24
यीशुन जीव उठणो
(मत्ती 28:1-10; मरकुस 16:1-8; योहान 20:1-10)
1 एप्तान पेल्ले दिह त्यु बायकु वेग्युच उठीन तियारी केरीन मोग मोग गेंदाणार तेल एने सोमान लेन माहणा माय गीयु। 2 त्यु माहणा पोर रेन देगड़ाह उथलेल देख्यु। 3 तेवी त्यु माहणा माय गीयु, पुण ता त्युह मालीक यीशुन देड़ नाह जुड़नो। 4 तो देखीन त्यु बोंगलाय गीयु, पुण तुलेचबूखे दोवल्या पिपेलन्या फाड़का पिरील, दुय माणहे त्युन आहनेच आवीन उबरेय गीया। 5 ताह देखीन त्यु बियीन बुईन उगे मुय केर लेद्यु, ते ता त्युह केया, “तुमू जीवतालाह मुरेल माय काहा होदत्युह? 6 ✡ 24:6 मत्ती 16:21; 17:22,23; 20:18,19; मरकुस 8:31; 9:31; 10:33,34; लुका 9:22; 18:31-33तो न्या नाह सुतो, पुण तो जीव उठेल हे, गेलील माय रेणे बुखेत तो तुमूह कियेल ती वात एर किरो।” 7 जोरेवरी हे काय माणहान बिटोख पापीन आथाम देराय जाय एने खुरूसखाम पोर चेड़ावाय जाय, एने मोरीन तीसरे दिह जीव उठी।
8 तेवी त्युह यीशु कियेल ती वात एर आवी। 9 बायकु माहणा माय रेन आवीन त्यु वातुह ईग्यार चेलाह एने दिहरा आखा माणहाह केय होमलायो। 10 प्रेरिताह ज्यी वातु केणाऱ्यु बायकु ज्यु हेत्यु, मरीयम मगदलीनी, योअन्ना एने याकुबान आहख मरीयम, एने त्यु हेऱ्यु दिहऱ्यु बायकु बी एत्यु। 11 त्युन वातु ताह फालतुक लागी, एने ता त्युन वाती पोर बुरहो नाह केऱ्या। 12 पुण पतरस उठनो एने दोवड़ीन माहणा माय जाईन, एने माहणा माय निवड़ीन दिख्यो, तेवी ता पोतड़ा ओलाच पोड़ रियेल देखीन तो बोंगलायीन तान गेर जात रिनो।* 24:12 थोड़ाक लेख माय वचन 12 नाह लिखेल सोतो।
ईमावुस ने वाटे यीशु चेला हिऱ्यो मिलानो
(मरकुस 16:12,13)
13 तेदिस यीशुन दुय चेला ईमावुस नावान एक गावाम जाणे बाजरियेल एता, तो गाव यरूशलेम रेन ईग्यार किलो मिटर सेटो एतो। 14 ता दुय जाणे ती गेटनान बाराम आपसा माय वातु किरते जाताला। 15 जेवी आपसा माय वातु केरतीन जाणे बाजरियेल एता तेवी यीशु ता हिऱ्यो आवो, एने ता हिऱ्यो चाल पोड़नो। 16 एने ता देख्या, पुण ता यीशुह नाह ओलख्या। 17 यीशु ताह फुशो, “तुमू काल्ली गेटनान बाराम वातु केरने बाजरेनाह? ता ज्य होमलीन नाराज एन उबरी गीया।” 18 ता माय एकान नाव क्लियोपास एतो तो केयो, “काय तु यरूशलेम रेन फिरणार तु ओलोच हे काय? ज्यी गेटना यरूशलेम माय गेटेल हे, तान बाराम तुवाह मालुम नाय मीले काय?”
