Basef Jisas Krais Nigihimbaꞌmanaef Joni Ma Hiahaom Migiꞌ Mogatagai
Basef bandafi Jisas Kraisi ma hiahaom anaf migiꞌ mogatagai
1:1-8 Jon nandaꞌ basefa naꞌoh nandondoꞌah nagatilifi fafeꞌma esis sios 7-pelais nasaꞌma agol Jisas Kraisi luꞌwagol
1:9-3:22 Jon nati Jisas Krais nogogalaꞌ aꞌowaꞌi eaꞌ nandaꞌ basef ananifi fafeꞌma esis Kristen hiasi sagape sios 7-pelaisi
4:1-8:1 Jon nati heven ilif nati Jisas Krais naloma Ahamana God maloma ensel hiami eaꞌ nati Jisas natagwaha tep 7-pelaip
8:2-11:19 Jon nati ensel 7-pelaim mufapula biugel nondandam
12:1-13:18 Satan anaf nopaꞌ noloma ensel Godi hiami miliꞌamonana nisilaꞌi itap apaꞌe
14:1-15:8 Jon nati Jisas anaf nondati siꞌi sipsip noganai noloma ensel wanom moha epes sogowaꞌ alafugaha Godi kwapeteꞌas
16:1-21 Jon nati anom ensel 7-pelaim daiam mohapila maloh hondandam
17:1-19:21 God anaf nogwamasa waf awafi epes isimba wambel Babilon, eaꞌ Krais nafiꞌi nandati siꞌi aman natoma hos afitini nagafiꞌii
20:1-20:15 Satan nandaꞌ kalabus nope nowaga launai atapina, eaꞌ God nowaloga epes hiasi hiꞌilas
21:1-27 Jerusalem dambaigima
22:1-6 Walemb ambal namili lagapaimbeli baloma lawah ambal namiligahi
22:7-21 Basef Jisas Kraisi akutaifi nofala epes hiasi ma sigafiꞌmai anen
1
1 Fowaꞌ gani basef amamba mape mandambahoꞌ apaꞌ deiꞌ Jisas Krais nandaꞌam mandawalap alihim. God nasoꞌanam Jisasa nowalapam nigihimbaꞌma anom mandaꞌmana maol Godi ma mogawalapa hiahaom mape mandambahiꞌi mogataga kwafalis. Anen nasoꞌafa gawa afaꞌ wandaꞌ maola anini ma hiahawes isimba. Eaꞌ deiꞌ nasapaꞌi ensel ananinai nafiꞌmai aeꞌ Jon. Aeꞌ deiꞌ andaꞌmana maol Godi, eaꞌ anen naseꞌe basef aeꞌ wapani.* Dan 2:28-29; Re 1:19, 22:6 2 Aeꞌ atolom eaꞌ hiahaom amamba awalapam aꞌiam alihim basef Godi faloma basef ifimba endilisifi Jisas Krais nandaꞌef fandawalap alihifi.* Re 22:7,10 3 Epes ami sogotalifa basef ifimba Godi fagail buk akwaꞌe ma malogof asasigufi ma hiahaom anaf migiꞌ mogatagai, esis atiasi God nondaꞌas sonohas. Eaꞌ epes ami sogameꞌ basef ifimba ma ukup asasipii, esis sonohas wapani. Deiꞌ main, nemafa hiahaom amambai migiꞌ mogatagai felefeleꞌma mogataga.* Eks 3:14-15; Re 1:8, 3:1; Re 4:5,8, 5:6; Re 11:17, 16:5; Jo 18:37; Kl 1:18; Sam 89:27; Re 3:14, 17:14; 1 Jo 1:7, 4:10; 1 Pi 2:5,9; Re 5:10, 20:6
4-6 Aeꞌ Jon andaꞌ basef ifimba ma ipaꞌ Kristen pagape walemb 7-pelailimbi itap luꞌupa Esiai. God fowaꞌ gani nape, deiꞌ nape, anaf owagama nope atapina dondol. Aeꞌ aꞌi anen noloma Jisas Krais moloma Ambal buꞌunai Godi banagonai siꞌi ambagof buꞌwagufi 7-pelaiguf mope felefeleꞌma sia buꞌwani Godi motopalopepa dowaf mowaꞌ banagaipa moseꞌepa opalef awanilifi. Jisas Krais anen naila basef ananifi andeandeꞌ nandaꞌ hiahawes ananisi datima. Eaꞌ nawalapa basef hiafi Godi andeandeꞌ. God naliꞌ nasaꞌmana nosafel wandof. Eaꞌ nape naliꞌma anaf esis sogagaꞌi God nosaꞌmas sogosafel wapani. Jisas Krais anen atona dembinai nugumafi amom king dembami magape itapi.
