དགེ་རྒན་རྫུས་མ་དེ་ཚོས་དུས་རབས་དང་པོའི་ཡེ་ཤུའི་ཆོས་ལུགས་པ་རྣམས་ལམ་ལོག་ཏུ་ཁྲིད་ཅིང་། དེ་ཚོས་སྐྱབས་མགོན་ཡེ་ཤུ་མཱ་ཤི་ཀ་ནི་མི་ངོ་མ་ཞིག་ཡིན་པར་ཁས་ལེན་མེད་པ་རེད། ཡེ་ཤུའི་ཆོས་ལུགས་ཀྱི་ལྡོག་ཟླར་གྱུར་པའི་ལྟ་བ་དེ་ནི་ནཱ་སི་ཊི་སེམ་༼Gnosticism༽ཞེས་པའི་གྲུབ་མཐའི་ལམ་ལུགས་ལས་བྱུང་བ་ཡིན་ལ། གྲུབ་མཐའི་ལམ་ལུགས་དེ་ནི་ཡོ་ཧ་ནན་དང་པོའི་གཞུང་ཕལ་ཆེར་དང་འབྲེལ་བའི་ལོ་རྒྱུས་ཀྱི་གནས་ཚུལ་ཡིན།

འཕྲིན་ཡིག་འདི་ཡི་གེར་འགོད་མཁན་ནི་ཟེ་བད་ཡཱའི་བུ་ཡོ་ཧ་ནན་ཡིན་ལ། ཁོང་ནི་སྐུ་ཚབ་པ་ཡིན་པ་དང་། ཡོ་ཧ་ནན་གྱི་འཕྲིན་བཟང་དང་མངོན་པའི་མདོ་གཉིས་ཡི་གེར་འགོད་མཁན་དང་། སྐྱབས་མགོན་ཡེ་ཤུའི་གཉེན་ཉེ་ཡང་ཡིན། འཕྲིན་ཡིག་འདི་དུས་ནམ་ཞིག་ལ་བྱུང་བའི་ལོ་ཚིགས་ལ་ནོར་འཕྱུག་མེད་པའི་ཐག་ཆོད་ཅིག་དཀའ་ནའང་། དུས་རབས་དང་པོའི་མཇུག་སྟེ་སྤྱི་ལོ་90ལོའི་ཡས་མས་སུ་ཡི་གེར་བཀོད་པ་ནི་རྒྱུ་རྐྱེན་མང་པོ་ཞིག་ལ་བརྟེན་ནས་ཤེས་ཐུབ།

འཕྲིན་ཡིག་འདིའི་ནང་དུ་ཡོ་ཧ་ནན་ལ་དམིགས་ཡུལ་སྤྱིར་བཏང་བ་གཉིས་ཡོད་དེ།

༼1༽ དགེ་རྒན་རྫུས་མ་རྣམས་ཐེར་འདོན་བྱེད་པ།

༼2༽ དད་ལྡན་རྣམས་ལ་མཐའ་མེད་པའི་ཚེ་སྲོག་ཡོད་པར་སྟོན་པ། ཁོང་གིས་རང་གི་དམིགས་ཡུལ་གཞིར་བཟུང་ནས་ནཱ་སི་ཊི་༼Gnostic༽ཞེས་པའི་གྲུབ་མཐའ་འཛིན་པའི་དགེ་རྒན་ཚོའི་ལྟ་བ་སྟེ། སེམས་ཉིད་ནི་ཡོངས་སུ་བཟང་པོ་ཡིན་ཞིང་། ལུས་པོ་ནི་ཡོངས་སུ་ངན་པ་ཡིན་ཞེས་པའི་སྐོར་ལ་རྩོད་པ་དྲག་པོ་བྱས་པ་དང་། ཡོ་ཧ་ནན་གྱིས་ཁྱད་པར་དུ་དེ་ཚོར་བླང་དོར་རྣམ་འབྱེད་ཀྱིས་འདང་མེད་ཚུལ་ཤུགས་ཀྱིས་གླེང་ཞིང་། སྐྱབས་མགོན་ཡེ་ཤུ་ནི་མི་ཡི་གཟུགས་པོར་གྱུར་པའི་དོན་དངོས་ལ་མིག་མཐོང་ལག་ཟིན་གྱི་བདེན་དཔང་མཛད་དེ། ཁོང་གིས་ཀློག་པ་པོ་རྣམས་ལ་སྐྱབས་མགོན་ཡེ་ཤུ་མི་ཡི་གཟུགས་པོར་གྱུར་པའི་དོན་དངོས་དེར་ར་སྤྲོད་གནང་ཡོད་པ་རེད། དེར་མ་ཟད་ཁོང་གིས་གལ་སྲིད་རང་གིས་སྒྲུབ་བཞིན་པའི་བྱ་བ་འདི་ལ་གྲུབ་འབྲས་ཐོབ་པ་ཡིན་ན་ཁོ་རང་ཡོངས་སུ་དགའ་ཞིང་སྤྲོ་བ་ཡིན་ཞེས་བརྗོད།

1. སྐྱབས་མགོན་ཡེ་ཤུ་མི་ཡི་གཟུགས་པོར་གྱུར་པའི་སྐོར། ༼1:1-4༽

2. བདག་ཅག་གིས་དད་པ་བྱས་ནས་ཡབ་དང་སྲས་དཀོན་མཆོག་ལ་འདྲིས་པར་གྱུར་པའི་སྐོར། ༼1:5-2:28༽

3. བདག་ཅག་ནི་དཀོན་མཆོག་གི་བུ་ཕྲུག་དངོས་ཡིན་པའི་སྐོར། ༼2:29-4:6༽

4. ཀུན་སྤྱོད་ཀྱི་རྣམ་གཞག་དང་ཡེ་ཤུ་མཱ་ཤི་ཀའི་སྐོར། ༼4:7-5:12༽

5. ཡེ་ཤུའི་ཆོས་ལུགས་པའི་ངེས་དོན་རླབས་བོ་ཆེ། ༼5:13-21༽