Atham woIuanna 2
Atham ieꞌra ammakka oIuanna pokurrot
Lon lonothon
Lon elli lotte lokat lapul pothothïlettat poIeccuo ipoccot kꞌran itti oIuanna. Kwakurro lon ere ca coul ioccokothe lon loIeccuo kwaik pakurrine cungkut coul wꞌrek ioccokothe lon loIeccuo ana kwocciet cungkut coul wen itti, 'Pul ipopari ipa Kapik kakkarot ana nyukul nyung' (1.1).
OIuanna paik pakwarikiet ul ioccokothe lon loIeccuo itti waꞌrungkot nothoccïkot lon ilonthomat loKapik ana oꞌrungkot ithongarot (1.5–6). Kwaꞌretto nakin itti okin thakannoccïkot lon loul iangkene lon loIeccuo ngkarra iꞌrat lon ilaik ïcat ileret oIeccuo. (1.7–11)
Lon ilaik iatham
1. Thomicco (1.1–3)
2. Occïkothe lon ilonthomat loKapik (1.4–6)
3. Lon lothaꞌretto noul iangkene ngkarra (1.7–11)
4. Thomicco ithocothothe (1.12–13)
1
1 Lon elli naun oIuanna pul iponu lon ikkun loul wonoppan toKapik.
Laine opangkin ipopari ipa Kapik kakkarot akin othakka ul wung ana nyukul nyung, inya mpongothe ïcarïcat ana okorronno oka okin thulluk anaruk okin appik ithina lon ilaik ïcat 2 ana nti ilon ilaik ïcat ilaik iaron ana laka naron thupuththuput.
3 AKapik oNgappa ana oIeccuo oMiccie ukul wung, ethet ton thoporot ana thiak ana thoporot ana thongarot athoka thonnon ïcarïcat.
Thongarot ana lon ilaik ïcat
4 Lopirierin noka cannan akka mpiothe nyukul nyon inyarran inyanon thaik ilon loIeccuo, nyaik nyammakot lon ilaik ïcat ammakka oNgappa piꞌretheron itti oron thakkot. 5 Ana inenni pangkin ipopari, mpaik pakannokurrinung lon lꞌrek ilie loKapik, anaruk ilaron thaththonat nci nomun. Mpaik pipittot non itti oron thangarot appik. 6 Ana thongarot itti oron thaccïkot lon ila oIeccuo iꞌret ton. Ammakka onon thoccïkothe nci nomun itti lon lung itti onon thikkoik ithongarot.
7 Ul ionu karra ana iakannangkot itti oIeccuo oMiccie paat ngka kopul iponyi waat woppot ana woppathe nocapu ncik appik. Pul ammakka emprïk ponu karra ana kwꞌrat lon loMiccie. 8 Noꞌrumoik othakka itti annokorronno uret ngre cik ianon thorekot anaruk aKapik okkenon kicce. 9 Okkwi ipaik pakannommakot thongkene thoMiccie ana kwaik pakkot lon loka, kwella Kapik ana okkwi ipaik pammakot thongkene thoMiccie kwonu Oththan ana ukul. 10 Okkwi ipakannangkot thongkene enthi, kirrinni onekothok tuan ana manna ikkiek cik. 11 Okkwi ipikkierok cik kwongothe lon lung ana okin thakkettet lon lung ilokithak akin aththut.
Lon ilacothot
12 Mponu loppot ila mpongothe itti mpakurrinenon anaruk mpakannangkot itti mpakurrot nokaꞌrmacak. Mponu nocïkït itti mpathomïrïkot non anerekanthet non othakka itti aron opira noka cannan appik. 13 Nyukul nyopangkang ipopari ipa Kapik kummot nti iul akin othakka thung nthaik thamicco non.