10
Iesusna up aŋgɨrena ramtaɨrta iremb
(Mak 3.13-19 na Luk 6.12-16)
1 Mt 9.35, na Mk 3.13-15, na 6.7, na Lk 9.1Karica Iesusa ndona iŋa raŋgairena ramtaɨr parniŋapa mbut mbuniŋmo aca kɨpca, ma minmo ŋerŋgaur ŋgorikca mo kecarinanapa, minmo titocna roumbbebca moi laiŋga mona gagrar neaŋrina.
2 Na an ramtaɨr parniŋapa mbuniŋa anna mina mana up aŋgɨrena ramtaɨr. Na mina irembca gade, out ŋgoinna ramootta Saimon, na mana i ianna anna Pita, na ianna Pitana lap Andru. Na ianna Iemis, ma Sebedina nuoc, na Iemisna lappa Ion. 3 Na ianna Pilip, na ianna Batolomiu, na ianna Tomas, na ianna Matiu, ma kitcartukar iurena ramoot, na ianna Iemis, ma Alpiusna nuoc, na ianna Tadias. 4 Na ianna Saimon, ma Selotna wiwitnan, na ianna Iudas Iskariot, ma ande an ramoot, iŋmbaia ma Iesusmo puŋnaŋgepta para tɨkca mina mamo mo ŋgocrainande.
Iesusa ndona parniŋapa mbut mbuniŋna up aŋgɨrena ramtaɨrmo aiŋa neaŋgatna
(Mak 6.7-13 na Luk 9.1-5)
5 Up 13.46Karica Iesusa ndona parniŋapa mbut mbuniŋna up aŋgɨrena ramtaɨrpaikmo mbagɨrica taŋga, minmo aindopatna, “Ne Iudana meikramtaɨr wanaiŋ ndambuŋa kai taŋ teac, na Samariana auŋemb toco kai taŋca mbuk teac. 6 Ier 50.6, na Mt 15.24Na ne Israelna meikramtaɨr tambuŋa taŋ, mina an sipsipara ŋaŋaoca taŋrena kirar. 7 Mt 3.2, na 4.17, na Lk 10.9-11 Lk 10.4-12Na ne taŋ te, minmo gan kammo wiwiti, ‘Tamuŋna auŋna bubuoca kɨpca marambuŋairi.’ 8 Na ne taŋ te, an roumbbebta meikramtaɨrmo, moi laiŋga mo, na menacrinanmo, mac moca ŋgepna, na roumb lepananmo moi laiŋga mo te, an ŋerŋgaur ŋgorikcaptanmo, moi laiŋga mo. Na an reaca ne aŋgɨrinanna, ne mba oikri, ne wanaiŋ ŋgoin naaŋgɨrina. Aintik ne meikramtaɨrmo wanaiŋa neaŋ, na ne mimo kituknduk aŋgɨnake, kai digi teac.
9 Lk 10.4“Na ne kitukndukca kai aŋgɨca kituknduk apaocna reikca kai tɨkca aŋgɨca taŋ teac. 10 Ndu 18.31, na Lk 10.7, na 1 Ko 9.14, na 1 Ti 5.18Na ne taŋraŋ te, ne reik apaocna rambca kai aŋgɨ teac, na tik ŋgapaoc kai aŋgɨ teac, co, or ŋgapaoca kai aŋgɨ teac, na nena utiŋga dɨpaca taŋrena komborap kai aŋgɨ taŋ teac. Na ramootta aiŋa mo te, mina manmo amta reikmo neaŋnandet.
11 “Na ne taŋca auŋ aniac, co auŋ teker ian ndaru te, ne an auŋna ramoot wandoŋ ianna ore wat te, ne taŋca manap eaca taŋca ne an auŋa tɨkcarica taŋ. 12 Lk 10.5-6Na ne kac ianna mbuk te, ne an kacna meikramtaɨrmo aindop, ‘Raraŋ Aetaniaca nemo moi laŋa mo.’ 13 Na an kacna meikramtaɨra nemo toŋgoca nemo actɨk te, nena kam laŋa minap eac. Na mina nemo actɨkca ndiarna tɨpca mo ŋgocor te, ne Raraŋ Aetaniacmo mbendeica digica, ma minmo kai otac teac.
14 Up 18.6“Ainda moca ramoot ianna nemo ndona kac naaŋgɨca taŋca ndiarna tɨpca mo ŋgocor, na nena kamma waracna ŋate te, ne taŋna mo te, ne an kac, co, auŋ tɨkcarina mo te, ne ndorita orniŋna tiacar kacopca taŋ.* Iudanaŋgepna tɨp kirara gaind, an orniŋna tiacar kacoprenanna, anna mina an auŋmo mba mac nda taŋitndai. Na aina our tukica taŋrena tɨp toco anna kirar. 15 RL 19.24-28, na Mt 11.24, na Iu 1.7Na aku nemo gidik ŋgoinna aindopnande, Raraŋ Aetaniacna ritri waparacna ra laru te, gan auŋna meikramtaɨrta makukar minanna Sodom auŋapa Gomora auŋmo kunda tamuŋ ŋgoin.”
