1 मिनु काबु नाइक्‍तीक नाक्‍ती येसु नु आ शेंसीबपुकी चेरब रू लां रे पा गाक्‍मानु, शेंसीबपुकीमी चेरब बाला शोइश्‍शा, नोक्‍शा जामे बाक्‍त। लूका १३:१०-१७; लूका १४:१-६ 2 मिनु फरिसीपुकीमी मेको आन कली चेरब जशो तशा “नाइक्‍तीक नाक्‍ती पचा मदुम्‍ब गेय, मारदे पाइनीमी?” दे आन थुं मनुथु लोव़ पामे बाक्‍त। 3 मिनु येसुमी “दाऊद नु आ वारचपुकी शोव़लु बेक्‍मानु, मार पामे, परमप्रभु यावेमी ब्रेक्‍पाइश्‍शो लोव़ मपढेनी? १सामुएल २१:७ 4 दोपा दाऊदमी परमप्रभु यावे आ खिंमी ओव़शा, परमप्रभु यावे आ ङोंइती कोंइतीक शोब्‍ले शोल्‍शा योक्‍शा जामे? मेको शोब्‍ले चढ़ेबपुकीम ला जाइनीमी, ममाइ? अरु मुरपुकीमी जचा मदुम्‍बा, ममाइ ङा?” दे माइक्‍मी बाक्‍त। लेवी २४:९ 5 मिनु येसुमी “रागीम जरमेशो दा नाइक्‍तीक नाक्‍ती मार पचा, मार मपचा मेको नेल्‍ल देंब बाक्‍ब” देंमाक्‍त।

6 मिनु अर्को नाइक्‍तीक नाक्‍ती येसुम ग्रुम्‍तीक खिंमी शेंदानु, मेकेर आ ग्‍युरा गुइ सोव़शो मुर का बाक्‍माक्‍त। 7 मिनु सास्‍त्री नु फरिसीपुकीमी “नाइक्‍तीक नाक्‍ती सापाइक्‍चा गेय पाइबा कों?” दे योव़की पा कोव़ङमे बाक्‍त। मारदे हना येसु कली दोस गेचा माल्‍शो बाक्‍मा बाक्‍त। 8 मिनु येसुमी मेको आन मिम्‍शो तुइश्‍शा, आ गुइ सोव़शो मुर कली “एक पिशा, राप्‍शा बाक्‍को” दे मदा बाक्‍त। मिनु मेको छुल बोक्‍शा राम्‍माक्‍त। 9 मिनु येसुमी योव़की पाइब आन कली “लोव़ का हिल्‍लो पाइनन्‍नी, नाइक्‍तीक नाक्‍ती शिशी पचा देय मरिम्‍शो गेय पचा? ब्रोंइचा गेचा देय बेक्‍चा गेचा? अरेशो लोव़म मार देंबा?” दे हिल्‍लो पवा बाक्‍त। 10 मिनु मेकेर बाक्‍ब आन कली मिक्‍च मयाक्‍थु, कोव़शा, गुइ सोव़शो कली “इ गुइ दिंदो” दे मदा बाक्‍त। मिनु मेकोमी गुइ दिंसेनु, सामाक्‍त। 11 मिनु योव़की पाइबपुकी चुरशा “मेको कली मार पय?” दे लोव़ पमुमा बाक्‍त।

12 काबु येसु डांडा का ङोइश्‍शा, नाक्‍दो रे परमप्रभु यावे कली प्रार्थना पवा बाक्‍त। मर्कूस १:३५ 13 मिनु आ दीसा नां सोव़शा, आ नोले खोइक्‍ब आन कली ग्रुम्‍शा, १२ जना आन कली योव़मी बाक्‍त। योव़शो आन कली “सोइश्‍शो” दे नें वोदा बाक्‍त। मत्ती १०:२-४; प्रेरित १:१३ 14 मेको १२ जना सु सु बाक्‍मा बाक्‍त देंशा हना, सिमोन, मेको कली पत्रुस यो देंनीम। सिमोन आ लोक्‍ब अन्द्रीयास, याकूब, यूहन्‍ना, फिलीप, बारथोलोमाइ, 15 मत्ती, थोमास, अल्‍फयस आ तौ याकूब, सिमोन, मेको कली कनानी यो देंनीम, 16 याकूब आ तौ यहूदा नु इस्‍कारीयोत ङा यहूदा बाक्‍मा बाक्‍त। इस्‍कारीयोत ङा यहूदा चहिं नोले येसु कली साइक्‍चा, दे माल्‍ब आन कली वारच पाइब दुम्‍बाक्‍माक्‍त।

