1 यार्ती माल्‍योराए यापाँज़्याव मिताव ङापाँर तखेप सहिद्याव ताके। जेसहिया ज़ लिद ङायुँ हुबो ज़ लिज़्‍या। 2 किताव जेल्‍योदा परमेस्‍वरए उयुँ थू ओताज़्‍याव, ङा ङायुँ मनी हिताव ज़ ताज़्‍या। तोबो ल़ुज़ालाई ज़िम्‍ज़ात ज़ ऩिद यानैज़्‍याव मिताव ङा मनी जेलाई ख्रीसए उमिनत थामिद छैंवर जैद ख्रीसए तछा लाँन्‍यार जैद ङानैचिए। 3 खाली जेल्‍योङ तोबो पाँत ङायुँ माहुबो लिज़्‍या। किताव छुल्‍या घुलए प़ाइँरानी उस॰कताव मेंमा हब्बालाई उझुकैव, हिताव ज़ जे मनी कसाराक ख्रीसए ओसतत मालिद बलेस्‍द तँदा बार्‍या लिद ङायुँ थू ताद छे·व ज़ ङालिज़्‍या। 11:3 उत ३:१-५,१३ 4 जेल्‍योङ गेकिन छुतर हुद गे गेसथैचिउ येसुकिन छुत येसुए उजूँनी यासथैचिक, स़ोनो जे जेदैव छैंव पुरूसकिन छुत पुरूस मितावर यारैंःक, स़ोनो परमेस्‍वरए ओपाँकिन छुत पाँर यासथैचिक नो भरी बेहार ज़ तीद बनै जेजम्‍कैज़्‍या! 5 खाली नो जेल्‍योङाव घेप्‍पा जैसिद परमेस्‍वरए ओपाँत सैंन्‍या जैसिज़्‍यावराकिन ङा ज़िम्‍ज़ा ते ङामालिखेहो। 6 पाँन्‍यात चावस ङामापाँधुदी ब सैंन्‍यात ते कान्‍ल ज़ कम्‍ती ङामाले। निताव ङाय़ेन जेल्‍योङ प़ाइँनी ज़ सतैंद नैद ङायाचिए।

7 जेल्‍योङ ङा सज़िम्‍सिद जेलाई सघ्योःन्‍याए जूँनी जेल्‍योनी काता ज़ मारैद परमेस्‍वरए ओपाँ जेलाई अइज़ ङासथैचिउए मादान्‍या ङादोव ते मालिखेहो। 8 हो बेलाक जेलाई पाथ पारैन्‍याए जूँनी छुत मन्‍दलीराए यासघैनाक नोरालाई ङारालुतिउ मिताव ज़ ताके। 9 ङा जेल्‍योङ ङालिज़्‍याव बेलाक ङालाई माथैंव मायो·वल जेलाई सुलाई ज़ ङामाघचैचिए। ङालाई नो माथैंव मायो·वल माकेदोनियानी हुव गेनैं गेमेंराए ज़ सयो·द्याँकेर। है जैद जेलाई नो बेलाक ब ङामाघचैचिए, आकिन ब घचैन्‍या ङामाले। 10 ख्रीसए साचो ओपाँ ङास उलिज़्यावए है ङादाचिज़्या, अखैया भरिल सुए ज़ आव सघ्योःसिद ङापाँवलाई वैंधुन्‍या मालेर। 11 नो जेल्‍योनी काता ज़ ङामारैज़्‍याव जेलाई मया मादाद ते माःक, जेल्‍योदा ङायुँ थू ङाजैज़्‍याव ओल परमेस्‍वरए ज़ सैंज़्‍याव। 12 ङ़ादाकिन ङादोज़्‍याव मिताव माऱास्‍द दाव ज़ नैन्‍या ङाले। हो ताकिन यानी सघ्योःसिद गे मिताव जैसिद लुइसिहुज़्‍यावराए यायेम ओलनी ज़ सूइसिद थाम थुम तान्‍या लेर। 13 नोर अऩाकल ज़ ख्रीसए ओसाची मितावर जैसिद मिँरालाई झुकैद परमेस्‍वरए ओपाँ बले·द पैज़्‍यावर ची। 14 आव पाँत अचम्‍ब ताताच्‍यो। सैतानए मनी मिँरालाई झुकैन्‍याए जूँनी कैताक ज़गैवलाव परमेस्‍वरए ओचाकर्‍या मिताव ब जैसिज़्‍या। 15 है जैद नोए ओबाँदार मनी मिँरालाई झुकैन्‍याए जूँनी परमेस्‍वरए ओय़ेन दाज़्‍याव मितावर याजैसिक धर्मी मितावर रैंःज़्‍यार नो काता अचम्‍बलाव पाँ ज़ माःक। नोराए यासजा यादोव य़ेननी ज़ दैरिज़्‍यार।

