1 ङा पावलए ङाल्‍योनी जेस तोबो ङाबिन्‍ती लिज़्‍या, ङा ओल ख्रीस मिताव प़ाइँत सज़िम्‍सिद जेस चावनी वाज़ पाँव ङापैंज़्‍या। खाली जेनी ख्वा ख्वाराए, “पावल गेस उलिक सुस ज़ मापाँधुन्‍या छेपोवा स्‍यासो उलिज़्याव, होङ बाद ताकितर हाप हाप ख्‍यान्‍या स्‍यासो चिथीर परींज़्याव,” है लिज़्यार दी लिन्‍या ङाथैज़्या। 2 है जैद जेल्‍योङ ङाहुक ङारिसए हाप हाप ख्यान्‍या मिताव ताताक। नो जेल्‍योङावराए ङालाई, “आवए ओय़ेन परमेस्‍वरनिकाव हुव माःक, मिँए युँ स्‍यानी पले·सिउ य़ेन ची,” है दाज़्‍यावराए जूँनी ते तखेप ङारासिङार्के सैं है ङालिज़्‍या। 3 आव गेक्‍याँ मिँनिकाव ओतादी ब मिँए युँ स्‍यानी गेमाइ़सिए। 4 गे गेहत्‍यार फरी मिँए युँ स्‍यानी जैसिउ माःक, परमेस्‍वरए ओसक्तीनी जैसिउर ची। नो गेहत्‍यारनी ज़ छे छे ङम्‍सिउ गरर तैःन्‍या गेले। 5 ननी ज़ गे मिँए युँ स्‍यानी ससैसिउ पाँर स़ोनो परमेस्‍वरए ओपाँकिन तँदाङाव स॰व पाँर पल्‍तैद यामिनर सम़ैद्याद याबुद्धी यागहकरास ज़ ख्रीसए उधूँल गेराझाःज़्‍या। 6 जे परमेस्‍वरए ओपाँत उघुरिउर जेतावत माउघुरिउ भरिरालाई उघुरिउर जैन्‍यात झाःसिद लिज़्‍यावर गेताज़्‍या।

7 जे जेङ़ाकाव वाज़ रँःन्‍या माःक। नो जेखार्लाव, “ख्रीसए उमींर ते गे ची,” है लिज़्‍यावराए यापाँ साचो ज़ लिन्‍या याथ·रैज़्याव ताकिन गेलाई मनी या माँःती ख्रीसए उमींर ज़ लिन्‍या ओथ·रैसिरक। 8 ङा निताव ङापाँए प्रभुए ओयाँव हकनी सघ्योःसिद ङापाँज़्‍याव मिताव ओरैंःदी ब ननी ङालाज माहुइ, जेलाई बले·न्‍याए जूँनी माःक, जेलाई पाथ पारैन्‍याए जूँनी ची। 9 ङासर्ज़्‍याव पाँर ब जेलाई हाप हाप ख्यान्‍याए जूँनी माःक। 10 हैदी ब जेल्‍योङाव ख्वा ख्वाराए है लिन्‍या लेर, “ओचिथीरानी ते बनै छे छे ङम्‍सिउ कर्रा उलिज़्‍याव मिताव रैंःज़्‍या, खाली गेङ़ाक ते त्‍यात्‍या तितिव काम मालागिउ मिताव रैंःज़्‍या।” 11 निताव पाँज़्‍यावराए आव ब सैंद ओनैरक, गे आनी गेचिथील किताव गेपरींज़्‍या, नङ हुद गेय़ेन ब हिताव ज़ तारिज़्‍या।

12 खाली ख्रीसए ओपाँ सैंन्‍यात ‘गेकिन सु ज़ माले’ है लिज़्‍यावरास ते गे इताव कान्‍ल ज़ मागनिसिउर नाः घ्योःवरास गेमादाँजिसिधुइ! निताव याक्‍याँए याक्‍याँलाई गोइँद बा बा सोगोइसिज़्‍यावर ते झन काता ज़ मासैंन्‍यार ताज़्‍यार। 13 गे ते परमेस्‍वरए ओयासिउ गोइँकिन आगल्‍या ससैद ब गेमापाँए, सघ्योःसिद ब गेमापाँए। बुरू परमेस्‍वरए ओयासिउ गोइँ भरिल जे ब जेलिज़्‍या। 14 नो जेल्‍योङाव गेदोव य़ेन परमेस्‍वरए ओयासिउ गोइँकिन आगल्‍या माले। जेल्‍योङाव ख्रीसए ओपाँ सथैवर प़ाइँरानी ङ़ातावर गे ज़ गेल्‍यो। 15 जेल्‍योङाव गेदोव य़ेन परमेस्‍वरए ओगोइँकिन ङ़ाकसै बाद छुतराए याथालिउ पाँलाई तुपैद गेसघ्योःसिज़्‍याव ते माःक। खाली नो जेल्‍योङाव गेदोव य़ेनरानी जे जेयुँर झन ज़ हुप्‍द जेल्‍योनी नो पाँर प़ाइँदा रा·सिद परमेस्‍वरए ओयासिउ गोइँ ब जेनी झन ज़ ओघ्‍योःक लिद जेल्‍योङ आस गेदोज़्या। 16 निताव ओताकिन ची जेकिन होदाङाव पो भरिङ ब ख्रीसए ओपाँ सथैव दैन्‍या गेले। ननी ज़ छुतराए याथालिउलाई गे गेतुपैव मिताव ब तान्‍या माले, परमेस्‍वरए ओयासिउ गोइँकिन सघ्योःसिन्‍या ब तान्‍या गेमाले। 17 है जैद नो धर्मसास्‍त्रलाव सर्सिउ मिताव, “जो सघ्योःसिउ पैंज़्‍याव, प्रभुनी वाज़ ओसघ्योःसिक।” 10:17 यर ९:२४ 18 ओलनी केर्घे जैसिज़्‍याव मिँलाई प्रभुए माभैंःए, ओल प्रभुए ओथ·रैव वाज़ ताज़्‍या।