1 Ia na unu amo e tore isi, Iudea tano hetoana ela, loridane sinavaina nukahana ai. Hutuma ia dekenai ma e hebou lou, bena vaia ena kara ma e hadibadia.

2 Farisea taudia haida ia dekena ela, e nanadaia hedibaḡani, eto, Tau ta adavana baine hadihoa diba eiava? 3 Ia eto, O Mose ena taravatu be dahaka? 4 Idia eto, Mose egwa “Tau ta hekoho revarevana baine torea, hahine baine henia, bena baine hadihoa”. 5 Iesu ese e haere henidia, eto, Emui lalo-duhu dainai ia ese una taravatu e henimm; 6 a tanobada e havaraiamatama amo Dirava ese maruane bona hahine e karadia. 7 Badina bunai tau ese tamana sinana baine rakatanidia, adavana mo enai baune tao, 8 bena raruosi vada bae tamona na heto. Taunabunai, idia na dia rarua, tau-anidiana vada e tamona. 9 Dirava ese vada e hahekapudia taudia na taunimanima ese basie hapararadia.

10 Ruma lalonai, ena hahediba ese una hereva ma e nanadailaia lou. 11 Bena ia ese e hamaorodia, eto, Adavana baine hadihoa bena hahine ta ma baine adavaia tauna hari heuda-hanai tauna; 12 bona adavana bainedihotania bena tau ta baine adavaia hahinena danu heuda-hanai hahinena.

13 Haida ese natudia ia dekena e laohaidia, ediai baine dau kau eto, to hahediba ese e gwaudia tubu. 14 A Iesu ese e itadia, bena e badu, eto, Ene memero-memero na dekegu aema, asio luludia, badina be enehetomadiana Dirava ena basileia taudia. 15 Na hamaoromui momokanimu, ta ese Dirava ena basileia basine abia mero-mero na heto, ia na unuseni ai basine rakavareai. 16 Bena e rosidia, imana tubuadia ai e dau kau, e hanamodia.

17 Dala amo e laova ai, tau ta e heau ela, ia vairana ai tuina e hadaia, e nanadaia, eto, Hahediba taumu namona e, ede baina kara toma mauri hanaihanai iabina totona? 18 Iesu eto, Dahaka lau namogu o gwauraimu? Ta dia namo, Dirava mo sibona. 19 Taravatu be dibamu: Basio ala-ala; Basio heuda hanai; Basio henao; Basio hahebade koikoi; Basio kara koikoi; Tamamu sinamu ba matauraidia.

20 Ia eto, Hahediba taumu e, ene iboudiai vada na badinadia, maragigu negana amo. 21 Iesu ese e raraia, e ura henia, bena eto, O dabumu ḡauna tamona binai: emu kohu ba ha hoi, ogoḡami taudia ba harihari henidia, guba kohudia hari bavabi. Bena murigu ai bame raka. 22 A ia na una hereva dainai vairana e huaia, e raka oho mai lalo-hisihisina ida, badina be ia nataḡa tauna.

23 Iesu e roharoha, bena ena hahediba e hamaorodia, eto, Taga taudia na Dirava ena basileia lalonai bae vareai, to bae heloge. 24 Idia ese ena hereva e hoalaia; bena Iesu ese ma e hamaorodia lou, eto, Natugu e, kohu e abidadama henimu taudia na Dirava ena basileia lalonai bae vareai, to bae heloge. 25 Kamelo na kobi matuna ai e vareaimu be haraḡa, a taḡa tauna na Dirava ena basileia lalonai baine vareai na mai hekwarahina. 26 Idia na e hoa dikadika, e hereva heheni, eto, Be! Daika mauri baine davaria? 27 Iesu ese e raraidia, eto, Taunimanima ese basie karaia diba, a Dirava hari mai dibana, badina be Dirava na ḡau iboudiai ikaradia dibana.

