Atham woIuanna 3
Atham iꞌrapuruk ammakka oIuanna pokurrot
Lon lonothon
Lon elli ilotte lokat lokurrakot cakuruk mpul iprïk pothothïlettat oIuanna. Ook pen akkakurrot atham ieꞌra woIuanna. Kwaik pakurrine opuruko pung oKaiac (1.1). OIuanna popirat noka akka kwoccïkothe itti oKaiac poꞌrumot nothomakot kathar kolon ilaik ïcat (1.3–4).
OIuanna popirat noka naKaiac akka kwaik pittarot ul ioccokothe lon loIeccuo iaik wanyaro nomoꞌrong angkene ul wꞌrek lon loIeccuo (1.5). Kwomerekekathok itti kwamakot lon iloporot loThimiththrioc (1.12). Ana kwaꞌrettathe naak itti kwaccot kït nolon loThioththreppec ipere lon ngkarra ana ipꞌrat ikkie ul cik ioccokothe lon loIeccuo (1.9–10).
Lon ilaik iatham
1. Thomicco (1.1–4)
2. Thikkie ul cik iaththomrikarot (1.5–8)
3. OThioththreppec pietto ka kongo (1.9–10)
4. Innikothe lon iloporot (1.11–12)
5. Thomicco ithocothothe (1.13–15)
1
1 Lon elli naun pul iponu lon ikkun loul wonoppan toKapik,
Laine opangkin oKaioc ipa mpongothe ïcarïcat.
2 Pangkin, mpaꞌra ngaꞌrama itti ngkwaka poporot noka ana alon okanung loporot appik ana ngkwarthuk paik pammakot lon loKapik. 3 Lopirierin noka cannan akka opang ponnongon thꞌrek thaat ncïnang ana okin therenin lon lothoꞌrumo tholon lon ilaik ïcat ana itti onon thaik thammakot papenang tat. 4 Mpella thopira noka cannan nothopira noka nolon ilanoccïkot itti nyukul nyin nyaik nyammakot, lon ilaik ïcat.
OKaiac popiriettat noka
5 Pangkin, ngkwoꞌrumot nolon ila ngkwaik pakkinthet opangkangon, okin thantoka manna kwat kang. 6 Okin therenet ul ioccokothe lon loIeccuo lon lothongarot thon. Ngkwakkinthet kin lon loporot athïot kin ikathar ngkathar ikaKapik kongothe. 7 Akka okin theot akin otherene ul lon loIeccuo, okin thakinnipittat ul iakannoccokot lon loMiccie aꞌrupu. 8 Ittina oron ithoccokothe lon loMiccie thonu itti oron thittarot ul wen iaik wangkene lon loMiccie othakka itti aron oka uraththut iire iaik ngarekakine lon ilaik ïcat.
OThioththreppec ana oThimeththrec
9 Mpokurrinet ul ioccokothe lon loIeccuo anaruk oThioththreppec ipongothe itti kwaka pul iprïk ana kwakannangkot lon lonnon. 10 Amma mpaat ana mperene non lon ila kwaik pakkot, ana eret ton llon ilokithak. Kwakannocoꞌrat cïnang tulluk, anaruk kwakinnikkie opang ponnongon cik ithaik there lon loMiccie ana akwokïcce opilingon nti iul ioccokothe lon loIeccuo.
11 Pangkin, kirrnni innikkot lon ilokithak anaruk innikothe lon iloporot. Okkwi ipakkot lon iloporot ook poKapik. Ana okkwi ipakkot lon ilokithak kwommat Kapik. 12 Anaruk ul woppot werethe oThimiththrioc appik llon loporot ana ilaik ïcat. Onïn cakuruk therethok llon loporot ana onon nthina itti lon lin laik ïcat.
Lon ilacothot
13 Mponu lon loppot ila mpongothe itti mpakurrinung anaruk mpakannangkot itti mpakurrinthung nokaꞌrmacak. 14 Mpongothe itti mpimmang othakka itti arit ere arit okathaccetto toma. 15 Athomicco oka naung. Opangkingon ithanïn thaik cene thaik thammiccong. Ommicci opang ponnongon cïnang nꞌran wen.