑʋ Tɑfiiti ɩcɑtɛ Pɛtǝlɛhɛm tɑɑ, 5 sɩ pɑ́ kɑlɑ ɩ́ nɑ ɩ ɑmʋsɑɣɑ ɑhonto Mɑlɩ. Pǝ tɑɣɑ pʋlʋ, ɩ kɛ́ Tɑfiiti lʋlʋɣʋ tɑɑ tʋ. 6 Ḿpʋ́ɣʋ́ wɑɑtʋ wei pɑ wɛ tǝnɑ tɔ, Mɑlɩ lʋlʋɣʋ tɑlɑɑ. 7 Ɩlɛnɑ ɩ́ lʋlɩ ɩ kɑncɑɑlɑɣɑ pǝyɑɣɑ kɛ ɑpɑlʋpǝyɑɣɑ. Nɑ ɩ́ hɩɩsɩ-kɛɣɛ wontu kʋtɔɣɔʋ tǝtʋlɛ tɑɑ nɑ ɩ́ tɑkɩ-kɛɣɛ sɑɑlɑsɩ. Pǝ tɑɣɑ pʋlʋ, tǝcɑɣɑlɛ tɑɑ tɑlɑ-wɛɣɛ mʋʋlɑɑ tǝsʋʋlɛ.

8 Tiikilɑɑ nɑpǝlɩ pɑɑ wɛ ɩcɑtɛ ńtɛ́ tǝ tɑwɑ tɑɑ nɑ pɑ́ feŋiɣi pɑ kɑlǝkǝŋ kɛ ɑhoo ɑhoo. 9 Tǝnɑɣɑ Tɑcɑɑ ɩsɔtɑɑ tillu kɔmɑ pɑ kiŋ nɑ Tɑcɑɑ teeli nɑ pɑ tɔɔ ɩsɩɩ kɔkɔ sɔsɔɔŋkɑ nyɑlǝmǝlɛ. Ḿpʋ́ɣʋ́ sɔɣɔntʋ kpɑ-wɛɣɛ sɔsɔm. 10 Amɑ ɩsɔtɑɑ tillu tɔmɑ-wɛ sɩ: Sɔɣɔntʋ ɩ́ tɑɑ kpɑ-mɛ. Pǝ tɑɣɑ pʋlʋ, mɑ kɔmɑɣɑ sɩ mɑ heeliɣi-mɛɣɛ tɔm kʋpɑntʋ nti yǝlɑɑ tǝnɑ lɑŋɑ kɑ́ hɛɛnɑ teu tɔ. 11 Tɔm ntǝɣǝlɛ sɩ, pɑ lʋlɑ-mɛɣɛ wɑɑsʋlʋ kɛ sɑŋɑ ɑhoo ɑnɛɣɛ Tɑfiiti ɩcɑtɛ tɑɑ wei ɩ kɛ́ Tɑcɑɑ Kilisiti tɔ. 12 Ɩɩ nɑɑ ɩsǝnɑ ɩ́ kɑ́ nyǝnɑ-ɩ tɔ. Ɩ́ kɑ́ mɑɣɑnɑ pɑ hɩɩsɑ ɑhʋlʋm nɔɣɔlʋ kɛ wontu kʋtɔɣɔʋ tǝtʋlɛ tɑɑ nɑ pɑ́ tɑkɑ-ɩ sɑɑlɑsɩ.

13 Ḿpʋ́ɣʋ́ ɩsɔtɑɑ tillɑɑ sɑmɑɑ tuutuumɑ sɔɔsɑ ɩsɔtɑɑ tillu ɩnɩ ɩ tɔɔ kɛ́ kpɑkpɑɑ nɑ pɑ́ sɑŋ Ɩsɔ nɑ yontu sɩ:

15 Wɑɑtʋ wei ɩsɔtɑɑ tillɑɑ yelɑ tiikilɑɑ nɑ pɑ́ mǝlɩ ɩsɔtɑɑ tɔ tiikilɑɑ mpɛ pɑ tɔmɑ pɑ tǝmɑ sɩ: Tǝ́ kʋlɩ nɑ tǝ́ polo Pɛtǝlɛhɛm tǝnɑ, nɑ tǝ́ nɑ́ mpi pǝ lɑpɑ nɑ Tɑcɑɑ heeliɣi-tʋɣʋ pǝ tɔm tɔ.

