Batagaa kaŋ Pol nʼa sanba Kolos borey se
Citaaboo fahamandiroo
Kolos koyraa si hanse ka mooru Efez koyraa. Pol mana bay ka koy no din. Epafras ka Alhabar Boryaa har no din, boroyaŋ naanay. Pol goo kasaa ra kaŋ Epafras nʼa bayrandi kaŋ boroyaŋ goo Kolos kaŋ ga ceeci ka ganakey derandi. Boroyaŋ no ka kaa ka nee i se kaŋ i ga hima ka alaadawey tee ka sawa nda Alyahuudey kaniroo sanda hurubanguyan, ka almalaykey gana, nda haya tanayaŋ.
Kaŋ Pol maa woo, a na alhuzun, a na batagaa woo hantum i se kʼi bayrandi kaŋ Isa bisa almalayka, a bisa Ibilisi nda alaadawey. Isa ga wasa, nga hinne ti Hallasikaa. Pol ga bayrandi kaŋ i ma ngi boŋ dii dereyaŋ ga. A šelaŋ mo hayaa kaŋ goo hunayan žeenaa kaŋ ra Isa sii game nda hunayan taagaa kaŋ ra Isa goo.
1
Borey kaŋ se batagaa sanbandi maaɲey
nda fooyanoo kaŋ teendi i se
1 Agay Pol kaŋ ti Almasihu Isa diyaw Irkoy ibaayoo ra, nda ir armaa Timote 2 ka batagaa woo sanba arma henanantey kaŋ goo Kolos koyraa ra se kaŋ ti laadirante Almasihu albarkaa ra* 1.2 «laadirante Almasihu albarkaa ra», Grek šenni ra, almaganaa faa ti «Almasihu ganakey».. Ir Baaba Irkoy anneemaa nda alaafiyaa ma kaa war ga.
Albarka daŋyan Irkoy se
3 Waati kul kaŋ ir ga Irkoy ŋaaray war se, ir ga albarka daŋ Irkoy se kaŋ ti ir Koyoo Isa Almasihu Baaba, 4 zama ir maa naanaa kaŋ war nʼa daŋ Almasihu Isa ra nda bajoo kaŋ war gʼa tee Irkoy boro henanantey kul se 5 naataa kaŋ jisandi war se beenaa ra maaganda se. Naataa no kaŋ war maarʼa cimoo šennoo ra kaŋ ti Alhabar Boryaa. 6 A too hala war do, sanda takaa kaŋ nda a huru aduɲɲa kul ra. A ga ize tee, a ga tonton, sanda takaa kaŋ a nʼa tee war game. Za hanoo kaŋ war maarʼa, war yadda Irkoy anneemaa ga nda cimi, 7 sanda takaa kaŋ nda Epafras, ir baakaa, ir tam hangasinoo kaŋ ti Almasihu goykaw laadirante na har war se. 8 A na bajoo bayrandi ir se kaŋ Irkoy Hundoo nʼa noo war se.
9 Woo maaganda se ir mo, za hanoo kaŋ ir maarʼa, ir mana fay nda ka Irkoy ŋaaray, ka ŋaaray war ma too met nda nga ibaayoo bayraa, war ma too nda lakkal kul nda fahami kaŋ hun Irkoy Hundoo ra. 10 Woo ra war diraa takaa ga sawa nda ir Koyoo, a ga kan a se nongoo kul here. Teegoy henna dumi kul ga garandi war ra, war ga koy jine Irkoy bayraa ra. 11 Nga gaabi daržantaa ga war noo gaabi hala war ma hanse ka muɲe, war ma hanse ka suuri. Wa ɲaali 12 ka albarka daŋ Baaba Irkoy se kaŋ na war too war ma huru nga boro henanantey tuboo gaayoo ra. 13 A nʼir kaa kubaa hinoo cire kʼir ka koy nga Izʼaroo, nga baakaa laamaa ra. 14 Nga kʼir feeri kʼir kaa zunubu ra, a nʼir zunubey yaafa.
Almasihu nda nga goyoo
15 Almasihu manʼti kala Irkoy kaŋ boro si dii a biyoo,
nga ti ijinaa, a bisa takahayey kul,
16 zama nga ra haya kul takandi,
hayey kaŋ goo beenaa ra,
nda hayey kaŋ goo laboo ga,
wey kaŋ boro ga dii ey nda wey kaŋ si diyandi,
a ma tee laama, wala koytaray, wala kokoytaray, wala hini.
Nga ka hayey kul taka, nga se i takandi.
17 A ga bara haya kul jine,
nga ma kate hayey kul ma bara ngi dogey ra.
18 Gaahamoo kaŋ ti Egilizoo, nga ti boŋoo.
Nga ti sintinoo, nga ti boro jinaa kaŋ tun ka hun bukawey ra,
hala a ma jineborotaraa zaa haya kul ra.
19 A kan Irkoy se nga kul ma tabati a ra.
20 Irkoy na waafakay daŋ nga nda hayey kul game Almasihu albarkaa ra,
a ma tee hayey kaŋ goo laboo ga,
a ma tee hayey kaŋ goo beenaa ra.
Irkoy na nga kanjandibundoo kuroo ka alaafiya tee nda ey.
21 War mo, waatoo din war manʼti kala yaw nda iberi Irkoy se war miileyaney nda war teegoy futawey maaganda. 22 Amma sohõ, Irkoy na war nda nga waafakandi nga Izʼaroo kaŋ tee boro, buuyanoo ra hala war ma kay a jine ka tee Irkoy boro henananteyaŋ, boroyaŋ kaŋ ga laybu sii, boroyaŋ kaŋ ga haya si harandi. 23 Amma kala war ma tabati naanaa ra, war ma gaabandi, war masi Alhabar Boryaa naataa naŋ kaŋ war maarʼa kaŋ waazandi takaroo kul kaŋ goo beenaa cire se kaŋ se agay Pol, ay tee goykaw.
Pol goyoo nda nga tangamey
24 Sohõ ay ga ɲaali zarabey† 1.24 Zamnaa 4.3, 10. ra war maaganda se. Hayey kaŋ cindi Almasihu zarabey ra nga kunturoo se kaŋ ti Egilizoo, ay gʼi timmandi ay gaahamoo ra. 25 Ay tee Egiliz goykaw nda takaa kaŋ nda Irkoy nʼa kayandi war maaganda se ka Irkoy meešennoo har kʼa timmandi. 26 Šennoo woo ti sirroo kaŋ tugandi za jiiriyaŋ nda zamanyaŋ, amma sohõ a nʼa bangandi nga boro henanantey se. 27 Ngi se Irkoy baa nga ma sirroo woo daržaa beeriyanoo bayrandi gandawey ra. Sirroo ti: Almasihu goo war game‡ 1.27 «war game», Grek šenni ra, almaganaa faa ti «war biney ra»., woo ti naataa kaŋ war ga duu daržaa. 28 Almasihu ti šennoo kaŋ ir gʼa har ka adamize kul hoyray kʼa cawandi i se nda lakkal, hala ir ma adamize kul tee boro kaŋ tee ka timme Almasihu albarkaa ra. 29 Woo maaganda se ay ga goy šenda nda gaaboo kaŋ nda Almasihu ga goy ay ra nda hini.