16 ङा ङ़ादा है ङादाचिज़्‍याव मिताव, इताव पाँर ङासम्‍जैचिक त्‍यात्‍या तितिव उर्ती माल्‍यो पाँज़्‍याव मिताव जेमाजैनाकिन ताखेहो है ङालिज़्‍या। खाली जो मिताव जेजैनादी ब ङालाई ते थिक ज़, जेलाई सम्‍जैन्‍याए जूँनी आथ पाला तखेप सघ्योःसिद ङापाँरिज़्‍या। 17 आव जेस ङापाँरिज़्‍याव पाँ प्रभुनिकाव हुव ते माःक, तोबो उर्ती माल्‍योए सघ्योःसिद ओपाँज़्‍याव मिताव ज़ ङापाँरिज़्‍या। 18 जेल्‍योङाव पाँज़्‍यावर नितावर यातावए ङा ब जेस नितावनी ज़ ङापाँरिज़्‍या। 19 खाली जे निताव सैंन्‍या जैसिज़्‍यावराए मासैंन्‍याराए यापाँ सहिद जेराएधुज़्‍याव मिताव आव उर्ती माल्‍यो ङापाँ ब सहिद जेयाँया ज़ है ङालिज़्‍या! 20 जे बनै सहिधुन्‍यार जेलिज़्‍या। जेलाई माचाहिउ चलन धूँल किद यानैचिज़्‍याव ब जेसहिज़्‍या, धुतैद याज़्‍युचिज़्‍याव ब जेसहिज़्‍या, सघ्योःसिद जेङ़ैताव याजैसिक ब जेसहिज़्‍या, मुत्‍का यासकैचिक ब जेसहिज़्‍या! 21 ङा निताव य़ेनराल नोराकिन काता ज़ मासैंन्‍या मिताव ङातावए जेङ़ाक भाल्‍सिउ ङाङाःर ब माले।

है जैद ङा ब तखेप नोराए मिताव फदवाल्‍या जैसिद उर्ती माल्‍यो ङापाँज़्‍या। 22 नोर, “गे ते हिब्रू जातलावर ज़,” है लिज़्‍यार, ङा मनी हैज़ ङालिज़्‍या। नोर, “गे ते इस्राएलीर,” है लिज़्‍यार, ङा ब इस्राएली ज़। नोर फरी, “गे ते अब्राहामए ओथोलावर,” है लिज़्‍यार, ङा ब होलाव ज़। 23 नोर ख्रीसए ओय़ेन दोज़्‍यावर रो? ङा ते झन होराकिन ब ङादोज़्‍या। आव उर्ती माल्‍यो ङापाँ जेसहिधुया ज़ है ङालिज़्‍या। नोराए काता य़ेन ची दाद नैरदा, नोराकिन ङा ते कुधु य़ेन ज़ दाद ङानै। नोराकिन झ्‍यालखानाल ब कुधु पाला ङालिके, कुधु पाला मागनिसिधुन्‍या रीःसी ऩिन्‍या ब ङाताके, एकतार सिन्या मिताव छ्यासल ब ङालिज़्या। 24 यहूदीराए याकुइनी उनान्‍चालीस खेप पाँच पाला ङारीःसिके। 11:24 ब्य २५:३ 25 स़ोंखेप झुइए प़ोनाकेर, तखेप लुँए ब झेःनाकेर। ऱीलाव जहाजल ङाबाक ब जहाजर स़ोंखेप फुद तखेप तला तरी भरी ऱील ज़ ङालिके। 26 ङा एकम्‍न्‍या येमत ङाबाक कैताक भलए ओछ्यास ब ताके, कैताक चोरराए छ्यास ब ताके। कैताक हाप हाप ख्याज़्‍याव ङाजातलावराए खार्ल ब ङापरिके, कैताक छुत जातलाव मचिज़्‍यावराए खार्ल ब ङापरिके। नो ङापरिज़्‍याव छ्यास कैताक सहरल ब ताज़्‍या, कैताक साइँसुइँवक ब ताज़्या, कैताक समुन्‍द्रल ब ताज़्या, कैताक ख्रीसए उमिनताव मिताव जैसिज़्यावरास ब ताज़्या। 27 कैताक फरी बनै नाल क़्‍याव च्‍या·सिउ य़ेनर ङासहिज़्‍या। कुधु पाला ऱीर ओव मादैद करे ज़ लिद बिनु क्‍वा ज़्‍यूँःवए भुम भुम गूद ङाससँज़्‍या। 28 नोकिन झन पो पोङाव मन्‍दलीराए जूँनी ङायुँ थू ताद बनै घ्योःव सोगो ङादोज़्‍या। 29 नोर कैताराक परमेस्‍वरए उमिनत माथ॰रिधुद याधलिकिन नो ङा ङाधलिउ मिताव ज़ ताज़्‍या। कैताराक फरी नोर मादान्‍या य़ेनराल यापरिक ङायुँर स्‍यासे तेद वाल्‍सिवा वाल्‍सिवा ङाताज़्‍या।

30 ङा फदवाल्‍या जैसिन्‍या ताकिन ङादैव दुखराए ङालाई यासज़िम्‍नावनी वाज़ ङाजैसिखेहो। 31 आव पाँत धुत ङामापाँए, प्रभु येसुए ओबाबु गेपरमेस्‍वरए ज़ सैंज़्‍याव। नोलाई खर्क ज़ माखेम्‍न्‍या धन्‍याकाव ओताक। 32 ङा दमस्‍कसल ङालिज़्‍याक ब नलाव राजा अरितसए उधूँलाव हाकिमए ङालाई क्‍योःन्‍याए जूँनी सहरनी पुलुस्‍न्‍या येम येमक पाल्‍यार यानैक्‍यो। 33 नो बेलाक ङानैंराए ङालाई तोबो भेल झाःद नो सहरलाई बारिसिउ भार्नाताव झ्यालनी मेल झरैनाकेर। है जैद नो हाकिमए उकुइनी ङापुलुस्के।