16 Ḿpʋ́ɣʋ́ tiikilɑɑ lɔɣɔ pɑ tɩ nɑ pɑ́ mɑɣɑnɑ Mɑlɩ nɑ Yosɛɛfʋ nɑ pɑ́ hɩɩsɑ ɑhʋlʋm ɩnǝɣɩ wontu kʋtɔɣɔʋ tǝtʋlɛ tɑɑ. 17 Tiikilɑɑ tɛmɑ-kɛɣɛ nɑʋ, ɩlɛnɑ pɑ́ kɛɛsɩ nti ɩsɔtɑɑ tillu kɑ tɛmɑ-wɛɣɛ heeluɣu kɛ ɑhʋlʋm ɩnɩ ɩ tɔm tɔ. 18 Ḿpʋ́ɣʋ́ piti kpɑ pɑ tǝnɑ mpɑ pɑ nɩɩ tiikilɑɑ tɔm ntɩ tɔ. 19 Ḿpʋ́ɣʋ́ Mɑlɩ tɔkɑ tɔm ntɩ tǝ tǝnɑɣɑ ɩ tɑɑ nɑ ɩ́ mɑɣɑsǝɣɩ tǝ hʋwɛɛ. 20 Tiikilɑɑ mpɛ pɑ mǝlɑɣɑ kpente ɩlɛnɑ, pɑ́ pʋɣʋlǝɣɩ Ɩsɔ sɔsɔɔntʋ nɑ pɑ́ sɑŋɩ-ɩ pǝ tǝnɑ mpi pɑ nɩɩwɑ nɑ mpi pɑ nɑwɑ tɔ pǝ tɔɔ. Pǝ tɑɣɑ pʋlʋ, pǝ tǝnɑ pǝ lɑpɑ teitei kɛ́ ɩsɩɩ ɩsɔtɑɑ tillu kɑ kɛɛsʋɣʋ-wɛ tɔ.

21 Pǝyɑɣɑ ŋkɛ kɑ kʋyɛɛŋ kɔmɑ nɑ pǝ́ tɑlɑ pǝlefɛi nɑɑnʋwɑ sɩ pɑ pɛlǝɣɩ-kɛ tɔ, pɑ hɑ-kɛɣɛ hǝtɛ nte ɩsɔtɑɑ tillu kɑ heelɑ-wɛ nɑ pǝ́cɔ́ kɑ too kpɑɣɑ kɑ hɔɣɔ tɔ sɩ Yesu.

22 Ḿpʋ́ɣʋ́ wɑɑtʋ wei pǝ tɑpɑ sɩ Yosɛɛfʋ nɑ Mɑlɩ pɑ́ kɔtɩ pɑ tɩ tɑɣɑnʋɣʋ tɔɔ ɩsɩɩ pɑɑ kɛɛsʋɣʋ Moisi kʋsǝsɩɩɩtʋ tɑɑ tɔ, pɑ ponɑ pǝyɑɣɑ kɛ Yosɑlɛm sɩ pɑ hʋ́lɩ́-kɛɣɛ Tɑcɑɑ. 23 Pǝ tɑɣɑ pʋlʋ, pɑɑ ŋmɑɑ ḿpʋ́ɣʋ́ Tɑcɑɑ kʋsǝsɩɩtʋ tɑɑ kɛ́ sɩ: Pɑɑ ɑpɑlʋpǝyɑɣɑ kɑncɑɑlɑɣɑ nyǝŋkɑ ŋkɑ Tɑcɑɑ tǝnnɑ-kɛ. 24 Nɑ pɑ polɑɑ sɩ pɑ lɑkɩ kɔtɑɣɑ nɑ ɩhokɑsɩ nɑɑlɛ yɑɑ ɑlukukunɑɑ nɑɑlɛ ɩsɩɩ pɑɑ kɛɛsʋɣʋ Tɑcɑɑ kʋsǝsɩɩtʋ tɑɑ tɔ.

25 Apɑlʋ nɔɣɔlʋ ɩ kɑ wɛ Yosɑlɛm nɑ pɑ́ yɑɑ-ɩ sɩ Simiyɔŋ. Apɑlʋ ɩnɩ ɩ tǝŋɑɣɑ tɑmpɑnɑ, nɑ ɩ ɩsǝlɛ sɛɛnɑ Ɩsɔ tǝmlɛ, nɑ ɩ tɑŋɑɑ sɩ ɩ́ nɑ wei ɩ kɑ́ kɔɔ nɑ ɩ́ wɑɑsɩ Ɩsɛɣɛlɩ nyǝ́mɑ tɔ. Nɑ Feesuɣu Nɑŋŋtʋ wɛ ɩ wɑɑlɩ. 26 Feesuɣu Nɑŋŋtʋ ɩnɩ ɩ kɑ hʋlǝnɑ-ɩ sɩ ɩ kɑ́ nɑ́ Tɑcɑɑ tillu Mesii nɑ pǝ́cɔ́ ɩ́ sɩ. 27 Ḿpʋ́ɣʋ́ Feesuɣu Nɑŋŋtʋ lɑpɑ nɑ ɩ́ polo Ɩsɔ tǝsɛɛlɛ tɑɑ kɛ́ wɑɑtʋ wei ɑhʋlʋm cɑɑ nɑ ɩ too pɑ ponɑ-ɩ sɩ pɑ lɑkɩ ɩ tɔɔ kɛ́ mpi pɑɑ sɩɩwɑ tɔ. 28 Ḿpʋ́ɣʋ́ ɩ mʋ-ɩ ɩ niŋ tɑɑ nɑ ɩ́ sɛɛ Ɩsɔ sɩ:

33 Ḿpʋ́ɣʋ́ piti kpɑ kɑ cɑɑ nɑ kɑ too nɑ nti ɩnɩ ɩ yɔɣɔtɑ kɑ tɔɔ kɛ́ mpʋ tɔ. 34 Ḿpʋ́ɣʋ́ Simiyɔŋ koolɑ-wɛɣɛ kʋpɑntʋ nɑ ɩ́ tɔ kɑ too Mɑlɩ sɩ: Pǝyɑɣɑ kɑnɛ kɑ nyǝntɛ ntɛ́ sɩ kɑ́ hu pɑɣɑlɛ nɑ kɑ́ kʋsɩ pɑɣɑlɛ kɛ Ɩsɛɣɛlɩ tɑɑ. Yǝlɑɑ pɑɣɑlɛ kɑ́ kpɛɛsǝnɑ mpi ɩ kɑ́ hʋ́lɩ́-wɛ tɔ. 35 Pɩɩ kuli pɑ pɑɣɑlɛ tɑɑ tɔmnɑɑ tɔɔ tǝkeelee. Lɑŋwɑkǝllɛ sɔsɔɔlɛ kɑ́ tʋlɩ toto nyɑɣɑ pʋ́ʋ́ɣʋ́ ɩsɩɩ lɑɣɑtɛ kɛ pɑ sɔpɑ-ŋ.

36 Ɩsɔ kʋyɔɣɔtʋtʋ tɛlǝsʋlʋ ɑlʋnyǝŋ nɔɣɔlʋ ɩ kɑ wɛ tǝnɑ tɔtɔ. Asɛɛ lʋlʋɣʋ tɑɑ tʋ Fɑnʋwɛlɩ pɛɛlɔ Anɑ. Ɩ kpɑtǝlɑ teu tǝkuŋkuŋku. Ɩ sɑɑʋ ɩ pɑɑlʋ tɔ, pɩɩsɩ nɑɑtosompɔɣɔlɑɣɑ kɛ pɑ cɑɣɑɑ ɩlɛnɑ ɩ́lɛ́ ɩ sɩ. 37 Nɑ ɩnɩ ɩ cɑɣɑ mpʋ hɑlǝnɑ pɩɩsɩ nɩɩnɑɑsɑ nɑ liɣiti. Ɩlɛ Ɩsɔ tǝsɛɛlɛ tɑɑ kɛ́ ɩ kɑ wɛ tɑm nɑ ɩ́ lɑkɩ Ɩsɔ tǝmlɛ kɛ ilim nɑ ɑhoo. Pɑɑ Ɩsɔ sǝlǝmʋɣʋ ɩ sǝlǝmǝɣɩ, pɑɑ nɔhɔkʋtʋ ɩ hɔkǝɣɩ. 38 Simiyɔŋ pɑ tɔŋnɑ ḿpʋ́ɣʋ́ lɑpʋ tɔɣɔ ɩnɩ ɩ kɔmɑ nɑ ɩ́ sʋʋ Ɩsɔ kɛ́ sɑm, nɑ ɩ́ yɔɣɔtǝɣǝnɑ pɑ tǝnɑ mpɑ pɑ tɑŋɑɑ sɩ Ɩsɔ ɩ́ wɑɑsɩ Yosɑlɛm tɔɣɔ Yesu tɔm.

39 Wɑɑtʋ wei pɑ tɛmɑ pǝ tǝnɑ mpi pɑ kɛɛsɑ Tɑcɑɑ kʋsǝsɩɩtʋ tɑɑ tɔɣɔ lɑpʋ tɔ, Yosɛɛfʋ nɑ Mɑlɩ pɑ mǝlɑ pɑ tɛ Nɑsɑlɛtɩ kɛ Kɑlilee. 40 Mpʋ tɔ nɑ pǝyɑɣɑ tɔŋnɑ pɩɩʋ nɑ kɑ tɔnʋɣʋ tɔkǝɣɩ nɑ kɑ́ tɔŋnɑ lɑɣɑtʋ nyǝm kɛ teu nɑ Ɩsɔ wɛ kɑ wɑɑlɩ.