Makukara mana up aŋgɨrena ramtaɨrmo laruraŋnande
(Mak 13.9-13 na Luk 21.12-17)
16 Lk 10.3, na In 10.12, na Up 20.29, na Ro 16.19, na 1 Ko 14.20, na Epe 5.15Karica Iesusa minmo gaind mac mbopatna, ne warac, aku nenmo sipsiparta kirara mandaca ne raŋna piriŋta rɨkna inik mataŋgek. Aintik ne nduopna tɨpna kirara raŋgai, nena momona reikca matau lamŋica ne mo. Na ne an ŋgorikca, mina riŋnai ŋgacrenanna kirara raŋgaica, ne tɨp ŋgoreac ianna mona iroa kai aŋgɨ teac.
17 Mt 24.9 Mk 13.9-11, na Lk 12.11-12, na 21.12-15Te, ne matau wat, ramtaɨra nemo, mina ninik waŋgorta out naaŋgɨ taŋca mina nemo ritri waparaca moca, mina nemo mina Iudana mimitpac aŋgɨrena kaikta inikca tɨkca nemo pi ŋgoreac ŋgoinna pinande. 18 Up 25.23, na 27.24Na mina aukmo, mo irikna iroar, aŋgɨ te, mina nenmo, ninik waŋgor anikapa gagrirta ramtaɨr paŋaind tambuŋ naaŋgɨ taŋnande. Ainda moca ramtaɨr paŋaindapa Iudana meikramtaɨr wanaiŋmo, kam wembaŋ laŋmo minmo wiwitina. 19 In 14.26, na 1 Ko 2.4Na mina nemo aŋgɨca ritri waparacna ramtaɨrta outta tik te, ne kai nanambi gainda kai lamŋi teac, aia titocna kam ndopit? Na aia kaina kam ndopit? An mbopna kɨdrɨk laru te, Raraŋ Aetaniaca ma nemo an mbopna kamma ma nemo wandacnande. 20 Na an kamma nen ŋgoinna mba mbopit, nena Raraŋ Aetaniacna Ŋeroŋa ma ndo nena upa tɨkca, an kamb topnande.
21 Mai 7.6, na Mt 10.35, na Lk 21.16“Na ramootta ndona lap, co, lacaumo ritri waparaca tɨkca, manmo mo menacna kammo mbopnandet. Na aetera mina ndorita mombonikmo, an tɨpembta kirar kabea monandet. Na mombonikca ndorita ameraetermo puŋnaŋgepca moca, ramtaɨrmo mbopca minmo mo menacna kamb topnandet. 22 Mt 24.9, na 24.13, na Mk 13.13, na Lk 21.17, na In 15.18-21Na meikramtaɨra muruŋa nemo nikkatacrinandet, na anna gaind, aukna ia nenap eacrenan. Na meikramtaɨra gagraca eaca taŋca gan tiacarpaikna mamamaina ra, Raraŋ Aetaniaca minmo mac nda aŋgɨnandet.” 23 Mt 16.28Na mina nemo auŋ ianna tɨkca tɨp ŋgoreaca mo te, ne ŋgepca kɨpcarica kabena auŋa taŋ. Aku nemo gidik ŋgoinna aindopnande, ne Israelna auŋembta aiŋa kocnai mai ŋgocor te, Ramootna Nuoca ma kɨpnande.
24 Lk 6.40, na In 13.16, na 15.20“Na riripti aŋgɨrena ramootta, ma ndona riripti neaŋrena ramootmo, ma tamuŋmbaia wanaiŋ, na mbaiŋa morena ramootta, ma ndona kacootmo tamuŋmbaia mba eacitndai. 25 Mt 9.34, na Mk 3.22, na Lk 11.15Na riripti aŋgɨrena ramootta ma taŋca ndona riripti aŋgɨrena ramootna kirara tɨk te, ma mɨn. Na mbaiŋa morena ramoot toco, ma ndona kacootna kirara tɨk te, ma toco, ma mɨn. Aintik mina an kacna aetmo an i Belsebul tɨk te, aia lamŋinande, mina Belsebulna wiwitnanmo mina minmo, an iremb ŋgorik koinda tɨknandet.”
