1 Una negana ai Nahasa, tau Amono, ela, Iabese-gilead e koua heḡeḡe. Bena Iabese taudia iboudiai ese Nahasa e hereva henia, eto, Aita herohemaino, bena ai ese oi isiaimu baia lao heni. 2 A Nahasa, tau Amono, ese e haere henidia, eto, Aita herohemaino; ḡau tamona lau na matamui idibadia baina gibodia lasi, unu amo Israel idoinai baina hahemaraia. 3 Bena labese tau-badadia ese e hamaoroa, eto, Dina hitu ba henimai, unu dina lalodiai ai ese gwaukau taudia baia siaidia Israel tanona idoinai. Bena tau ta ese basinema hamaurimai, ai na oi dekemu ai baia raka lasi. 4 Hari gwaukau taudia na Saulo ena hanua, Gibea, ai e kau, sivaraina na taunimanima taiadia ai e boilaia dobi; bena taunimanima iboudiai e tai lolololo.

5 Una negana ai Saulo na uma amo ema, ena boromakau mamaruanedia muridia amo e rakava. Bena Saulo e henanadai, eto, Taunimanima na dahaka dainai e taitaimu? Bena idia ese labese taudia haridia e hamaorolaia. 6 Saulo na una hereva e kamonai negana ai na Dirava ena lauma ese e rohea badabada, bona e badu dikadika danu. 7 Bena ia ese boromakau mamaruanedia rua e abidia, e ivadia sisi; bena Israel tanona idoinai e siaidia lao, gwaukau taudia imadia ai; eto, Daika na Saulo bona Samuel muridia amo basine raka lasi, ena boromakau mamaruanedia na unu bae karadia toma. Bena Iehova garina ese taunimanima iboudiai e butudia tao, bena iboudiai e raka lasi, tau tamona na heto. 8 Ia ese Besek ai e haboudia negana ai, Israel taudia na domaga toi,*Domaga toi = 300,000. Gerebu toi = 30,000. bona Iuda taudia na gerebu toi. 9 Bena idia ese gwaukau taudia e hamaorodia, eto, Iabese-gilead taudia ba hamaorodia, baoto “Kerukeru, dina tubua ai, ai ese baia hamaurimui”. Gwaukau taudia na ela, Iabese taudia unu e hamaorodia toma, bena iboudiai na e moale. 10 Taunabunai, Iabese taudia ese Nahasa e hamaoroa, eto, Kerukeru ai na oi dekemu baia raka lasi, bena emu ura heḡereḡerena ba kara henimai. 11 A daba ai Saulo ese ena tuari taudia e hapararadia, orea toi; bena daba kahana ai idia na taruha lalonai e vareai, Amono taudia e aladia, ela bona dina tubua. E roho mauri taudia na e heau karoho; rarua amo asie heau kubou.

12 Bena taunimanima ese Samuel e hamaoroa, eto, Daidia eto “Saulo ese baine halohiada a?” Taudia a mailaidia, baia aladia mase. 13 A Saulo eto, Tau ta basio alaia mase hari ina dina ai; badina be hari dina ai Iehova ese hahemauri karana vada e karaia Israel ai. 14 Bena Samuel ese taunimanima e hamaorodia, eto, Aoma, Gilgal aitala; unuseni ai basileia ma baita haginia lou. 15 Bena taunimanima iboudiai na Gilgal ela; unuseni ai idia ese Saulo na pavapava ai e halaoa Iehova vairanai, Gilgal ai. Unuseni ai danu herohemaino bouboudia e hahelaḡadia Iehova vairanai; bona unuseni ai Saulo bona Israel taudia iboudiai na e moale hisi dae.