17 मेको मुर आन कली योव़शा, डांडा रे यिमा बाक्‍त। मिनु ठेयब दिंमम जाक्‍दीश्‍शा बाक्‍मानु, येसु आ लोव़ नेंथ एर ओंथ रे शुश मुर खुम्‍सीशा देल्‍मा बाक्‍त। मेकोपुकी यहूदीया रागी, यरूसलेम सहर, टायर नु सीदोन सहर एर ओंथ रे जाक्‍शो बाक्‍मा बाक्‍त। 18 का निक्‍शी येसु आ लोव़ नेंथ जाक्‍मा बाक्‍त। का निक्‍शी आन रोइ सापांइसीथ जाक्‍मा बाक्‍त। मिनु वोलम तशो मुरपुकी यो जाक्‍शा, सामा बाक्‍त। 19 रोइ पाइबपुकीमी येसु कली थिचा माल्‍मे बाक्‍त। मारदे हना येसु आ सक्तिम मेको नेल्‍ल आन रोइ साबाक्‍मा बाक्‍त।

20 मिनु येसुमी शेंसीब आन कली कोव़शा “गे प्रुङग मुर, ग्‍येरसीने। मारदे हना परमप्रभु यावे आ राज्‍य इन के बाक्‍ब। याकूब २:५ 21 मुल जचा मतथु बाक्‍बपुकी, ग्‍येरसीने, मारदे हना परमप्रभु यावेमी इन कली रूथ्री जचा गेब। मुल श्‍येत जशा, ङाक्‍न ङाक्‍न बाक्‍शोपुकी, ग्‍येरसीने। मारदे हना नोले ग्‍येरसीशा बाक्‍चा ताइनीनी। प्रकाश ७:१६-१७ 22 मुरुमी इन कली आं पर्बम काइ मदाक्‍थु, खेरशा हेला पामेनु, रागीम जरमेशो आ पर्बम इन कली दिप्‍मेनु, गे शुश ग्‍येरसीन। यूहन्‍ना १५:१८-१९ 23 मेको नाक्‍ती थाम्‍पा ग्‍येरसीने। मारदे हना परमप्रभु यावेमी इन कली स्‍वर्गम इनाम गेब। इन कली श्‍येत गेब आन किकी पिपीमी साइ रे परमप्रभु यावे आ लोव़ पाइब आन कली यो खेदा पा श्‍येत गेशो बाक्‍तेक्‍म।

24 गे शुश शोंप पाइश्‍शोपुकी, हिनीन। मारदे हना इन तशो रिम्‍शो नेल्‍ल थुम्‍तीनी। मत्ती १९:२३; याकूब ५:१ 25 मुल शुश जचा ताइबपुकी, हिनीन। मारदे हना नोले जचा मतथु शोव़लु बेक्‍नीनी। मुल रिश्‍शा बाक्‍बपुकी, हिनीन। मारदे हना नोले ङाक्‍शा रोंका पचा माल्‍नीनी। 26 मुल मुरपुकी रे पा मान पाइक्‍चा पुंइसीशोपुकी, हिनीन। मारदे हना इन किकी पिपीमी यो जोल पा परमप्रभु यावे आ लोव़ पाइब आन कली मो पाइक्‍बाक्‍तेक्‍म” देंत।

27 मिनु “आं लोव़ नेंबपुकी, नोफा दाइश्‍शा नेनीन, इन जोरी सत्रु आन कली दाक्‍तीने। इन कली काइ मदाक्‍ब आन कली दाक्‍तीने। 28 इन कली सराप चीले पाइब आन कली आसीक गेने। इन कली शुक्‍शी पाइब आन पर्बम परमप्रभु यावे कली पुंइदीने। १कोरिन्‍थी ४:१२ 29 इन चोव़चो का राप्‍ब आन कली अर्को चोव़चो यो राप्‍चा गेने। इन दौरा लाइक्‍ब आन कली भोटो यो प्रुइश्‍शा गेने। 30 सुइमी गे नु बाक्‍शो थोव़की पुंइतु हना, गेने। सुइमी गे नु बाक्‍शो थोव़की लाइक्‍तु हना, पितो, दे मपुनीन। 31 गेमी दोदेंशो पचा पुंइसीचा दाक्‍नीनी, गे यो मुर आन कली मोदेंशो पने। मत्ती ७:१२