Ne Raraŋ Aetaniacna rugut mo
26 Mk 4.22, na Lk 8.17Karica Iesusa gaind mac mbopatna, “Ramtaɨra nemo tɨpemb kirarir ŋgorikca morenanmo, ne rugutta kai mo teac. An tamaia moca eacrena reikca muruŋa larui raekca tɨk te. An iŋgoroca eacrena kamb toco muruŋa larui raekca tɨkca meikramtaɨra muruŋa waraci lamŋi garacnande. 27 Na kaina kamma aku nemo neaupa tɨkca mboprinanna, an kamma ne ra tɨki mbopnandet. Na kamma ne laŋanna ndorita kour puŋga waracrinanna, anna ne kaik tamuŋa wɨtɨkca aca mbopca meikramtaɨra waracnande. 28 Ais 8.12-13, na Lk 12.4, na Ie 4.12, na 1 Pi 3.14Na ne an tikembca moa menacrena ramtaɨrtarica kai rugut mo teac, mina nena ŋerŋgaura mba mo menacitndai, wanaiŋ, ne Raraŋ Aetaniac niŋgikmo nanambi. Ma ndo nena tikembapa nena ŋerŋgaurmo menac ŋgocorta iarwara wɨrrena tac nakena mɨn.
29 “Na ne lamŋirena, meikramtaɨra ŋgorac teker mbuniŋmo, mina kituknduk teker mbuŋa oikrena. Nena Aetta ma an ŋgorikmo ma mataua raupŋirena. Na ma toŋgo ŋgocor te, an ŋgorikta ianna pitrikca mba irikca menacitndai. 30 Lk 21.18, na Up 27.34Na Raraŋ Aetaniaca nena paŋaindta lakoarta kirir motoco ma nduca maica, ma mina ŋgaŋganŋgɨarmo ma lamŋireke, na ma nemo mataua lamŋirena. 31 Mt 6.26, na 12.12Ainda moca ne kai rugut mo teac, ne an ŋgorik noikmo tamuŋ ŋgoin maeacreke.”
Aia Iesusna wiwitta eacrinanna aia anna numbira kai moa mbop teac
32 Lk 12.8, na Ro 10.9-10, na KIEK 3.5Karica Iesusa gaind mac mbopatna, “Ramootta meikramtaɨrmo aindoprena, ma aukna wiwitta eacrenanna, auk toco ndona tamuŋna Aetmo aindopnande, an ramootta ma auknan. 33 Mk 8.38, na Lk 9.26, na 2 Ti 2.12Na ramootta meikramtaɨrmo aindoprena, ma aukna wiwitnanna wanaiŋ. Auk toco, ndona tamuŋna Aetmo aindopnande, an ramootta ma auknanna wanaiŋ.”
Iesusa runduŋa mo ŋgepna kɨprinan
(Luk 12.51-53 na 14.26-27)
34 Lk 12.49-53Karica Iesusa gaind mac mbopatna, “Ne gainda kai lamŋi teac, aku gan tiacarpaikna runduikca mo menacna nakɨprina. Wanaiŋ. Aku runduikca mo menacna mba kɨpri, aku runduŋna bugrim aŋgɨ kɨpca runduikca mo ŋgepna. 35 Mai 7.6Na aku kɨprinanna, aku runduik warkica kɨprina. Ramootta ndona aetmo ruŋnande, na mooŋa ndona aemmo ruŋnande, na tamooŋa ndona kaŋgaitna aemmap ruŋnande. 36 Ŋap 41.9, na 55.13Na ramootna laiplacarapa mana aemmapa aetta, manmo puŋnaŋgepca monande.
37 TW 33.9, na Lk 14.26“Na ramootta ndona aemmapa aetmo matau ŋgoinna matŋirenanna, na aukmo matau ŋgoinna mba matŋirenanna, ma aukna iŋa raŋgairena ramootta mba eacitndai. Na ramootta ndona nuoc, co mooŋa matau ŋgoinna matŋirenanna, na aukmo matŋi ŋgocor, ma aukna iŋa raŋgairena ramootta mba eacnandet. 38 Mt 16.24, na Mk 8.34, na Lk 9.23Na ramootta ndona kekeracna ikca mbuk ŋgocor, na ma aukmo raŋgai ŋgocor, ma aukna iŋa raŋgairena ramootta mba eacitndait.† Kekeracna ik: Na ramootta ndona kekeracna ik mbuk ŋgocor te. Anna gaind, an mɨnna meikramtaɨra tɨpemb kirarir ŋgorikca mo te, Romnaŋgepca minmo mo menacna mo te, mina minmo aŋgɨca ik nakeraca mina anna keraca menacnande. Aintik mina meikramtaɨrmo moca mina ndorita kekeracna ikmo mbukca an keracna taupca taŋnandet. Na Iesusa an kam roor mbuŋa meikramtaɨrmo wandacrena, meikramtaɨra mana iŋa raŋgairenan ŋgoinna, mina menacna kocroca eacraŋ. 39 Mt 16.25, na Mk 8.35, na Lk 9.24, na 17.33, na In 12.25Na ramootta ndona eteacna watmo, ma laŋa mo ndop te, ma ndona an iarwarna eteacna wat mananna ma mo kecarinandet. Na ramootta aukna moca ndona wat kecari te, ma an iarwar eteacna wat aŋgɨnande.”