28 Bena Petro ese e hereva henia matama, eto, Benaini, ai na ḡau iboudiai vada a rakatani, oi vada a gavamu. 29 Iesu eto, Na hamaoromui momokanimu, ta ese ruma eiava tadikakana eiava taihuna eiava sinana eiava tamana eiava natuna eiava tano lau daigu ai bona sivarai namo dainai vada e rakatanidia, 30 ia hari ina nega ai sinahu sinahu be abimu, ruma, tadikakana, taihuna, sinana, natuna, tano, bona hisihisi danu; bona bainema negana ai mauri hanaihanai baine abia. 31 A guna taudia hutuma do bae gabe, bona gabe taudia do bae guna.

32 Idia na Ierusalem dalana ai e laova ai, Iesu matai e raka; idia na ia murinai e raka, e hoa bona e gari. Bena ia ese gwauta-raruosi e boiridiasiri, ienai bae vara ḡaudia iboudiai e hamaorolaidia. 33 Eto, Ita na Ierusalem ta dara daemu, Taunimanima Natuna na hahelaḡa taudia bona ilorena taudia ediai taona bae torea, bena bae revaia, idau bese taudia bac henidia. 34 ldia ese bae gonaḡonalaia, bae kanudia, bae dadabaia, bae alaia mase; a dina toi baela ia na baine tore isi lou.

35 Sebedeo natulla, lakobo bona Ioane, raruosi ia dekena e raka kahi lao, eto, Hahediba taumu e, ai raruosi a uramu baia noimu ḡauna ba henimai. 36 Ia eto, O uramu emui ai dahaka baina kara? 37 Idia eto, Oi hairaimu bavabia negana ai, ai raruosi ta idibamu ai ta laurimu ai baiama helai. 38 A Iesu e haere, eto, O noiamu ḡauna na asi dibamui. Lau baina inua keherena umui danu ba inua a? Bona lau bae bapatisolaigu bapatisona umui danu bae bapatisolaimui a? 39 Idia eto, Oibe. Bena Iesu ese e hamaorodia, eto, Momokani, lau baina inua keherena umui danu ba inua, bona lau bae bapatisolaigu bapatisona umui danu bae bapatisolaimui. 40 To idibagu ai laurigu ai bae helai taudia igwauraidia na dia lau, a unu gabu na e seudia taudia mo edia.

41 Gwautaosi e kamonai, bena idia ese lakobo bona Ioane e badu henidia. 42 A Iesu ese e boiridia, eto, Dibamui, bese idau-idau edia lohia ese e halohiadiamu, bona edia herea taudia ese e haḡanidiamu. 43 To umui na unu asio laloa toma Ta baine lohia e tomamu, ia na isiaimui baine lao heni; 44 bona ta baine herea e tomamu, ia na iboumui ai emui hesiai tauna ai bainela. 45 Badina be Taunimanima Natuna ema, dia haida ese ia isiaina bae lao henia totona, a ia hari idia isiaidia baine lao heni, bona ena mauri baine henia, hutuma ihamauridia.

46 Idia na leriko ai e kau. Bena ena hahediba bona taunimanima hutuma ia ida leriko e rakatania negana ai, Batimeo, mata-kepulu tauna, Timeo natuna, dala isena ai e helaiva, e noi hegameva. 47 Ia ese Iesu, Nasaret tauna, ladana e kamonaia, bena e boi dagu, eto, Iesu e, David natuna e, ame bogagu hisi. 48 Hutuma ese e gwau henia, basine hereva eto; to ia na e boi lou boi lou, eto, David natuna e, ame bogagu hisi. 49 Iesu vada e gini, eto, A boiria. Bena idia ese mata-kepulu tauna e hamaoroa, eto, Asiogari, a tore isi, ia ese e boirimumu. 50 Bena ena hahedoki e dokia oho, e tore isi, Iesu dekena ela. 51 Iesu ese e nanadaia, eto, Dahaka emu ai baina kara? Mata-kepulu tauna e haere, eto, Hahediba taumu e, mataguboma hapapa. 52 Bena Iesu eto, Vada aola: emu abidadama ese vada e hamaurimu. Bena matana vada e papa, Iesu murinai e raka.