32 इन कली दाक्‍ब आन कली ला दाक्‍ताक्‍नी हना, मार रिम्‍शो पनी ङा? पापीपुकीमी यो आंम कली दाक्‍ब कली दाक्‍नीम। 33 इन कली रिम्‍शो पाइब आन कली ला रिम्‍शो पाइतीनी हना, मार रिम्‍शो पनी ङा? पापीपुकीमी यो रिम्‍शो पाइब कली रिम्‍शो पाइनीम। 34 इन कली थाम्‍ने चाप्‍ब आन कली ला जेर गेतीनी हना, मार रिम्‍शो पनी ङा? पापीपुकीमी यो लेंशा ताक्‍चा कली मोदेंशो पाइनीम। ब्‍यवस्‍था १५:५-८ 35 इन जोरी सत्रु आन कली दाक्‍तीन। वारच पने। लेंशा ताक्‍चा ममिम्‍थु जेर गेने। मो पाइतीनी हना, गे ठेयब इनाम ताइनीनी। मिनु नेल्‍ल क्‍येङा ठेयब आ मुर दुम्‍नीनी। मारदे हना ‘रिम्‍शो पाइतीनी’ मदेंब नु आ अरेशो मटीब आन कली रिम्‍शो पाइब। 36 दोपा इन आफोमी शिशी पवा, मोपा गेपुकीमी यो शिशी पने” देंमाक्‍त।

37 मिनु येसुमी “मुर आन कली मनाक्‍तीने। मिनु इन कली मनाक्‍नीम। दोस मगेने। मिनु गे यो दोस मताइनीनी। माफ गेने, मिनु गे यो माफ गेचा पुंइसीनीनी। मत्ती ६:१४ 38 अरु आन कली मार मार माल्‍मा, मेको गेने। हाइश्‍शो दुम्‍शा गेतीनी हना, गे यो क्‍युप्‍चा ङा पा प्रिंशा ताइनीनी। दोपा पुक्‍शा गेनी, मोपा पुक्‍शा ताइनीनी” दे शेंदीमी बाक्‍त। मर्कूस ४:२४

39 मिनु येसुमी कथा सेल्‍शा “मिक्‍च मताइबमी मिक्‍च मताइब कली लां कोंइने चाप्‍ब ङा? लांमी खाल्‍टा बाक्‍त हना, निम्‍फा खाल्‍टाम मबिक्‍नीसी ङा? मत्ती १५:१४ 40 शेंब क्‍येङा शेंसीब ठेयब मनम। तन्‍न शेंसीबमी शुश शेंसीशा आ शेंब खोदेंशो दुम्‍ब। मत्ती १०:२४-२५; यूहन्‍ना १५:२० 41 मारदे इन लोक्‍ब आ मिक्‍चीम बाक्‍शो कसीङगर ताइनीनी। मिनु इन मिक्‍चीम बाक्‍शो मुढा चहिं मताइनीनी? 42 इन मिक्‍चीम मुढा बाक्‍त हना, दोपा इन लोक्‍ब कली ‘आं लोक्‍ब, इ मिक्‍चीम बाक्‍शो कसीङगर फेत्‍नुङ’ देंने चाप्‍नीनी ङा? गे कपटी, ङोंइती इन मिक्‍चीम बाक्‍शो मुढा फेत्‍तीने। मिनु मिक्‍च ठीक ताइब दुम्‍शा ला, इन लोक्‍ब आ मिक्‍चीम बाक्‍शो कसीङगर फेन्‍ने चाप्‍नीनी।

43 रिम्‍शो फल रवाम मरिम्‍शो फल मसिप्‍ब। मरिम्‍शो रवामी यो रिम्‍शो फल मसिप्‍ब। मत्ती ७:१६-१८ 44 फल थाम्‍शा, रिम्‍शो रवा नु मरिम्‍शो रवा तुंइसीब। चू बोटमी फोव़शी मसिप्‍ब। ख्रुमीच आ बोटमी अङगुर मसिप्‍ब।

45 रिम्‍शो थुं पाइश्‍शो मुरुमी रिम्‍शो पाइब। पापम ब्रीशो थुं पाइश्‍शो मुरुमी चहिं मरिम्‍शो पाइब। मुर आन थुंमी मार बाक्‍मे, मेको आन लोव़ नेंशा रिम्‍शो देय मरिम्‍शो मेको तुंइ‍सीब। मारदे हना थुंम मार बाक्‍मे, मेको शोव़ रे ग्रूब।

46 मारदे आं कली प्रभु, प्रभु, देंनीनी। तन्‍न आं देंशो मटीनीनी? मलाकी १:६; मत्ती ७:२१ 47 सुम आं लोव़ नेंशा टीबा, मेको दोदेंशो मुर दुम्‍बा, मेको गो इन कली माइक्‍नन्‍नी। 48 मेकोमी खिं सेलानु, जग दोशा, सेरथे फुल्‍लु तारी सेल्‍ब। मिनु रेउ यिशा भोल यिमेनु, मेको खिं मब्रेप्‍ब। मारदे हना जग बोल्‍यो पा सेल्‍शो बाक्‍ब। 49 सुमी आं लोव़ नेंशा मपाइबा, मेकोमी खिं सेलानु, जग मदोथु सेल्‍ब। मिनु रेउ यिमेनु, मेको खिं नेल्‍ल ब्रेश्‍शा भोलम योल्‍ब” दे शेंदीमी बाक्‍त।