1 Ebram nianindi 99, baing Toxoratamona owa masok mana, saing harua ba, “Nga Urana Haringing Sibuna. Bing ulibu kubolu maringing sibuna maxagia xaung oxola mana kubolu dian tela. 2 Baing bagula ngahau haruangugua liwe mana kitam, saing bagula ngalibu bakbagimdi disok xumang sibuna.”

3 Baing Ebram gung king tuxundi mari, ta ramramonoa titia, saing Urana harua na ba, 4 “Ulungu to. Haruangua nga ngahau ranguaung bing: Bagula uwa numanuma xumana mugangadinga. 5 Hatata ila bagula duxu yama Ebram* Ebram namuxinoa taiti tibura yanoa. te. Bagula duxung ba Ebraham† Ebraham namuxinoa lipu xumana tibudinga.. Namua na ngamogung ba usok numanuma xumana mugangadinga.✡ Rom 4:17 6 Bagula ngalibu bakbagimdi disok xumana buk, bu duwa numanumadi, saing teladi bagula disok xaitamoxidi. 7 Bagula ngahau haruanga li liwe mana kitam xaung bakbagimdi disok kimu, saing bagula wa bungingbunginalo. Haruanga ngahau bing: Ngawa Urana ungia xaung Urana mana bakbakgimdi disok kimu.✡ Luk 1:55 8 Titia Kenan hatata uwa mana bila lobu, bagula ngasina ba wa ungia xaung bakbagim(ga)di disok kimuya maung dingia bungingbunginalo. Baing bagula ngawa Urana dingia.”✡ Aposel 7:5

9 Baing Urana harua na Ebraham ba, “Ne ung ba, bing ung gusu mana haruangua ngahau ba, ung xaung bakbagimdi disok kimu bing asu mana. 10 Haruangua ngahau ranguaung xaung bakbagimdi disok kimu, haruangua asu mana bing: Lup longgalo liwe mang bing axuxu sanggadingdi.✡ Aposel 7:8; Rom 4:11 11 Axuxu sanggaimdi ba mogu haruangua ngahau liwe makira. 12 Hatata saing ila, gara lup longgalo liwe mang, bungina xaidabidingdi 8 bing axuxu sanggadingdi. Adi li xauna: lipuxim oxata olanggamdi baudingdi dahayaudi numaimia xaung adi agimdi rangua bakbak teladi—adi bakbagim sibundi te. 13 Heku baudingdi dahayaudi numamia kimbo ugimdi, ding longgalo bing axuxu sanggadingdi. Bila balau haruangua ngahau ranguang bagula muganganoa mana sanggaimdi bu hatanga wa bungingbunginalo. 14 Lup gaxarea xap sangga xuxungan te bing asuka sangua bakbagima namua na dali haruangua ngahau ranguang ba.”

15 Baing Urana harua na Ebraham muli ba, “Ne hainima Sarai ba, hatata ila uxu yanoa ba Saraiu tai. Yanoa bagula Sara. 16 Bagula ngasina guxama na, saing maxuna bagula sina gara lup tela naung mana. Bagula ngasina guxama na bu wa numanuma xumana mugangadinga. Teladi bagula disok bakbakdi xaitamoxidingdi.”

17 Baing Ebraham gung king tuxundi mari, ta ramramonoa titia, saing masisi saing hatum ba, “Nianigudi 100. Bagula ngasok gara tibuna baru? Baing Sara nianindi 90. Bagula hayau gara baru?” 18 Baing Ebraham harua na Urana ba, “Bola unai mana Ismael xap guxamingama!”

19 Baing Urana harua ba, “Tegu. Hainima Sara bagula hayau gara lup naung, bing uxu yanoa ba Aisak.‡ Aisak namuxinoa masisi. Bagula ngahau haruangua rangua xaung bakbagindi disok kimu, saing bagula wa bungingbunginalo. 20 Ne Ismael ba, ngalungung baing. Maxuna bagula ngasina guxama na. Bagula ngalibu bakbagindi disok xumana buk. Bagula sok yanam haringing 12 tibuding, saing bagula garandi disok bakbak sabanga sibuna. 21 Ning Aisak naga bagula ngahau haruangagua rangua, lipua Sara bagula hayau naung bila sobakka baguli niani etuama.” 22 Harua rangua Ebraham laing sup, baing Urana sauya.

23 Mana xaidapka naga Ebraham xap garanoa Ismael xaung lipuxing oxata olanggam longgalo dahayaudi numania xaung adi gimdi, lup longgalo duwa numania, xapdi mala saing xuxu sanggadingdi, bila Urana bala ba. 24 Ebraham nianindi 99 bungina duxuxu sangganoa, 25 saing garanoa Ismael nianindi 13. 26 Mana xaidapka naga duxuxu Ebraham Ismael tang sanggadingdi. 27 Baing duxuxu Ebraham lipuxing oxata olanggam longgalo sanggadingdi xauna, adi dahayaudi numania xaung adi gimdi rangua bakbak teladi. Duxuxu lup numanam longgalo rangua Ebraham.