Ramootta Karaisna raŋgairena ramtaɨr ŋgotac te, ma opoik laŋa aŋgɨnande
(Mak 9.41)
40 Mk 9.37, na Lk 9.48, na 10.16, na In 13.20Karica Iesusa gaind mac mbopatna, “Ramootta nemo aŋgɨca ndiarna tɨpca mo te, ma aukmo aŋgɨca ndiarna tɨp mamori. Na ramootta aukmo actɨk te, ma Raraŋ Aetaniacmo aca tɨkrina, ma ndo aukmo mandaca aku kɨprina. 41 1 GRP 17.10, na 2 GRP 4.8Na ramoot ianna gaind ndamŋi te, ‘Ma ramma morena ramootmo otacna mo te, na ma ianmo ndona kac naaŋgɨ taŋca mamo raupŋi te,’ Raraŋ Aetaniaca ma an ramootmo, an rambca morena ramtaɨra aŋgɨrena reik laiŋga ma aŋgɨnande. Na ramoot ianna gainda ndamŋi te, ‘Ma ramoot wandoŋ ianna raupŋi te, ma ndona kac naaŋgɨ taŋca mamo raupŋi te,’ an ramootta Raraŋ Aetaniaca manmo an ramoot wandoŋ aŋgɨrena reik laiŋga neaŋnandet. 42 Mt 18.5-6, na 25.40, na Mk 9.41, na Ib 6.10Na ramoot ianna gaind ndamŋi te, ‘Aku Iesusna iŋa raŋgairena ramoot ian.’ Te, ma an meikramtaɨra iremb kocortanmo, puk kaba wanaiŋa neaŋ te, aku nemo gidik ŋgoinna aindopnande, an ramootta Raraŋ Aetaniaca manmo reac laŋ ŋgoinna neaŋnandet.”
10:1 Mt 9.35, na Mk 3.13-15, na 6.7, na Lk 9.1
10:7 Mt 3.2, na 4.17, na Lk 10.9-11
10:10 Ndu 18.31, na Lk 10.7, na 1 Ko 9.14, na 1 Ti 5.18
*10:14 Iudanaŋgepna tɨp kirara gaind, an orniŋna tiacar kacoprenanna, anna mina an auŋmo mba mac nda taŋitndai. Na aina our tukica taŋrena tɨp toco anna kirar.
10:15 RL 19.24-28, na Mt 11.24, na Iu 1.7
10:16 Lk 10.3, na In 10.12, na Up 20.29, na Ro 16.19, na 1 Ko 14.20, na Epe 5.15
10:17 Mk 13.9-11, na Lk 12.11-12, na 21.12-15
10:21 Mai 7.6, na Mt 10.35, na Lk 21.16
10:22 Mt 24.9, na 24.13, na Mk 13.13, na Lk 21.17, na In 15.18-21
10:24 Lk 6.40, na In 13.16, na 15.20
10:25 Mt 9.34, na Mk 3.22, na Lk 11.15
10:28 Ais 8.12-13, na Lk 12.4, na Ie 4.12, na 1 Pi 3.14
10:32 Lk 12.8, na Ro 10.9-10, na KIEK 3.5
10:33 Mk 8.38, na Lk 9.26, na 2 Ti 2.12
10:35 Mai 7.6
10:36 Ŋap 41.9, na 55.13
10:38 Mt 16.24, na Mk 8.34, na Lk 9.23
†10:38 Kekeracna ik: Na ramootta ndona kekeracna ik mbuk ŋgocor te. Anna gaind, an mɨnna meikramtaɨra tɨpemb kirarir ŋgorikca mo te, Romnaŋgepca minmo mo menacna mo te, mina minmo aŋgɨca ik nakeraca mina anna keraca menacnande. Aintik mina meikramtaɨrmo moca mina ndorita kekeracna ikmo mbukca an keracna taupca taŋnandet. Na Iesusa an kam roor mbuŋa meikramtaɨrmo wandacrena, meikramtaɨra mana iŋa raŋgairenan ŋgoinna, mina menacna kocroca eacraŋ.
10:39 Mt 16.25, na Mk 8.35, na Lk 9.24, na 17.33, na In 12.25
10:40 Mk 9.37, na Lk 9.48, na 10.16, na In 13.20
10:41 1 GRP 17.10, na 2 GRP 4.8
10:42 Mt 18.5-6, na 25.40, na Mk 9.41, na Ib 6.10