Anen atona okom luꞌunai nainaila apaꞌ hiapai, ma esimbel ananimbeli atembel natagwahepa ma waf awafi apeꞌifi mataga wahifipa. Anen atona nandaꞌapa deiꞌ mape dembipai malomana mumafi epes hiasi siꞌi amom dembami king. Eaꞌ nandaꞌapa mape pris siꞌi mondolalima Godi mandaꞌ maola God Ahamana ananinai. Aeꞌ aꞌi mogogalaꞌi moloma banagami hiami ananimi atom mogape dondol lifilafi. Endilisi.* Mt 24:30; Jo 19:34-37
7 Piti, anen banagonai anaf nifiꞌi noloma otaga esis sotolona naep asasipi eaꞌ epes isimba fowaꞌ sagahana wambaꞌwi sotolona wapani. Isimba atis esis amam nematawa misiꞌah hiahi sagape itapi sotolona sowa solopana kwapeteꞌ ma waf awafi asasifi. Ahoꞌ, amamba anaf motaga endilisi naꞌamba.* Re 1:4, 15:3; Re 21:6, 22:13 8 Dembinai God banagami hiamunai anen naꞌias naꞌamba naꞌi, “Aeꞌ atowe ape Dembiwai lifilafi dondoli ape agaliꞌi a ape agagiꞌi endilisi.”
Eaꞌ anen anamba atona fowaꞌ gani anen nape, deiꞌ wapani anen nape, anaf owagama aꞌ notanima nifiꞌi.* Re 6:9
Jon nati Krais, God nandandepana nasapaꞌana nagafiꞌii
9 Aeꞌ Jon sahomepa ipeꞌiwai. Aeꞌ alomepa, apaꞌ hiapai Jisasi atepa maloma anen sisihipa mape. Akolata alomepa mofaꞌ akafimi ma mugawis nomona maol Godi nope Dembinai nugumafiapa. Eaꞌ ape alomepa ma apaꞌ hiapai magalutu banagepa naꞌamba atina mogofaꞌ nimanimi. Aeꞌ awalapa basef Godi faloma basef endilisifi ma maol Jisas nandaꞌani. Isimba atis deiꞌ esis sandaiwaꞌme saliꞌamone eaꞌ afiꞌi ape ailan agilina saꞌi Patmos. 10 Anef nemaf Dembinaii Sande Ambal buꞌunai Godi numafi aeꞌ eaꞌ ameꞌ anagol malogol goga gaꞌi mehip gandameꞌ siꞌi sugufapula anona alof, naꞌi natagai alafuga aeꞌagai.
11 Eaꞌ naꞌipi naꞌi, “Inaꞌ daꞌa basefa hiahawes isimba atiasi nigatilisi sil buk. Eaꞌ nendaꞌ basef ifimba fil buk akwamba fefeꞌ fendanda amam nematawa Godi sagape walemb ambalemba bagape 7-pelaigini. Walemb agufilimba ambalemba. Efesus, Smerna, Pergamum, Taiataira, Sardis, Filadelfia a Laodisia.”