19 यीशु ताह फुशो, “काल्ली वातु?” ता यीशुह केया, “तु यीशु नासरीन बाराम नाह जाणेत काय? तो बोगवानान एने आखा माणहान नेजरीम जुलूम मोठो काम एने वचनाम ताकेतवालो जाणकार ईतो। 20 मुखी चाकऱ्या एने आमरा आदिकारी ताह मोतीन डेंड आपाड़ीन खुरूसखाम पोर चेड़ाव देना। 21 आमरी आसा एती काय तोच इस्राएली माणहान सुटकारो केरावी, ओलोच नाह! एने ज्यी गेटना गेटीन तीन दिह एतेह। 22 एने आमरे माय रेन थोड्युक बायकु आमुह बोंगलाड़ देन्युह, काहाकाय त्यु वेग्युच माहणा माय जायेल एत्यु, 23 पुण त्युह यीशुन देड़ नाह सापेड़नो, त्यु इही कितेन आव्यु काय आमु हेरोगदुतान देरसेन दिखेल हेत्यु, ता आमुह कियेल काय यीशु जीवतालो हे। 24 एने आमरा थोड़ाक हाती माहणा माय गील्या, बायकु केताल्यु, तिहेच ता बी देख्या पुण ता यीशुह नाह देख्या।”
25 तेवी यीशु ताह केयो, “एय विणएकल्या, तुमू बोगवानान जाणकारान आखी वाती पोर बुरहो केरनेन काहा दिरा हेते? 26 मसी दुख वेठीन तान बोड़ाय माय बोराणे जोरेवरी एतो।” 27 मुसो एने जाणकार जो पुस्तेक माय तान बाराम लिखेल वातीन मतलब ताह सोमजाड़ दिनो।
28 तोलाक माय जा गावाम जाणे बाजरियेल एता ता गावान आहने जाय पोचना, यीशु जीवे ओंगाण जाण्यो हे इही देखाड्यो। 29 पुण ता रावणी केऱ्या काय दिह बुड़ जायेल हे, एने आदारो पोड़ने बाजरिनोह, “तु आमु हिऱ्यो थोब।” तेवी तो ता हिऱ्यो थोबणेन केरता गेरा माय गीयो। 30 यीशु ता हिऱ्यो खाणो खाणे बुठो, तेवी रूटो उखलीन बोगवानाह दन्यवाद किऱ्यो, एने रोटाह मुड़ीन ताह आपणे बाज गीयो। 31 तेवी तान डोला उगड़ी गीया एने ता यीशुह ओलखी लेदा, तेवी यीशु तान नेजरीम रेन आरताय गीयो। 32 ता आपसा माय वातु केऱ्या काय तो वाटे आपु हिऱ्यो वातु केरतालो, एने चोखाली पुस्तेकीन वातु आपुह सोमजाड़तालो, तेवी आपु ताह काहा नाह ओलेख सेक्या?
33 तुलेचबूखे ता चालोच उठीन यरूशलेम माय पोशा जात रेना, ताहरी ईग्यार चेला एने दिहरा हाती टोलवाय रियेल देख्या। 34 ता चेला केणे बाज गीया, “यीशु खेरीच जीव उठेल हे, एने शमोन पतरसाह देखायेल हे।”
35 तेवी ता दुयू वाटे ईयेल ती वात ताह केया, उंजु रूटो मुड़ने बुखेत ता यीशुह किहीक ओलखी लेदा तो आखो केय देना।
यीशु तान चेलाह देरसेन देणे
(मत्ती 28:16-20; मरकुस 16:14-18; योहान 20:19-23; प्रेरितान काम 1:6-8)
36 जेवी चेला ती वातु केणे बाजरियेल एता, तेवी तुलेचबूखे यीशु तान विची माय आवीन उबरेय गीयो एने ताह केयो, “तुमूह सान्ती जुड़ी।”† 24:36 थोड़ाक लेख माय एने उंजु ताह केयो, “तुमरे माय सान्ती रेय!” नाह लिखेल सोतो।