41 Pɑɑ pǝnɑɣɑ ŋkɑ Yesu nyǝ́mɑ pukɑɣɑ Yosɑlɛm kɛ Tɛɛʋ ɑcimɑ tɔɣɔʋ kɛ́. 42 Yesu lʋlʋɣʋ pǝnɑɣɑ nɑɑnʋwɑ nɑ nɑɑlɛ nyǝŋkɑ tɑɑ pɑ polɑ ɑcimɑ tɔtɔ ɩsɩɩ pɑ tɩɩ pukuɣu tɔ. 43 Acimɑ wɛɛ kɔmɑ nɑ ɑ tɛ ɩlɛnɑ ɩ nyǝ́mɑ tʋ mpɑɑʋ nɑ pɑ́ kpeŋ. Amɑ Yesu nɑ́ sɑɑlɑ Yosɑlɛm, nɑ ɩ nyǝ́mɑ tɑ nyɩ mpʋ. 44 Pɛlɛ pɑɑ hʋʋwɑ sɩ ntɑnyɩ ɩ wɛ tɔntɑɑ lɛlɑɑ tɑɑ, hɑlǝnɑ pɑ́ tɔ ilim nɑ pǝ tɛm ɩlɛnɑ pɑ́ sʋʋ-ɩ pɛɛkʋɣʋ kɛ pɑ lʋlʋɣʋ nyǝ́mɑ nɑ pɑ ɑsǝmɑɑ kiŋ. 45 Pɑ tɑ nɑ-ɩ, ɩlɛnɑ pɑ́ tɑɣɑnɩ Yosɑlɛm kɛ mǝlʋɣʋ sɩ pɑ pɛɛkǝɣɩ-ɩ. 46 Pǝ lɑpɑ kʋyɛɛŋ tooso ɩlɛnɑ pɑ́ nɑ-ɩ Ɩsɔ tǝsɛɛlɛ tɑɑ nɑ ɩ́ cɑɣɑ Yutɑ nyǝ́mɑ sɛɣɛsǝlɑɑ sɔsɑɑ kiŋ nɑ ɩ́ nɩɩkɩ pɑ sɛɣɛsʋɣʋ nɑ ɩ́ pɔɔsǝɣɩ-wɛɣɛ tɔmnɑɑ. 47 Nɑ ɩ nyǝm nɑ nti ɩ cɔɔkɑɣɑ-wɛ tɔ tǝ lɑpɑ pɑ tǝnɑ mpɑ pɑ nɩɩkɑɣɑ tɔɣɔ piti kɛ́ sɔsɔm. 48 Wɑɑtʋ wei ɩ nyǝ́mɑ nɑ-ɩ tɔ sɔɣɔntʋ kpɑ-wɛ. Ɩlɛnɑ ɩ too tɔmɩ-ɩ sɩ: Mɑ pǝyɑɣɑ, n lɑpɑ-tʋɣʋ mpʋ suwe? Nyǝnɩ, mɑ́ nɑ nyɑ́ cɑɑ tǝ pɛɛkɑ-ŋ nɑ lɑŋwɑkǝllɛ sɔsɔɔlɛ kɛ́.

49 Ḿpʋ́ɣʋ́ Yesu cɔwɑ sɩ: Pepe tɔɔ kɛ́ mǝ pɛɛkɑɣɑ-m? Ɩ́ tɑ nyɩ tɑɑ sɩ pǝ wɛɛ kɛ́ sɩ mɑ́ wɛɛ mɑ Cɑɑ tǝyɑɣɑ tɑɑ?

50 Amɑ pɛlɛ pɑ tɑ cɛkǝnɑ nti ɩ yɔɣɔtɑ mpʋ tɔ. 51 Tǝnɑɣɑ ɩ tǝŋɑ-wɛ nɑ pɑ́ mǝlɩ Nɑsɑlɛtɩ, nɑ ɩ́ nɩɩkǝnɑ-wɛɣɛ pǝ tǝnɑ pǝ tɑɑ. Amɑ ɩ too tɔkɑ tɔm tǝnɛ ɩnɩ tǝ tǝnɑɣɑ ɩ tɑɑ. 52 Yesu tɔŋnɑ pɩɩʋ nɑ ɩ lɑɣɑtʋ nyǝm tɔŋnɑ sɔɔsʋɣʋ, nɑ Ɩsɔ nɑ yǝlɑɑ pɑ lɑŋɑ tɔŋnɑ-ɩ hɛɛnɑʋ kɛ tɑm.