12 Eaꞌ aeꞌ andambema aꞌi iti inimba nagaꞌipa aeꞌi. Owaꞌ ati lambeh 7-pelaimbih tol hatoma gol 7-pelaim.* Dan 7:13, 10:5 13 Laꞌafena gol amamba ati anona aman nalomambeh nalutu. Anen nandati siꞌi anona dembinai nataga epen nogofaꞌ alop epesi. Nala klos laumi mowala mambahoꞌwa boꞌwagah ananigahi eaꞌ nowahoꞌ let sandaꞌ gol sandaꞌatai mafata ananitai.* Dan 7:9, 10:6; Re 2:18, 19:12; Re 14:2 14 Balaga galoma auf fagalonai afitim aꞌowaꞌ siꞌi auf fagalo sipsipi a siꞌi ilagw amamba afitimi. Naep ananimi mogalaꞌ siꞌi nif ileliwa. 15 Eaꞌ boꞌwagah ananimi mogalaꞌ gambigambis aꞌowaꞌ endilisi mandati siꞌi bras kapa batafunai sagaofam nif luꞌwamii. Eaꞌ ameꞌ malogol ananigili nandaꞌam bendagala mehip siꞌi embel bagalaꞌ lil lil mehip.* Hi 4:12; Re 1:20; Re 2:12,16; Re 19:15,21 16 Anen nahapila ondowa 7-pelaiwa nahapilam lagol kwahisigili ananigili. Eaꞌ anona bainat hikalina waꞌowaꞌili nawisi nape malogol ananigili. Amaga ananigai gogalaꞌ aꞌowaꞌ banagona siꞌi awin owaf fagaluwi banagef aꞌowaꞌ.
17 Aeꞌ aꞌi iti anen owaꞌ afaꞌ ewa aꞌoh felefeleꞌma boꞌwagah ananigahi aꞌ andati siꞌi sagagaꞌi. Owaꞌ anen nandome lagol kwahisigili ananigili nahapili naꞌipi naꞌi, “Inaꞌ owaꞌi ombel mehenaia. Aeꞌ ape dembiwai dondol lifilafi ape agaliꞌi ape agagiꞌi endilisii.* Ais 44:6, 48:12; Re 2:8, 22:13 18 Fowaꞌ agaꞌ eaꞌ, apaꞌ deiꞌ inaꞌ natolowe ape namowe atapiwi lifilafi. Eaꞌ ape aliꞌ Dembiwai ma igimafi gaꞌ ma egawaloga epes ami sagagaꞌi sogafeꞌ wambel awambili hel aꞌa sogafeꞌ wambel buꞌwambili heven.* Re 1:1 19 Eaꞌ Aeꞌ aꞌi inaꞌ nendaꞌ basefa hiahaom amamba deiꞌ inaꞌ nagatulumi nendaꞌ basefa hiahaom amamba deiꞌ magapani a hiahaom anaf migiꞌ mogatagai wapani buk.* Re 1:16, 2:1; Re 3:1 20 Inaꞌ nati ondowa awamba 7-pelaiwa wagape lagol kwahisigili aeꞌagili a lambeh ambahemba 7-pelaimbih hatoma gol amamba 7-pelaim. Isimba sondolaꞌwaifi atis. Basef kofagefa ifimba. Ondowa ondolaꞌwaifa ensel mugumafi sios amam nematawa miniꞌap Godi, apaꞌ gol amamba mondolaꞌwaifa sios amam nematawa Godi isimba 7-pelais.
*1:1: Dan 2:28-29; Re 1:19, 22:6
*1:3: Eks 3:14-15; Re 1:8, 3:1; Re 4:5,8, 5:6; Re 11:17, 16:5; Jo 18:37; Kl 1:18; Sam 89:27; Re 3:14, 17:14; 1 Jo 1:7, 4:10; 1 Pi 2:5,9; Re 5:10, 20:6
*1:7: Re 1:4, 15:3; Re 21:6, 22:13
*1:12: Dan 7:13, 10:5
*1:13: Dan 7:9, 10:6; Re 2:18, 19:12; Re 14:2
*1:15: Hi 4:12; Re 1:20; Re 2:12,16; Re 19:15,21
*1:17: Ais 44:6, 48:12; Re 2:8, 22:13