37 पुण ता यीशुह बुत हे, इही सोमजीन बोंगलायीन जुलूम बिय गीया। 38 यीशु ताह केयो, “तुमू काहा बितेह? तुमू मोना माय सेंका काहा केरतेह? 39 मार आथा एने पायाह दिखो, मी तोस हे। माहु सापलीन दिखो, माहु जिहकेरीन तुमू देखणे बाजरेनाह, तोहलो बुतान आड़े एने माह नाह रेत जिहकेरीन मार माय देखतेह।”
40 तेवी यीशु ज्य केयीन ताह तान आथ पाय देखाड्यो।‡ 24:40 थोड़ाक लेख माय वचन 40 नाह लिखेल सोतो। 41 ता उंजु बी बुरहो नाह किरेल एता; ता माय ओला खुस एयीन बोंगलाय गीया, यीशु ताह फुशो, “न्या तुमू फाय खाणेन काह हे काय?” 42 “ता यीशुह बुंजेल मासान टुकड़ो आप्या।” 43 तो मासान टुकड़ो तान सामने खादो।
44 यीशु ताह केयो, “मुसान पुस्तेक एने जाणकारान पुस्तेक, उंजु गीतान पुस्तेक माय मार बाराम लिखेल वातु पुऱ्यू एणे जुवे, ज्यी वातु मी तुमू हिऱ्यो रेणेन बुखेत तुमूह कियेल।”
45 तेवी यीशु चोखाली पुस्तेकीन वातु सोमेजणेन केरता ताह इकेल आप्यो। 46 एने ताह केयो, “वचन माय ज्य लेख मीलेल हे काय मसी दुख वेठी, पुण तीन दिह्याम मुरेल माय रेन जीव उठी। 47 यरूशलेम रेन चालु केरीन आखी केलीन माणहा माय इहकेरीन पारचार किरो, तुमू पाप केरने बोंद किरो ते बोगवान तुमरा पापाह माफ केरी। 48 तुमू ज्यु आखी वातीन पुरावो हेते। 49 ✡ 24:49 प्रेरितान काम 1:4दिखो मार आबोख जो माहु आपणेन वायदो किरेल हे, ताह मी तुमरी केरता मोकलुह, पुण हेरगाम रेन ताकेत जुड़ता वोर, तुमू यरूशलेम माय थोबज्यो।”
यीशुन हेरगाम जाणो
(मरकुस 16:19,20; प्रेरितान काम 1:9-11)
50 ✡ 24:50 प्रेरितान काम 1:9-11उवतो यीशु यरूशलेम हेयराम रेन बेतनिया गावान बाहेर ताह ली गीयो, तेवी तो आथ उचा केरीन ताह बोरकेत आप्यो। 51 एने ताह बोरकेत आपते लेन तो ता हिऱ्यो रेन आंगे एय गीयो, एने हेरगा माय विसाय गीयो।§ 24:51 थोड़ाक लेख माय एने उपेर हेरगा माय विसाय गीयो नाह लिखेल सोतो। 52 तेवी ता यीशुह वोंदिन जुलूम खुसी माय पोशा वोलीन यरूशलेम माय आवा। 53 एने ता दाड़ीन मोंदिर माय जाईन बोगवानान बोड़ाय केऱ्या केरताला।
✡24:6 24:6 मत्ती 16:21; 17:22,23; 20:18,19; मरकुस 8:31; 9:31; 10:33,34; लुका 9:22; 18:31-33
*24:12 24:12 थोड़ाक लेख माय वचन 12 नाह लिखेल सोतो।
†24:36 24:36 थोड़ाक लेख माय एने उंजु ताह केयो, “तुमरे माय सान्ती रेय!” नाह लिखेल सोतो।
‡24:40 24:40 थोड़ाक लेख माय वचन 40 नाह लिखेल सोतो।
✡24:49 24:49 प्रेरितान काम 1:4
✡24:50 24:50 प्रेरितान काम 1:9-11
§24:51 24:51 थोड़ाक लेख माय एने उपेर हेरगा माय विसाय गीयो नाह लिखेल सोतो।